មានប្រសាសន៍បើកវគ្គបណ្តុះបណ្តាល ការសរសេរព័ត៌មានបែបសន្តិភាព នាព្រឹកថ្ងៃទី ១៤ ខែ សីហា ឆ្នាំ២០២០ ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បានចាត់ទុកការសរសេរព័ត៌មានបែបសន្តិភាព ជាការលាតត្រដាងការពិត និងពង្រឹងវប្បធម៌អហិង្សាលើវិស័យព័ត៌មាន ខណៈបច្ចេកវិទ្យាកាន់តែទំនើបការចេញផ្សាយព័ត៌មានក៏មានភាពរហ័ស ដូច្នេះអ្នកព័ត៌មានត្រូវត្រួតពិនិត្យ និងទទួលខុសត្រូវឱ្យបានខ្ពស់មុនចេញផ្សាយព័ត៌មានទាំងនោះ ជៀសវាងបង្ករផលប៉ះពាល់ និងបង្ករជាទំនាស់ក្រោយពេលចុះផ្សាយ ។
ឯកឧត្តម លីវ សុខុន បានឱ្យដឹងថា ការសសេរព័ត៌មានបែបសន្តិភាពនេះ ជួយឱ្យអ្នកសារព័ត៌មាន កំណត់បាននូវប្រភេទនៃព័ត៌មាន សិក្សាពីកត្តាប្រឈមរបស់អ្នកសារព័ត៌មាន និងតម្រូវការអតិភាពសំខាន់ៗ បានយល់ដឹងអំពីឧបករណ៍មិនបង្កទំនាស់ រួមទាំងជួយអភិវឌ្ឍ និងពង្រឹងសមត្ថភាពស្តីពីការកសាងសន្តិភាព និងបំប្លែងទំនាស់ ដោយផ្អែកលើការវិភាគរឿងរ៉ាវនាពេលបច្ចុប្បន្ន ដើម្បីកំណត់យកនូវយុទ្ធសាស្រ្តសមស្របក្នុងពេលបច្ចុប្បន្ន ដែលចូលរួមចំណែកក្នុងដំណើរឆ្ពោះទៅរកសន្តិភាព ។
ឯកឧត្តមថា កន្លងមក មន្ទីរព័ត៌មានខេត្តសៀមរាប បានបំពេញតួនាទីយ៉ាងខ្ជាប់ខ្ជួន ហើយសម្រេចលទ្ធផលបានយ៉ាងល្អប្រសើរ ទៅតាមគោលការណ៍ និងផែនការណែនាំរបស់ក្រសួង និងអាជ្ញាធរខេត្តក្នុងកិច្ចសហការ សម្របសម្រួល ជាមួយអ្នកសារព័ត៌មានជាតិ និងអន្តរជាតិ សម្របសម្រួលដល់អ្នកសារព័ត៌មានក្នុងខេត្តទាំងអស់ ក្នុងការមកចុះបញ្ជីនៅមន្ទីរ ដើម្បីងាយស្រួលទំនាក់ទំនងការងារ ផ្តល់ព័ត៌មានឲ្យគ្នាទៅវិញទៅមក និងរៀបចំប្រជុំ សិក្ខាសាលាដោយប្រមូលអ្នកសារព័ត៌មានក្នុងខេត្តទាំងអស់ ដើម្បីផ្សព្វផ្សាយអំពីតួនាទី ភារកិច្ច និងច្បាប់នានាពាក់ព័ន្ធនឹងការធ្វើប្រតិបត្តិការ របស់អ្នកអ្នកសារព័ត៌មាន ។ល។ ឯកឧត្តម ទីប្រឹក្សាក្រសួងព័ត៌មាន ក៏បានជំរុញឱ្យអ្នកសារព័ត៌មានទាំងអស់ គោរពឱ្យបានតាមច្បាប់ និងក្រមសីលធម៌វិជ្ជាជីវៈអ្នកសារព័ត៌មាន កាន់ឯករាជ្យផ្សាយព័ត៌មានដែលមានប្រភពច្បាស់លាស់ និងប្រកបដោយតម្លាភាពត្រឹមត្រូវ និងព្យាយាមអភិវឌ្ឍន៍សមត្ថភាពស្របតាមការវិវត្តថ្មីៗ នៃបច្ចេកវិទ្យា ។
ជាមួយគ្នានេះ កញ្ញា ស្រី សុធាវី នាយិកាអង្គការក្រុមការងារដើម្បីដោះស្រាយទំនាស់ (ACT ) បានឱ្យដឹងថា គឺជាអង្គការមិនមែនរដ្ឋាភិបាល ក្នុងស្រុកដែលមិនរក ប្រាក់កំរៃ មិនមាននិន្នាការនយោបាយ ឬចរិតសាសនាណាមួយឡើយ ។ កញ្ញាបន្តថា (ACT ) បង្កើតឡើងដោយបុគ្គលដែលមានឆន្ទៈក្នុងការធ្វើការងារជាមួយគ្នា ដើម្បីផ្តល់ជំនាញនិងចំណេះដឹង ក្នុងវិស័យនៃការដោះស្រាយទំនាស់ ការបំប្លែងទំនាស់ និងការកសាងសន្តិភាព ផ្តោតជាសំខាន់លើការកសាង និងការពង្រឹងសមត្ថភាពផ្នែកសន្តិភាព ដោយយកការវិភាគស្ថានភាពនាពេលបច្ចុប្បន្ន ក្នុងការស្វែងរកសកម្មភាពជាយុទ្ធសាស្រ្ត ដើម្បីឆ្លើយតបនឹងបញ្ហាទំនាស់ បង្កើនផលសម្រេចបានដល់កម្រិតអតិបរមាឆ្ពោះទៅរកសន្តិភាពនិងការអភិវឌ្ឍចីរភាព។ ចាប់តាំងពីឆ្នាំ២០១៩មកដល់បច្ចុប្បន្ន អង្គការនេះ បានបើកវគ្គបណ្តុះបណ្តាលចំនួន០៣ លើកហើយ ដល់អ្នកសាព័ត៌មាន ដើម្បីពង្រឹងវប្បធម៌អហិង្សាក្នុងខេត្តចំនួន០៦ រួមមាន ភ្នំពេញ សៀមរាប បាត់ដំបង កំពង់ឆ្នាំង ព្រះសីហនុ និងខេត្តមណ្ឌលគីរី ។
គួរំលឹកថា វគ្គបណ្តុះបណ្តាល ការសសេរព័ត៌មានបែបសន្តិភាពនេះ រៀបចំដោយអង្គការក្រុមការងារដើម្បីដោះស្រាយទំនាស់ សហការជាមួយមន្ទីរព័ត៌មានខេត្ត ក្រោមការសម្របសម្រួលដោយរដ្ឋបាលខេត្តសៀមរាប ។
