កាលពីរសៀលថ្ងៃទី០៩ ខែសីហា ឆ្នាំ២០២០នេះ ប្រជាពលរដ្ឋរងផលប៉ះពាល់ពេលជួបវិបត្តិជំងឺកូវីដ១៩ ចំនួន ១០០គ្រួសារ មកពី០៨ភូមិ ក្នុងសង្កាត់គោកចក ក្រុង ខេត្តសៀមរាប បានទទួលអំណោយសប្បុរសធម៌របស់រ៉ូតារីក្លឹប ចតុមុខ រាជធានីភ្នំពេញ ដែលដឹកនាំដោយលោកស្រី ឡេង ផល្លី នាយិកា ចតុមុខរ៉ូតថារីក្លឹប រាជធានីភ្នំពេញ ដែរអំណោយដេលប្រគល់ជូន ក្នុងមួយគ្រួសារទទួលបាន អង្ករ ២០គក្រ មី ១កេស មុង១ ម៉ាស់ អាល់កុល និងគ្រឿងឧបភោគ បរិភោគមួយចំនួនទៀត ដែលពិធីនេះរៀបចំឡើងនៅបរិវេណ វត្តប្រាសាទគោកចក ក្នុងសង្កាត់គោកចក ក្រុងសៀមរាប ។
លោក ទិត ឌីរ៉ា ចៅសង្កាត់គោកចក បានឲ្យដឹងថា ប្រជាពលរដ្ឋនៅក្នុងសង្កាត់គោកចក មួយចំនួនតូចជាប្រជាកសិករ និង មួយចំនួនធំប្រកបការងារក្នុងវិស័យទេសចរណ៍ ។ ដោយបញ្ហានៃវិបត្តិជំងឺកូវីដ ១៩ បានធ្វើឲ្យប៉ះពាល់យ៉ាងខ្លាំង ដល់វិស័យទេសចរណ៍ នៅខេត្តសៀមរាប ដែលធ្វើឲ្យបងប្អូនប្រជាពលរដ្ឋ ដែលមានជីវភាពអាស្រ័យលើវិស័យទេសចរណ៍ បានរងការប៉ះពាល់ដល់ជីវភាពប្រចាំថ្ងៃ សំខាន់ចំពោះចាស់ជរាគ្មានទីពឹង ជនពិការ ស្ត្រីមេម៉ាយកូនច្រើន កុមារកំព្រា និង អ្នកកំពុងរស់នៅជាមួយមេរោគអេដស៍ ។
ក្នុងឱកាសនោះ លោកស្រីនាយិកា ឡេង ផល្លី មានប្រសាសន៍ថា គោលបំណងរបស់រ៉ូតថារីក្លឹបកម្ពុជាបង្កើតឡើង គឺដើមី្បបម្រើនៅក្នុងវិស័យមនុស្សធម៌ ដោយការប្រមូលនូវមូលនិធីពីសមាជិករបស់ខ្លួន តាមរយៈកម្មវិធីផ្សេងៗ ដូចជាការជឹះកង់ប្រមូលមូនិធិ ក្នុងការទ្រទ្រង់វិស័យមនុស្សធម៌ ។ ក្នុងនោះដោយមើលឃើញពីភាពលំបាក របស់ប្រជាពលរដ្ឋ ក្នុងពេលជួបប្រទះនូវវិបត្តិនៃជម្ងឺកូវិដ១៩ វាបានធ្វើឲ្យមានផលប៉ះពាល់យ៉ាងខ្លាំង ដល់ប្រជាពលរដ្ឋក្រីក្រ ក្នុងជីវភាពរស់នៅប្រចាំថ្ងៃ ។ អ្វីដែលសំខាន់ប្រជាពលរដ្ឋក្នុងខេត្តសៀមរាប គឺវិស័យទេសចរណ៍ គឺមានសារសំខាន់បំផុត ព្រោះបើគ្មានភ្ញៀវទេសចរណ៍ចូលមកទស្សនាកម្សាន្តនោះ គឺធ្វើ ឲ្យបាត់បង់នូវចំណូលប្រចាំថ្ងៃ ហើយមួយចំនួនបានជួបការខ្វះខាតយ៉ាងខ្លាំងទៀតផង ។
លោកស្រីនាយិកា បន្ថែមថា ដើមី្បចូលរួមជាមួយរាជរដ្ឋាភិបាល និង អាជ្ញាធរមូលដ្ឋាន ក្នុងការជួយសម្រាលបន្ទុកដ៏ធ្ងន់នេះ រ៉ូតថារីក្លឹបកម្ពុជា បាននាំអំណោយជាគ្រឿងឧបភោគបរិភោគ មកផ្តល់ជូនគ្រួសារខ្វះខាតក្នុងសង្កាត់គោកចកនេះ ទោះបីអំណោយទាំងអស់នេះតិចតូចក្តី គ្រាន់តែអាចជួយសម្រួលការខ្វះខាតរបស់បងប្អូនបានមួយរយៈពេលខ្លី ក្នុងពេលដែលប្រទេសជាតិកំពុងជួបនូវវិបត្តិជម្ងឺកូវិដ ១៩ ដែលធ្វើឲ្យមានផលប៉ះពាល់ក្នុងជីវភាព របស់បងប្អូនជាគ្រួសារងាយរងគ្រោះ ។
អត្ថបទ និង រូបភាព៖ គឿន វ៉េត
កែសម្រួល៖ អ៊ុន ណារាជ្យ
