នៅព្រឹកថ្ងៃទី១៣ ខែសីហា ឆ្នាំ២០២០នេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានជួបសំណេះសំណាលជាមបងប្អូនជាប្រតិបត្តិករទេសចរណ៍ រថយន្តតាក់ស៊ី , រ៉ឺម៉ក់កង់បី រួមទាំង ផាស្អាប់នៅក្នុងខេត្ត ចំនួនប្រមាណជាង១៤០នាក់ នៅសាលប្រជុំសាលាខេត្តសៀមរាប ដើម្បីធ្វើការណែនាំអំពីការត្រៀមខ្លួន ក្នុងការទទួលភ្ញៀវទេស ចូលមកលេងក្នុងខេត្តសៀមរាប សម្រាប់ថ្ងៃឈប់សម្រាកសងថ្ងៃចូលឆ្នាំនាថ្ងៃខាងមុខនេះ ។
ក្នុងឱកាសនោះ ឯកឧត្តម ទៀ សីហា បានមានប្រសាសន៍ ឯកឧត្តម ទៀ សីហា មានប្រសាសន៍ទៀតថា សម្រាបថ្ងៃឈប់សម្រាកសងថ្ងៃបុណ្យចូលនេះក្នុងពេលខាងមុខនេះ វាគឺជាឱកាសដ៏ល្អមួយសម្រាបខេត្តសៀមរាប និងបងប្អូនទូទៅក្នុងការស្ដារនូវសេដ្ឋកិច្ចឡើងវិញ ។ ក្នុងនោះសម្រាប់ថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០នេះ រដ្ឋបាលខេត្ត បានសហការ ជាមួយសហភាពសហព័ន្ធយុវជនកម្ពុជា និងស្ថាប័នពាក់ព័ន្ធ នឹងរៀបចំកម្មវិធីមួយ គឺកម្មវិធី សម្រាកសៀមរាប ដើម្បីធ្វើការបង្ហាញ់នូវសក្តានុពលទេសចរណ៍ខេត្ត និងលើកកម្ពស់វប្បធម៌ដ៏ល្អផូរផង់របស់បុព្វបុរសខ្មែរ ឲ្យបានគង់វង្សផងដែរ ។
ឯកឧត្តមអភិបាលខេត្តសៀមរាប បន្ថែមថា កម្មវិធី សម្រាកសៀមរាបនេះ បងប្អូនមគ្គុទេសក៍ទេសចរណ៍ នឹងបានចូលរួមធ្វើការពន្យល់បង្ហាញដល់ភ្ញៀវជាតិ ឲ្យបានស្គាល់កាន់តែច្បាប់អំពីប្រវត្តិសាស្ត្រ សម្បត្តិវប្បធម៌ជាតិ ព្រមទាំងពីស្ថានភាពភូមិសាស្ត្រធម្មជាតិព្រៃភ្នំទៀតផង ។ ក្នុងនោះសកម្មភាពនេះយើងមិនមែនធ្វើ ក្នុងពេលឈប់សម្រាក់នោះឡើយ គឺត្រូវបន្តធ្វើជារៀងរាល់ថ្ងៃឈប់សម្រាក់ប្រចាំសប្តាហ៍ ដោយនៅខេត្តសៀមរាប តាមបណ្តា មូលដ្ឋានស្រុកមួយចំនួន ក៏បានធ្វើការពង្រីកនូវតំបន់ទេសចរណ៍ធម្មជាតិ និង កែច្នៃ ដើមី្បបម្រើដល់ភ្ញៀវទេចរណ៍ជាតិ អន្តរជាតិ មកពីគ្រប់មជ្ឈដ្ឋាន ក្រោយពេលបញ្ចប់នូវវិបត្តិជម្ងឺកូវិដនេះទៅទៀត ។
ក្នុងនោះដែរ ឯកឧត្តម ក៏បានធ្វើការណែនាំដល់អ្នកចូលរួមទាំងអស់ ដោយផ្តោតទៅលើរាល់ផលប៉ះពាល់ចំពោះបងប្អូន នៅពេលនៅលើពិភពលោក បានកំពុងជួបវិបត្តិ ជម្ងឺកូវិដ១៩ សំខាន់ចំពោះខេត្តសៀមរាប ដែលជាប៉ូលសេដ្ឋកិច្ចទេសចរណ៍ដ៏សំខាន់នៃព្រះរាជាណាចក្រកម្ពុជា បានធ្វើឲ្យបាត់បង់នូវភ្ញៀវទេសចរណ៍ជាតិ អន្តរជាតិ ឲ្យប្រតិបត្តិករ និង អ្នករត់រ៉ឺម៉កបី ទាំងអស់លើកនូវបញ្ហាទុក្ខកង្វល់ សំណូមពរ នៅក្នុងអំឡុងជួបវិបត្តិជម្ងឺកូវិដ១៩ ដែលធ្វើឲ្យប៉ះពាល់ ដល់មុខរបបរប្រចាំថ្ងៃ ដើមី្បធ្វើកិច្ចពិភាក្សារកនូវផ្លូវគន្លឹះល្អ ធ្វើជាមូលដ្ឋានគ្រឹះក្នុងការស្តារឡើងវិញ នូវវិស័យទេសចរណ៍នៅខេត្តសៀមរាបឲ្យមានភាពប្រសើរឡើងវិញ ។
បើតាមរបាយការណ៍របស់ លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានឲ្យដឹងថា ខេត្តសៀមរាប គឺជាខេត្តទេសចរណ៍ដ៏សំខាន់សម្រាប់ប្រទេសកម្ពុជា ប៉ុន្តេពេលជួបវបត្តិ ជម្ងឺ កូវិដ១៩នេះ ធ្វើឲ្យប៉ះពាល់យ៉ាងខ្លាំងដល់វិស័យទេសចរណ៍ ក្នុងនោះមគ្គុទេសក៏ទេសចរណ៍គ្រប់ភាសារ ,អ្នករត់រថយន្តតាក់ស៊ីដឹកភ្ញៀវ ,រឺម៉ក់កង់បី និង ផាស្អាប់ ប្រមាណជាង៥ពាន់នាក់ដែលរងការប៉ះពាល់ សម្រាប់ជីវភាពប្រចាំថ្ងៃ រួមទាំងសណ្ឋាគារ ផ្ទះសំណាក់ ភោជនីយដ្ឋាន រួមទាំងបងប្អូន ប្រកបអាជីវកម្មក្នុងវិស័យទេសចរទៀតផង ៕
អត្ថបទ និងរូបភាព៖ ខេង ឧត្តម
កែសម្រួល៖ អ៊ុន ណារាជ្យ
