សៀមរាប៖ នៅរសៀលថ្ងៃទី២៣ ខែសីហា ឆ្នាំ២០២០នេះ កម្លាំងកងរាជអាវុធហត្ថខេត្តសៀមរាប បានបញ្ជូនខ្លួនជនសង្ស័យចំនួន ០៦នាក់ទៅកាន់តុលាការខេត្តសៀមរាប ជាប់ពាក់ព័ន្ធករណីឃាតកម្មគិតទុកជាមុន ។
បើតាមលោកឧត្តមសេនីយ៍ ប៉ោ វណ្ណនិត មេបញ្ជាការកងរាជអាវុធហត្ថ ខេត្តសៀមរាប បានបញ្ចាក់ថា ជនសង្ស័យទាំង ០៦នាក់រួមមាន៖ ទី១ឈ្មោះ សឿន សាន់ ភេទប្រុស អាយុ ១៩ឆ្នាំ មុខរបរ មិនពិតប្រាកដ, ទី០២. ឈ្មោះ សយ ណុប ភេទប្រុស អាយុ២១ឆ្នាំ មុខរបរ កម្មករសំណង, ទី០៣. ឈ្មោះ សឿន ឡង់ឌី ភេទប្រុស អាយុ១៨ឆ្នាំ មុខរបរ កម្មករលក់ស្បែកជ្រូកបំពង់, ទី០៤. ឈ្មោះ បូរី សីហា ភេទប្រុស អាយុ ២០ឆ្នាំ មុខរបរកម្ម, ទី០៥ឈ្មោះ ខន ឃី ភេទប្រុស អាយុ១៨ឆ្នាំ មុខរបរ មិនពិតប្រាកដ និងទី០៦. ឈ្មោះ ហ៊ុល សំអូន ហៅពៅ ភេទប្រុស អាយុ ១៧ឆ្នាំ មុខរបរ កម្មករដាក់ឆ័ត្រនៅមុខផ្សារលើ ដែលជនសង្ស័យខាងលើរស់នីៅក្នុងក្រុងសៀមរាបទាំងអស់គ្នា ។
សូមបញ្ជាក់ថា កាលពីវេលាម៉ោង២១ និង៣០នាទី ថ្ងៃទី១៩ ខែសីហា ឆ្នាំ២០២០ ត្រង់ចំណុចមុខសណ្ឋាគារសុខាសៀមរាប ផ្លូវ៦០ម៉ែត្រ ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប មានករណីឃាតកម្មមួយបានើ់តឡើង បង្កឡើងដោយជនសង្ស័យមិនស្គាល់អត្តសញ្ញាណ មានគ្នាប្រមាណជាង ១០នាក់ជិះម៉ូតូប្រហែល០៨គ្រឿង មិនចាំម៉ាក បានធ្វើសកម្មភាពកាប់ទៅលើជនរងគ្រោះមួយក្រុមមានគ្នា ០៥នាក់ ជិះម៉ូតូចំនួន ០៣គ្រឿងបណ្ដាលឲ្យយុវជនម្នាក់ឈ្មោះ ឆាត មុត ភេទប្រុស អាយុ១៨ឆ្នាំ មុខរបរជាងឈើ រស់នៅភូមិសួង ឃុំត្រពាំងធំ ស្រុកប្រាសាទបាគង ខេត្តសៀមរាប ត្រូវចំកញ្ចឹងក បណ្តាលអោយស្លាប់នៅនឹងកន្លែង នងិ០២នាក់ទៀតបានរងរបួស ។
ក្រោយពេលកើតហេតុ លោកឧត្តមសេនីយ៍ ប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប បានបញ្ជាមកមន្ទីរយុត្តិធម៌ ដឹកនាំដោយលោកវរសេនីយ៍ឯក ថា ដាលុច មេបញ្ជាការរង ទទួលការងារយុត្តិធម៌ ចុះស្រាវស្រាវករណីឃាតកម្មខាងលើ រហូតដល់ថ្ងៃទី២១ ខែសីហា ឆ្នាំ២០២០ កម្លាំងជំំនាញបានកំណត់មុខសញ្ញាជនសង្ស័យបាន ហើយបានធ្វើការឃាត់ខ្លួនជនសង្ស័យទាំង ០៦នាក់ខាងលើតែម្ដង ។ ក្រោយឃាត់ខ្លួនជនសង្ស័យខាងលើបានសារភាពថា ពួកគេពិតជាបានប្រព្រឹត្តបទល្មើសខាងលើពិតប្រាកដមែន ដោយសារពួកគេធ្លាប់មានទំនាស់ជាមួយក្រុមជនរងគ្រោះ ។
