គម្រោងរួមគ្នារវាងរាជរដ្ឋាភិបាលកម្ពុជា និងអង្គការសហប្រជាជាតិ សម្រាប់ការប្រយុទ្ធប្រឆាំងជំងឺកូវីដ១៩ និងការដោះស្រាយផលប៉ះពាល់សេដ្ឋកិច្ច-សង្គម ដោយវិបត្តិកូវីដ១៩ ត្រូវបានប្រកាសដាក់ឲ្យដំណើរការជាផ្លូវការហើយ នៅសាលប្រជុំសាលាខេត្តសៀមរាប កាលពីព្រឹកថ្ងៃទី ១១ ខែ សីហា ឆ្នាំ២០២០នេះ ក្រោមអធិបតីភាពរបស់លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និង ជាអនុប្រធានអចិន្រ្តៃយ៍គណៈកម្មាធិការជាតិប្រយុទ្ធប្រឆាំងការ ជួញដូរមនុស្ស និងលោកស្រី Kristin Parco ប្រធានអង្គការទេសន្តរប្រវេសន៍ អន្តរជាតិ ជាតំណាងអង្គការសហប្រជាជាតិប្រចាំនៅកម្ពុជា ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាអគ្គលេខាធិការ តំណាងក្រសួង ស្ថាប័នពាក់ព័ន្ធចំនួន៦ អាជ្ញាធរខេត្ត មន្ទីរ អង្គភាពពាក់ព័ន្ធមកពីខេត្តសៀមរាប , បាត់ដំបង និង ខេត្តបន្ទាយមានជ័យ និង អង្គការIOM អង្គការសហប្រជាជាតិ ក្រោមការសម្របសម្រួលរបស់គណៈកម្មាធិការជាតិប្រយុទ្ធប្រឆាំងការ ជួញដូរមនុស្ស ។
បើតាមប្រសាសន៍របស់លោកស្រី យូ សុភាព អភិបាលរងខេត្ត និងជាលេខាធិការដ្ឋានគណៈកម្មាធិការប្រយុទ្ធប្រឆាំងការ ជួញដូរមនុស្សខេត្តសៀមរាប បានបញ្ជាក់ថា ការអនុវត្តគម្រោងរួមគ្នានេះ ពិតជាមានប្រយោជន៍ និង មានភាពចាំបាច់ណាស់ សម្រាប់នាំយកមកជាមួយនូវព័ត៌មានថ្មីៗ ពីការរៀបចំគោលនយោបាយរបស់រាជរដ្ឋាភិបាល ក្នុងការឆ្លើយតបនឹងការប្រយុទ្ធប្រឆាំងជំងឺកូវីដ១៩ និង ការដោះស្រាយផលប៉ះពាល់សេដ្ឋកិច្ច-សង្គម ដោយវិបត្តិជំងឺកូវីដ១៩ ដែលអាចជាវិភាគទានដល់ការដោះស្រាយបញ្ហានៅថ្នាក់ជាតិ និងថ្នាក់ក្រោមជាតិ ជាពិសេសនោះ គឺជាការចែករំលែក ជួយសម្រាលការលំបាក និង ការជួយគ្នាក្នុងគ្រាមានអាសន្ន ហើយក៏ជាប្រពៃណី ដែលថ្នាក់ដឹកនាំគ្រប់លំដាប់ថ្នាក់របស់កម្ពុជា តែងតែប្រតិបត្តិជាប់ជាប្រចាំគ្រប់កាលៈទេសៈ មិនប្រកាន់ពណ៌សម្បុរ ជាតិសាសន៍ និន្នាការនយោបាយណាមួយឡើយ ។
