នៅព្រឹកថ្ងៃទី១៤ ខែសីហា ឆ្នាំ២០២០នេះ សាខាកាកបាទក្រហមកម្ពុជាខេត្តសៀមរាប ដឹកនាំដោយលោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា ប្រធានគណៈកម្មាធិការសាខា សហការជាមួយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត និងមន្ទីរសាធារណការ និងដឹកជញ្ជូនខេត្តសៀមរាប បានដឹកនាំក្រុមយុវជនស្ម័គ្រចិត្តសាខាកាកបាទក្រហមកម្ពុជាខេត្ត យុវជនកាយរិទ្ឋ សរុបប្រមាណជា១០០នាក់ ចុះធ្វើយុទ្ធនាការសុវត្ថិភាពចរាចរណ៍តាមដងផ្លូវសំខាន់ៗក្នុងក្រុងសៀមរាប ចំនួន៤គោលដៅ ដើម្បីពញ្ញាក់ស្មារតីដល់អ្នកប្រើប្រាស់ផ្លូវឱ្យមានការប្រុងប្រយ័ត្ន ដើម្បីចៀសផុតពីគ្រោះថ្នាក់ជាយថាហេតុ ។
គួរំលឹកថា ក្នុងយុទ្ធនាការនេះ មានការចែកជូននូវឯកសារពាក់ព័ន្ធនឹងច្បាប់ ស្តីពីសុវត្ថិភាពចរាចរណ៍ផ្លូវគោក ជូនដល់អ្នកប្រើប្រាស់ផ្លូវ , ការសួរឆ្លើយនូវសំណួរស្តីពីច្បាប់ និងបញ្ជ្រាបការយល់ដឹងបន្ថែមដល់ ក្រុមការងារយុវជនស្ម័គ្រចិត្តសាខាកាកបាទក្រហមកម្ពុជាខេត្ត យុវជនកាយរិទ្ឋ នូវទ្រឹស្តីគន្លឺះស្តីពីសុវត្ថិភាពចរាចរណ៍ផ្លូវគោក និងការរឹតបន្តឹងការអនុវត្តច្បាប់ចរាចរណ៍ផ្លូវគោក រួមទាំងធ្វើសេចក្ដីអំពាវនាវដល់បងប្អូនប្រជាពលរដ្ឋដែលបើកបរយានយន្តគ្រប់ប្រភេទ សូមបើកបរដោយស្មារតីប្រុងប្រយ័ត្ន យោគយល់និងអធ្យាស្រ័យឱ្យគ្នាទៅវិញទៅមក ទាំងការឈប់ ការចត គោរពស្លាកសញ្ញា គំនូសសញ្ញាចរាចរណ៍នៅលើតាមដងផ្លូវ និងអនុវត្តតាមការចង្អុលទិសរបស់កម្លាំងសមត្ថកិច្ចនៅតាមគោលដៅ ជាពិសេសចូលរួមគោរពច្បាប់ចរាចរណ៍ឱ្យបានខ្ជាប់ខ្ជួនទាំងអស់គ្នា ចៀសវាងការបើកវ៉ាជែង ចៀសវាងបើកបរក្នុងស្ថានភាពងងុយដេក កុំបើកបរហួសល្បឿនកំណត់ និងបើស្រវឹងកុំបើកបរ ។ល។ ជាពិសេសត្រូវចាំជានិច្ចនូវ ប្រសាសន៍ដឺថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺ ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
