ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន វាយតម្លៃខ្ពស់ថា បច្ចុប្បន្ននេះ វិស័យសកម្មភាពមីននៅកម្ពុជា បាននាំមកនូវបដិវត្តន៍និងស្វ័យប្រតិកម្មមួយយ៉ាងសំខាន់ តាមរយៈនៃការប្រើប្រាស់បច្ចេកវិទ្យាព័ត៌មានទំនើប !
រយៈពេល៣ថ្ងៃនៅខេត្តសៀមរាប អាជ្ញាធរមីនបានដំណើរការវគ្គបណ្តុះបណ្តាល ស្តីពីការប្រើប្រាស់ប្រព័ន្ធគ្រប់គ្រងផែនការបោសសម្អាតមីន គ្រាប់បែកចង្កោម និងកម្មវិធីវិភាគទិន្នន័យសកម្មភាពមីន។ គោលបំណងរបស់វគ្គបណ្តុះបណ្តាលនេះ គឺដើម្បីពង្រឹងប្រសិទ្ធិភាពនៃការគ្រប់គ្រងទិន្នន័យ និងកត់ត្រាតាមអនឡាញ លើដំណើរការនៃការរៀបចំកសាងផែនការ របស់ក្រុមការងាររៀបចំផែនការសកម្មភាពមីន រាជធានី-ខេត្តដែលហៅកាត់ថា (ម៉ាពូ) ចាប់ពីថ្នាក់ក្រោមជាតិ រហូតដល់ថ្នាក់ជាតិ។ ម៉ាពូ មកពីបណ្តាខេត្តចំនួន១៨ បានទទួលយកនូវការបណ្តុះបណ្តាលនេះ និងមានការចូលរួមផងដែរ មន្រ្តីអាជ្ញាធរមីន និងសមាជិកតំណាងគំរោង NPA-DFID។
ថ្លែងក្នុងឱកាសបិទវគ្គបណ្តុះបណ្តាលនេះ នាព្រឹកថ្ងៃទី១៣ ខែសីហា ឆ្នាំ២០២០ ឯកឧត្តមទេសរដ្ឋមន្រ្តី លី ធុជ អនុប្រធានទី១អាជ្ញាធរមីន បានវាយតម្លៃខ្ពស់ថា បច្ចុប្បន្ននេះ វិស័យសកម្មភាពមីននៅកម្ពុជា បាននាំមកនូវបដិវត្តន៍ និងស្វ័យប្រតិកម្មមួយយ៉ាងសំខាន់ តាមរយៈការប្រើប្រាស់បច្ចេកវិទ្យាព័ត៌មានទំនើប។ តាមរយៈនៃការប្រើប្រាស់ប្រព័ន្ធថ្មីនេះ នឹងផ្តល់ភាពងាយស្រួលក្នុងការតាមដានការអនុវត្តផែនការបោសសម្អាតមីន របស់ម៉ាពូរាជធានី-ខេត្ត តាមរយៈអនឡាញ ហើយក៏អាចអនុញ្ញាតឲ្យម៉ាពូ ផ្ទុកនិងឆែកមើលទិន្នន័យ ក្នុងខេត្តរបស់ខ្លួនបានយ៉ាងងាយស្រួលផងដែរ។
ប្រមុខនៃរាជរដ្ឋាភិបាលកម្ពុជា ( សម្តេចតេជោ ហ៊ុន សែន ) បានដាក់ចេញចក្ខុវិស័យ និងផែនការយុទ្ធសាស្ត្រច្បាស់លាស់ ក្នុងការបញ្ចប់ការគំរាមកំហែងដោយសារមីន អោយអស់ត្រឹមឆ្នាំ២០២៥។ យ៉ាងដូច្នេះហើយ ទើបតម្រូវឲ្យថ្នាក់ដឹកនាំអាជ្ញាធរមីន និងភាគីពាក់ព័ន្ធក្នុងវិស័យមីន រៀបចំការវាយតម្លៃផែនការសកម្មភាពមីន ៣ឆ្នាំ (២០១៨-២០២០) នៃការអនុវត្តផែនការយុទ្ធសាស្ត្រជាតិសកម្មភាពមីន ២០១៨-២០២៥ ដើម្បីកែលម្អ និងផ្តល់ធាតុចូលបន្ថែមសម្រាប់វិស័យមីននៅកម្ពុជា ឈានទៅដល់ភាពជោគជ័យ តាមផែនការដែលបានដាក់ចេញ។
លោក ពិន ប្រាកដ អភិបាលរងខេត្ត និងជាប្រធានគណកម្មាធិការសកម្មភាពមីនខេត្តសៀមរាប បានលើកឡើងដែរថា៖ បើយោងតាមតួរលេខរបស់អង្គការ ស៊ីអិមវីស ( CMVIS ) ក្នុងក្របខ័ណ្ឌទូទាំងប្រទេស បានបង្ហាញថា ក្នុងឆមាសទី១ ឆ្នាំ២០២០ ចំនួនជនរងគ្រោះដោយសារមីន និងគ្រាប់យុទ្ធភ័ណ្ឌមិនទាន់ផ្ទុះមានចំនួន៣៨នាក់ ថយចុះ៤០% បើធៀបទៅនឹងរយៈពេលដូចគ្នាក្នុងឆ្នាំ២០១៩កន្លងទៅ ដែលមានអត្រាជនរងគ្រោះចំនួន៤៨នាក់ ដែលនេះគឺជាបញ្ហាដែលតម្រូវឲ្យអ្នកពាក់ព័ន្ធ ចូលរួមក្នុងកិច្ចសហប្រតិបត្តិការការងារអប់រំផ្សព្វផ្សាយឲ្យបានទូលំទូលាយបន្ថែមទៀត។ ម៉ាពូ គឺជាខ្នងបង្អែកនៅក្នុងវិស័យមីន និងជាអ្នកជួយកាត់បន្ថយ ពិការភាព និងការបាត់បង់ជីវិត ក្រោមការគម្រោមកំហែងដោយគ្រាប់មីនប្រឆាំងមនុស្ស កាកសំណល់នៃសង្ក្រាមនោះ៕
អត្ថបទ និង រូបថត ៖ លោក ងិន គឹមឡេង
