ក្រសួងប្រៃសណីយ៍និងទូរគមនាគមន៍ បានសម្រេចជ្រើសរើសយកខេត្តសៀមរាប សម្រាប់ការបើកសិក្ខាសាលា ស្តីពីការពង្រឹងសមត្ថភាពអនុវត្តការងារ នៅថ្នាក់មន្ទីរប្រៃសណីយ៍ និងទូរគមនាគមន៍ ក្នុងរយៈពេល០៤ថ្ងៃ ដែលពិធីបើយបានប្រព្រឹត្តទៅនៅព្រឹកថ្ងៃទី៣១ ខែសីហា ឆ្នាំ២០២០នេះ ក្រោមអធិបតីភាពឯកឧត្តម ឯក វណ្ណឌី រដ្ឋលេខាធិការក្រសួងប្រៃសណីយ៍និងទូរគមនាគមន៍ និង លោកស្រី យូ សុភា អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណអភិបាលខេត្តសៀមរាប ដោយមានមានមន្ត្រីជំនាញចំនួនប្រមាណជាង១០០នាក់ មកពីខេត្តចំនួន១១ ក្នុងប្រទេសកម្ពុជា ។
ឯកឧត្តម ឯក វណ្ណឌី មានប្រសាសន៍ថា សិក្ខាសាលានេះ គឺផ្តើមចេញពីការអនុវត្តអានុសាសន៍ដ៏មានសារៈសំខាន់របស់ឯកឧត្តមរដ្ឋមន្រ្តី ក្នុងគោលបំណងបំពាក់បំប៉នចំណេះដឹង និង ផ្តល់នូវព័ត៌មានថ្មីៗបន្ថែមទៀត ស្តីពីការអភិវឌ្ឍន៍បច្ចេកវិទ្យា ការងារគ្រប់គ្រង ការអនុវត្តភារកិច្ចនិងតួនាទី ហើយអ្វីដែលជាពិសេសនោះ គឺការពង្រឹងសមត្ថភាពសម្រាប់ការធ្វើដំណោះស្រាយរាល់បញ្ហាប្រឈមនានា ឲ្យមានប្រសិទ្ធភាពផងដែរ ដើម្បីចូលរួមចំណែកជំរុញឲ្យវិស័យប្រៃសណីយ៍ វិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន ទទួលបានប្រសិទ្ធភាពខ្ពស់ ទាំងក្នុងតំបន់និងជាសាកល ឆ្លើយតបតាមតម្រូវការរបស់ប្រជាពលរដ្ឋ ប្រតិបត្តិករ និងស្របតាមតួនាទីភារកិច្ចដែលក្រសួងប្រគល់ជូន។
ឯកឧត្តម ឯក វណ្ណឌី មានប្រសាសន៍បន្ថែមថា ដើម្បីអនុវត្តលើផែនការយុទ្ធសាស្រ្តជាតិ ក្រសួងបានខិតខំប្រឹងប្រែងយកចិត្តទុកដាក់ ដើម្បីកែលម្អលើវិស័យប្រៃសណីយ៍ ទូរគមនាគមន៍ និងបច្ចេកវិទ្យាគមនាគមន៍និងព័ត៌មាន ដោយផ្តោតលើការកសាងសមត្ថភាពមន្រ្តីរាជការគ្រប់ជាន់ថ្នាក់ ដែលនេះគឺជាគន្លឹះមួយ ក្នុងចំណោមគន្លឹះដទៃទៀត សម្រាប់ធ្វើការប្រកួតប្រជែង និងទាញយកផលប្រយោជន៍ឲ្យបានកាន់តែច្រើនថែមទៀត ក្នុងហេដ្ឋារចនាសម្ព័ន្ធទូរគមនាគមន៍ បច្ចេកវិទ្យាទូរគមនាគមន៍និងព័ត៌មាន។
គួររំលឹកថា មានមេរៀនចំនួន៧ ដែលត្រូវឧទ្ទេសនាមពន្យល់ក្នុងសិក្ខាសាលានេះ ក្នុងនោះមាន ៖ មូលដ្ខានគ្រឹះនៃបទដ្ឋានគតិយុត្តិសម្រាប់គ្រប់គ្រងវិស័យទាំង៣ ដែលស្ថិតក្រោមសមត្ថកិច្ចរបស់ក្រសួង និង មូលដ្ឋានគ្រឹះក្នុងការគ្រប់គ្រងធនធានមនុស្ស និងនីតិវិធីអនុវត្តការងារ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
