អង្គការភ្លែនអន្តរជាតិប្រចាំប្រទេសកម្ពុជា ក្រោមកិច្ចសហការពីក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទខេត្តសៀមរាប អង្គការដៃគូ និងអាជ្ញាធរស្រុកផងនោះ នៅព្រឹកថ្ងៃទី១១ ខែសីហា ឆ្នាំ២០២០នេះ បានបើកយុទ្ធនាការចែកចែកសម្ភារធុងទឹកសម្រាប់ប្រើប្រាស់លាងដៃ ជូនដល់ប្រជាពលរដ្ឋជាច្រើនគ្រួសារ នៅក្នុងឃុំមោង ស្រុកស្រីស្នំ ខេត្តសៀមរាប ដែលជាគម្រោងជូនដល់គ្រួសារក្រីក្រកម្រិត១និងកម្រិត២ សរុបចំនួន៥.១០០គ្រួសារ នៅក្នុងតំបន់ប្រតិបត្តិរបស់អង្គការភ្លែនអន្តរជាតិ មានស្រុកចំនួន៤ គឺ ស្រុកអង្គរធំ ស្រុកអង្គរជុំ ស្រុកបន្ទាយស្រី និងស្រុកស្រីស្នំ ដែលបានអនុវត្តនៅក្នុងខេត្តសៀមរាប ចាប់តាំងពីឆ្នាំ២០០២មកម្លេះ ។
លោក ហង្ស ប៊ុនណា ប្រធានប្រតិបត្តិអង្គការភ្លែនអន្តរជាតិប្រចាំប្រទេសកម្ពុជា មានប្រសាសន៍ថា ការចែកសម្ភារប្រើប្រាស់សម្រាប់លាងដៃជាប្រចាំនេះ វាពិតជាមានភាពចាំបាច់ណាស់សម្រាប់បងប្អូនប្រជាពលរដ្ឋ ជាពិសេសអ្នករស់នៅតំបន់ដាច់ស្រយាល ក្នុងការទទួលបានព័ត៌មាន ក៏ដូចជាចំណេះដឹងស្តីពីការរក្សាអនាម័យ និងវិធានការការពារពាក់ព័ន្ធទៅនឹងជំងឺផ្សេងៗទៀត ដោយផ្តោតលើគម្រោងទឹកស្អាត អនាម័យ សុខភាព អាហារូបត្ថម្ភ កិច្ចការពារកុមារ ការអប់រំ និងការឆ្លើយតបដើម្បីទប់ស្តាត់ការរីករាលដាលនៃជំងឺកូវីដ១៩ផងដែរ ក្នុងនោះបានចុះអនុវត្តសកម្មភាពមួយចំនួនដូចជា៖ ១. ផលិតឈ្នាន់ជាន់សម្រាប់លាងសម្អាតដៃចំនួន២៥ ដើម្បីផ្តល់ជូនដល់មន្ទីរពេទ្យ មណ្ឌលសុខភាព សាលាស្រុក សាលាឃុំដែលខ្វះខាតកន្លែងលាងសម្អាតដៃ និង ២. ផលិតឧបករណ៍លាងសម្អាតដៃតាមគ្រួសារចំនួន៥.១០០ផងដែរ ។
មានប្រសាសន៍ក្នុងឱកាសនោះ លោកស្រី គ្រឹង ស៊ាម អភិបាលរងស្រុកស្រីស្នំ បានសម្ដែងនូវការគាំទ្រ និងថ្លែងអំណរគុណចំពោះអង្គការភ្លែនអន្តរជាតិ ក្រោមកិច្ចសហការពីក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទខេត្តសៀមរាប អង្គការដៃគូ និងអាជ្ញាធរពាក់ព័ន្ធទាំងអស់ ដែលតែងតែយកចិត្តទុកដាក់ជាមួយបងប្អូនប្រជាពលរដ្ឋរស់នៅក្នុងស្រុកស្រីស្នំ ក្នុងរយ:កាលកន្លងមក ដូច្នេះតាមរយៈនេះ សំណូមពរដល់បងប្អូនប្រជាពលរដ្ឋទាំងអស់ ត្រូវចូលរួមទាំងអស់គ្នា ក្នុងការការពារ និង ទប់ស្កាត់ការរីករាលដាលជំងឺកូវីដ១៩ ពិសេសត្រូវមានការប្រុងប្រយ័ត្នឲ្យបានខ្ពស់ ពេលធ្វើដំណើរទៅណាមកណា សូមរក្សាគម្លាតសុវត្ថិភាព និង ត្រូវលាងដៃដោយសាប៊ូ ឬអាកុលឲ្យបានជាប្រចាំក្នុងគ្រួសារនីមួយៗ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
