សៀមរាប៖ មានការជួបជុំគ្នារបស់ក្រុមអ្នកជិះកង់ប្រមាណជាជិត២០០នាក់ នៅទីធ្លាចំណតរថយន្តមុខគ្រឹះស្ថានអង្គរ នៃក្រុងសៀមរាប នាព្រឹកថ្ងៃទី១៦ ខែសីហា ឆ្នាំ២០២០នេះ ក្នុងនោះរួមមានក្រុមអ្នកចុះឈ្មោះជិះកង់ចម្ងាយ៣ ១គីឡូម៉ែត្រ ២១គីឡូម៉ែត្រ និងក្រុមអ្នកជិះកង់កំសាន្តធម្មតាផងដែរ។ នេះគឺជាការជួបជុំលើកទី១ របស់កម្មវិធីជិះកង់ក្រោមប្រធានបទ ជិះកង់ដើម្បីកាកបាទក្រហមកម្ពុជា ដែលជាផ្នែកមួយនៃកម្មវិធីកំសាន្ត ( សម្រាកសៀមរាប ) ក្រោមការរៀបចំរបស់អាជ្ញាធរខេត្តសៀមរាប សហភាពសហព័ន្ធយុវជនកម្ពុជាខេត្តសៀមរាប និងសហការដោយអាជ្ញាធរជាតិអប្សរា ។
លោក លាង ឆុង សមាជិកក្រុមជិះកង់សុខភាពសៀមរាបអង្គរ និងជាអ្នកសម្របសម្រួលកម្មវិធីជិះកង់ ដើម្បីកាកបាទក្រហមកម្ពុជា បានឲ្យដឹងថា៖ កម្មវិធីនេះរួមមាន៣លើក លើកទី១ថ្ងៃទី១៦ លើកទី២ដែលជាថ្ងៃបើកដំណើការផ្លូវការប្រារព្ធនៅថ្ងៃទី១៨ និងលើកទី៣ដែលជាថ្ងៃបញ្ចប់ ធ្វើនៅថ្ងៃទី២១ខែសីហា ឆ្នាំ២០២០។ លោកចាប់អារម្មណ៍ថា នេះគឺជាកម្មវិធីជិះកង់ដើម្បីមនុស្សធម៌ ។ ថវិកាដែលបានមកពីការចុះឈ្មោះដោយស័្មគ្រចិត្តរបស់អ្នកជិះកង់ក្នុងកម្មវិធីនេះ ត្រូវបានរាប់បញ្ជូលទៅក្នុងមូលនិធិសប្បុរសធម៌នៃកាកបាទក្រហមកម្ពុជាសាខាខេត្តសៀមរាប ដែលក្នុងនោះសម្រាប់អ្នកចូលរួមជិះកង់១លើក ស្មើនឹង២៥ដុល្លា សម្រាប់អ្នកចូលរួម២លើកឬ៣លើក ស្មើនឹង៣៥ដុល្លា ចំណែកឯអ្នកចូលរួមជិះកំសាន្តធម្មតានៅក្នុងកម្មវិធីនេះ អាចចូលរួមថវិកាបាន តាមការស័្មគ្រចិត្ត ។
លោកបន្ថែមថា ដំណើរជិះកង់លើកទី១នេះ ត្រូវបានជិះចេញពីក្រុងសៀមរាប ចូលទៅក្នុងតំបន់ឧទ្យានអង្គរ ទស្សនាប្រាសាទតាព្រហ្ម បន្តជិះកំសាន្តក្នុងព្រៃធម្មជាតិអង្គរ ឆ្ពោះទៅប្រាសាទព្រះខ័ន្ធ និងបញ្ចប់នៅព្រះលានជល់ដំរី។ កម្មវិធីនេះ ត្រូវបានយកចិត្តទុកដាក់ ដល់ការការពារសុវត្តិភាពអ្នកចូលរួម និងអនុវត្តវិធានសុវត្ថិភាពទេសចរណ៍ ប្រឆាំងជម្ងឺកូវីត១៩ រួមទាំងបានដាក់ចេញផងដែរនូវក្រមសីលធម៌ ការពារបរិស្ថាន សណ្តាប់ធ្នាប់ សេចក្តីថ្លៃថ្នូរ ក្នុងឱកាសទស្សនាប្រាសាទបូរាណ ។
អ្នកគ្រូបង្រៀនម្នាក់ ( កញ្ញា សៀក បូផល ) ចាប់អារម្មណ៍ថា កីឡាគ្រប់ប្រភេទ គឺជាវិញ្ញាសារនាំមកនូវសុខភាព ក៏ប៉ុន្តែរូបនាងចូលចិត្តកីឡាជិះកង់។ ភ្ជាប់ជាមួយនិងកម្មវិធីនេះ កាន់តែមានឧតម្ភភាពបន្ថែមទៀត ដែលក្រៅពីទទួលបានសុខភាព នៅទទួលបានកត្តិយសជាសប្បរសជន និងបានចូលរួមសកម្មភាពក្នុងចលនាបំផុសឲ្យកំរើកឡើងវិញ ដំណើរកំសាន្តទេសចរណ៍ក្នុងស្រុក ( សៀមរាបផ្ទះខ្ញុំធ្វើបាន ទេសចរណ៍សុវត្ថិភាព )។
អ្នករៀបចំកម្មវិធី បានប៉ាន់ប្រមាណថា កម្មវិធីជិះកង់ដើម្បីកាកបាទក្រហមកម្ពុជា លើកទី២ និងលើកទី៣ នឹងមានអ្នកចូលរួមច្រើនជាងលើកទី១ ។ កម្មវិធីនេះមានផ្តល់ជូនអ្នកចុះឈ្មោះចូលរួម នូវអាវយឺត អាហារពេលព្រឹកមុនចេញដំណើរ និងមានក្រុមការងារ តាមដានការសុវត្តិភាពជាប់ជាប្រចាំ ក្នុងពេលចូលទស្សនាប្រាសាទ នៅមានមគ្គុទេសក៍ទេសចរណ៍ ធ្វើបទបង្ហាញជូនផងដែរ ៕
អត្ថបទ ៖ ងិន គីមឡេង