មានប្រសាសន៍ក្នុងឱកាសនោះ លោកជំទាវ ជូ ប៊ុនអេង បានធ្វើការវាយតម្លៃ និង កោតសរសើយ៉ាងខ្លាំងរចំពោះកិច្ចខិតខំប្រឹងប្រែង ក្នុងការអនុវត្តនូវសេចក្តីណែនាំរបស់រាជរដ្ឋាភិបាលកម្ពុជា ក៏ដូចជាវិធានការណែនាំរបស់ក្រសួងសុខាភិបាល ក្នុងការប្រយុទ្ធ ប្រឆាំងបង្ការ ទប់ស្កាត់ពីការរីករាលដាលនូវជំងឺកូវីដ១៩ នៅក្នុងសហគម រួមទាំងការទប់ស្កាត់ចំពោះការធ្វើចំណាកស្រុកដោយខុសច្បាប់ តាមរយៈមេខ្យល់ ទទួលបានជោគជ័យទៀតផង ។
លោកជំទាវ ជូ ប៊ុនអេង បានបញ្ជាក់ទៀតថា ពលករដែលងាយរងគ្រោះបំផុត គឺស្ត្រីមានផ្ទៃពោះ ជនរងគ្រោះដោយអំពើហិង្សាផ្នែកយេនឌ័រ និង កុមារ ត្រូវចាត់ជាអាទិភាពសម្រាប់ការកំណត់អត្តសញ្ញាណ ដំណើការបញ្ជូនករណី និងគាំទ្រសម្រាប់តាមដានបន្តកាន់តែប្រសើរឡើងនៅតាមសហគមន៍គោលដៅ ដូច្នេះស្ថិតក្រោមគោលដៅចម្បង គឺការពារពលករដែលបានវិលត្រឡប់មកពីក្រៅប្រទេស និង សហគមន៍ពីហានីភ័យនៃការឆ្លងជំងឺកូវីដ១៩ ទ្រង់ទ្រាយធំ និង បន្តផ្តល់ពួកគាត់នូវសេវាសេដ្ឋកិច្ចសង្គមចាំបាច់ ជាពិសេសការផ្តល់ព័ត៌មានស្តីពីជំងឺកូវីដ១៩ ការបង្កាទប់ស្កាត់ និងបន្សាំការវាស់វែងសម្រាប់ពលករ ដែលវិលត្រឡប់មកពីក្រៅប្រទេសតាមច្រកព្រំដែន និង ធ្វើអទិភាពឆ្លើយតបជំងឺកូវីដ១៩ ដោយពង្រឹងការ ត្រួតពិនិត្យសុខភាពតាមច្រកព្រំដែន វិធានការបង្កាទប់ស្កាត់ និង ចែករំលែកព័ត៌មានដល់ពលករដែលវិលត្រឡប់មកវិញទាំង ផ្លូវការ ច្រករបៀង និងតាមមណ្ឌលចត្តាឡីស័ក ។
លោកជំទាវ ជូ ប៊ុនអេង បានបញ្ជាក់បន្ថែមទៀតថា ការកំណត់ជ្រើសរើសយកខេត្តសៀមរាប , បន្ទាយមានជ័យ និងខេត្តបាត់ដំបង ក្នុងការអនុវត្តគម្រោងរួមគ្នានេះ គឺជាការពង្រឹងយន្តការរបស់រាជរដ្ឋាភិបាលនៅថ្នាក់ក្រោមជាតិ ក្នុងការផ្តល់សេវាសង្គមកិច្ច ព្រមទាំងបន្សាំផលប៉ះពាល់ដោយជំងឺកូវីដ១៩ រយៈពេលមធ្យម ឬវែង ដល់ពលករដែលងាយរងគ្រោះបំផុត ក្នុងនោះស្ត្រីជាមេគ្រួសារ ជាពិសេសសម្រាប់ការបែងចែកដំណោះស្រាយក្នុងមូលដ្ឋាន តាមរយៈបង្កើតថ្មីនៅក្នុងមូលដ្ឋាន ហើយសង្ឃឹមថា នឹងបង្កើនជាថាមពលក្នុងការដឹកនាំ សម្រាប់ដំណោះស្រាយដ៏មានប្រសិទ្ធភាព សំខាន់ពង្រឹងសមត្ថភាព និង យន្តការឆ្លើយតប និង ត្រៀមបង្ការនៅថ្នាក់ជាតិ និងមូលដ្ឋាន រួមទាំងការឆ្លើយតប ចំពោះវិបត្តិស្រដៀងគ្នានាពេលអនាគត ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
