បើតាមសមត្ថកិច្ចស្រុកពួក បានឲ្យដឹងថា កាលពីវេលាម៉ោង២១ និង១០នាទី យប់ថ្ងៃទី១០ ខែសីហា ឆ្នាំ២០២០នេះ មានករណីគ្រោះថ្នាក់ចរាចរណ៍មួយកើតឡើង បង្កឡើងដោយរថយន្តមួយគ្រឿងម៉ាកPrius បានទៅបុកគ្នាជាមួយម៉ូតូ ស្ថិតនៅលើចំណុចផ្លូវជាតិលេខ៦ ផ្លូវបំបែកភូមិទឹកថ្លា ឃុំខ្នាត ស្រុកពួក ខេត្តសៀមរាប ។
សមត្ថកិច្ច បានឲ្យដឹងទៀតថា មុនពេលកើតហេតុ មានរថយន្តPrius ពណ៌សមួយគ្រឿង ពាក់ផ្លាកលេខ នគរបាល ២-៤៥០៧ បើកបរដោយឈ្មោះ នៅ ពុទ្ធារឹទ្ធ ភេទប្រុស អាយុ៣៧ឆ្នាំ រស់នៅក្នុងភូមិប្រយុទ្ធ ឃុំពួក ស្រុកពួក ខេត្តសៀមរាប បានបើកបរពីលិចទៅកើតលុះមកដល់កន្លែងកើតហេតុក៏បានបត់ឆ្វេងខ្វះការប្រុងប្រយ័ត្ន ហើយទៅបុកម៉ូតូមួយគ្រឿង ម៉ាកហុងដាក្លិចសេរី២០១៦ ពណ៌ស ពាក់ផ្លាកលេខ សៀមរាប១១T ៤៤០៩ បើកបរដោយឈ្មោះរឹទ្ធ ធារ៉ា ភេទប្រុស អាយុ ២២ឆ្នាំ រស់នៅក្នុងភូមិជ្រាវ សង្កាត់ជ្រាវ ក្រុង/ខេត្តសៀមរាប ជិះគ្នា៣នាក់
បណ្តាលឲ្យម៉ូតូបានខ្ទាតទៅបុក ជាមួយរថយន្តម៉ាក់ BMWX៣ ដែលបើកពីទិសខាងលិចទៅទិសខាងកើត បណ្តាលឲ្យអ្នកជិះម៉ូតូម្នាក់បានស្លាប់ មានឈ្មោះ ឡាម ហ៊ីង ភេទស្រី អាយុ ២០ឆ្នាំ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ចំនែកឯរថយន្ត០២គ្រឿង និងម៉ូតូ ០១គ្រឿងរងការខូចខាតធ្ងន់ធ្ងរផងដែរ ។
ក្រោយពេលកើតហេតុកម្លាំងជំនាញបានចុះវាស់វែងកន្លែងកើតហេតុ និង កសាងសំណុំរឿង ព្រម ទាំងដកហូតវត្ថុតាងពាក់ព័ន្ធយកទៅរក្សាទុកនៅអធិការដ្ឋាននគរបាលស្រុកពួក ដើម្បីរង់ចាំការដោះស្រាយនៅពេលក្រោយ ចំពោះសាកសពជនរងគ្រោះត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
អត្ថបទ និង រូបភាព៖ ខេង ឧត្តម
កែសម្រួល៖ អ៊ុន ណារាជ្យ
