សៀមរាប៖ តាមរបាយការណ៍របស់មន្ទីរទេសចរណ៍ខេត្តសៀមរាប នៅថ្ងៃទី២១ ខែសីហា ឆ្នាំ២០២០នេះ បានឲ្យដឹងថា ក្នុងខេត្តសៀមរាបមានភ្ញៀវទេសចរជាតិ និងអន្តរជាតិចូលមកកំសាន្ត មានចំនួនសរុប ៣២,១៧៩នាក់ ដោយក្នុងនោះភ្ញៀវទេសចរបរទេសមានចំនួន ១៧៩នាក់ មានការថយចុះ ៩៥.៩០% ប្រៀបធៀបឆ្នាំ២០១៩ គឺមានចំនួន ៤,៣៦៤នាក់ ។ ភ្ញៀវជាតិមានចំនួនប្រមាណ ៣២,០០០នាក់, មានការថយចុះ – ២៨.៩៧% មានការថយចុះ ប្រៀបធៀបថ្ងៃទី២០ សីហា ឆ្នាំ២០២០នេះ ។
ក្នុងនោះសម្រាប់រយៈពេល ៦ថ្ងៃ ចាប់ពីថ្ងៃទី ១៦ ដល់២១ ខែសីហា ឆ្នាំ២០២០ សរុបចំនួនប្រមាណ ២១៥,០៤៧នាក់ ដោយភ្ញៀវទេសចរបរទេសមានចំនួន ២,០៤៧នាក់ មានការថយចុះ៩៣.២៩% ប្រៀបធៀបឆ្នាំ២០១៩ គឺមានចំនួន ៣០,៥០៨នាក់ ។ ភ្ញៀវទេសចរជាតិ មានចំនួនប្រមាណ ២១២,០០០នាក់ ។
គួរឲ្យដឹងដែរថា ក្នុងឱកាសថ្ងៃឈប់សម្រាកសងបុណ្យចូលឆ្នាំខ្មែរ ដែលមានរយ:ពេល ៥ថ្ងៃ រួមនឹងថ្ងៃសៅរ៍ អាទិត្យពីរដងទៀតស្មើនឹង ៩ថ្ងៃ ដែលជាការអនុញ្ញាតដោយប្រមុខរាជរដ្ឋាភិបាលកម្ពុជា រដ្ឋបាលខេត្តសៀមរាប បានរៀបចំឱ្យមានកម្មវិធីកម្សាន្តមួយដ៏ធំគឺកម្មវិធីកម្សាន្ត ក្រោមប្រធានបទ” សម្រាកសៀមរាប ” ដែលជាគំនិតផ្ដួចផ្ដើមរបស់ឯកឧត្តម ទៀ សីហា អភិបាលខេត្តសៀមរាប និងឯកឧត្តមប្រាក់ សុភ័ណ ប្រធានសហភាពសហព័ន្ធយុវជនកម្ពុជាខេត្តសៀមរាប ៕
#មន្ទីរទេសចរណ៍ខេត្តសៀមរាប
