នៅថ្ងៃទី៣០ ខែសីហា ឆ្នាំ២០២០ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបសំណេះសំណាល ជាមួយលោក ឈាវ ហុង កសិករគម្រូជាប់ចំណាត់ថ្នាក់លេខ២ ទូទាំងប្រទេសផ្នែកដំណាំបន្លែ និងចុះពិនិត្យស្ថានភាព កសិករ នៃសហគមន៍កសិកម្មសំរោងមានជ័យ គាំទ្រដោយកម្មវិធី អាស្ប៉ាយ(ASPIRE) ស្ថិតក្នុងភូមិ សំរោងត្បូង ឃុំសំរោង ស្រុកសូទ្រនិគម ខេត្តសៀមរាប។
សូមជម្រាបថា កម្មវិធីផ្សព្វផ្សាយបច្ចេកទេសកសិកម្មថ្មី ធន់នឹងការប្រែប្រួលអាកាសធាតុ ហៅកាត់ថា អាស្ប៉ាយ(ASPIRE) ជាកម្មវិធីសម្រាប់ជួយដល់ កសិករទទួលបាននូវបច្ចេកទេស និងធាតុចូលថ្មីៗ ក្នុងវិស័យកសិកម្ម ដែលអាចដាំដុះបានគ្រប់រដូវកាលពេញមួយឆ្នាំ ដោយមិនប្រឈមនឹងការប្រែប្រួលអាកាសធាតុឡើយ។ ហើយបច្ចេកទេសទាំងនោះ ក៏បានជំរុញដល់ផលិតកម្មកសិផល ទទួលបានទិន្នផលកើនឡើង និងមានគុណភាព សមស្របតាមតម្រូវការទីផ្សារ។
តាមការឲ្យដឹងពី លោក ឈាវ ហុង កសិករ នៃសហគមន៍កសិកម្មសំរោងមានជ័យ បញ្ជាក់ថា សហគមន៍របស់លោក មានផ្ទៃដីសរុបជាង ៧ហិកតា ក្នុងនោះ ប្រើប្រាស់សម្រាប់ បណ្ដុះផ្សិត ដាំបន្លែយកស្លឹក យកផ្លែ ចិញ្ចឹមត្រី ចិញ្ចឹមមាន់ និងមួយផ្នែកទៀត សម្រាប់ផលិតជីកំប៉ុស។
លោកបន្ថែមថា រយៈពេល ២០ឆ្នាំជាកសិករ នៅឆ្នាំ២០១៩ គឺជាឆ្នាំដែលលោកមានមោទនភាពបំផុត ដែលបានធ្វើឲ្យការប្រកបរបរកសិកម្ម របស់លោកបោះជំហានទៅមុខ ដោយមានការបញ្ជាទិញពីអាជីករក្នុងផ្សារតូចធំ ផ្សារទំនើបនានា ព្រមទាំងឈ្មួញមួយចំនួនទៀត ព្រមទាំងបានក្លាយជាកសិករគម្រូជាប់ចំណាត់ថ្នាក់លេខ២ ទូទាំងប្រទេស។ សម្រាប់ឆ្នាំ២០២០ ទោះបីវិបត្តិកូវីត១៩ នៅបន្តទៅមុខ ក៏អាជីពរបស់លោកពុំមានផលប៉ះពាល់គួរឲ្យព្រួយបារម្ភឡើយ ដោយសារ កម្មវិធី អាស្ប៉ាយ(ASPIRE) របស់រាជរដ្ឋាភិបាលកម្ពុជា បានជួយដល់គាំទ្រដល់ពួកគាត់។
លើកឡើងក្នុងឱកាសនោះ ឯកឧត្តមរដ្ឋមន្ត្រី ក៏បានលើកទឹកចិត្តដល់កសិករទាំងអស់ ត្រូវបន្តខិតខំ បង្កើនបរិមាណផលិតផល ដើម្បីធានាការផ្គត់ផ្គង់ គុណភាព និងកែច្នៃការវេចខ្ចប់ សម្រាប់ធ្វើការប្រកួតប្រជែងនៅលើទីផ្សារ។ ស្របទៅនឹងឆន្ទ: និងបំណងប្រាថ្នារបស់រាជរដ្ឋាភិបាលកម្ពុជា ដែលមានសម្តេចតេជោ ជានាយករដ្ឋមន្រ្តី ពិតជាចង់បាន ចង់ឃើញ ប្រជាពលរដ្ឋខ្មែរមានជីវភាពធូរធារ រស់នៅជួបជុំគ្រួសារ ក្រោមម្លប់សុខសន្តិភាព ហើយរួមគ្នាខិតខំ ដើម្បីដើរឆ្ពោះទៅរកគោលដៅអភិវឌ្ឍសេដ្ឋកិច្ចជាតិនាឆ្នាំ២០៣០ និង២០៥០។ ទន្ទឹមនោះ ឯកឧត្តមរដ្ឋមន្ត្រី ក៏បានចែកកូនកង្កែប ពូជបន្លែ ចំណីសត្វ និងថវិកាមួយចំនួន ជូនដល់សហគមន៍សំរោងមានជ័យផងដែរ។
គួរបញ្ជាក់ថា អាស្ប៉ាយ ជាកម្មវិធី គាំទ្រវិស័យកសិកម្មទូទាំងប្រទេស របស់រាជរដ្ឋាភិបាលកម្ពុជា ទទួលហិរញ្ញប្បទាន ពី អង្គការសហប្រជាជាតិ សម្រាប់ការអភិវឌ្ឍកសិកម្ម (IFAD) និងមានការចូលរួម ថវិកាបដិភាគរបស់រាជរដ្ឋាភិបាលកម្ពុជាផងដែរ។ សម្រាប់ខេត្តសៀមរាបបានចាប់ផ្តើមអនុវត្តន៍កម្មវិធី អាស្ប៉ាយ នៅឆ្នាំ២០១៩ ដោយផ្តោតសំខាន់ លើចងក្រងក្រុមគ្រួសារកសិករ ជាបណ្តុំអាជីវកម្ម កសិកម្ម មានដូចជាបណ្តុំអាជីវកម្មស្រូវ បណ្តុំអាជីវកម្មបន្លែ បណ្តុំអាជីវកម្មចិញ្ចឹមមាន់ បណ្តុំអាជីវកម្មចិញ្ចឹមត្រី។ល។ បច្ចុប្បន្នសហគមន៍កសិកម្ម ដែលបានចុះបញ្ជីនៅមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប មានចំនួន៥៥ កំពុងប្រកបរបរចម្រុះ គឺមានដូចជាផលិតកម្មស្រូវពូជ ស្រូវចំណី ដាំដំណាំបន្លែ ចិញ្ចឹមសត្វ វារីវប្បកម្ម និងសេវាកម្មផ្សេងៗ ជាមួយគ្នានេះក៏បានបង្កើតជាសហភាពសហគមន៍កសិកម្មបានចំនួន២ ដែល មានសហគមន៍កសិកម្ម ចូលជាសមាជិកសហភាពចំនួន ២៨សហគមន៍។
អត្ថបទ និងរូបភាព: លោក យូ វង្ស
កែសម្រួលដោយ៖ លោក សេង ផល្លី
