នាព្រឹកថ្ងៃទី១០ ខែកញ្ញា ឆ្នាំ២០២០នេះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប សមាជិកសមាជិកាសាខាកាកបាទក្រហមកម្ពុជាខេត្ត រួមនិងមន្ត្រីរាជការ ពុទ្ធបរិស័ទជាច្រើនរូប បានអញ្ជើញដាក់បិណ្ឌវេនទី៨ នៅវត្តទេពពោធិវង្ស ហៅវត្តថ្មី ព្រមទាំងវេរប្រគេនបច្ច័យរបស់សាខាកាកបាទក្រហមកម្ពុជាខេត្តសៀមរាប ចំនួន ៤លាន ៧៧ម៉ឺនរៀល និងទេយ្យវត្ថុមួយចំនួន ដល់ព្រះសង្ឃ ក្នុងឱកាសនោះផងដែរ។
មានប្រសាសន៍នាពេលនោះ លោកជំទាវ ទាង អេង ទៀ សីហា បង្ហាញថា «ភ្ជុំបិណ្ឌ» ជាពិធីបុណ្យដ៏ធំមួយក្នុងចំណោមពិធីបុណ្យប្រពៃណីខ្មែរផ្សេងៗទៀត។ ពិធីបុណ្យនេះដែរ តែងតែត្រូវបានប្រារព្ធឡើងជារៀងរាល់ឆ្នាំ អាស្រ័យដោយប្រទេសជាតិមានសុខសន្តិភាព ដែលជាការដឹកនាំដ៏ឈ្លាសវៃ របស់សម្តេចតេជោ ហ៊ុន សែន នាយករដ្ឋមន្ត្រី ដែលបានធ្វើឲ្យប្រទេសជាតិ មានការអភិវឌ្ឍរីកចម្រើនលើគ្រប់វិស័យ។ ក្នុងនោះដែរ វិស័យពុទ្ធចក្រ ក៏មានការរីកចម្រើន និងមានប្រជាពលរដ្ឋខ្មែរ គោរពប្រតិបត្តិយ៉ាងខ្ជាប់ខ្ជួន នាពេលបច្ចុប្បន្ន។
លោកជំទាវ ក៏បានបញ្ជាក់ថា ការប្រគេនទេយ្យទានទាំងអស់នេះ ដើម្បីជួយសម្រួលដល់ការបដិបត្តិធម៌របស់ព្រះសង្ឃក្នុងទីអារាម ខណៈពិភពលោក ក៏ដូចជាប្រទេសកម្ពុជា បាននិងកំពុងជួបនូវវិបត្តិជំងឺកូវីដ.១៩ ដែលជាហេតុធ្វើឲ្យមានផលប៉ះពាល់ក្នុងជីវភាពពុទ្ធបរិស័ទ និងចង្ហាន់ព្រះសង្ឃប្រចាំថ្ងៃជាដើម។ ជាមួយគ្នានោះ លោកជំទាវ បានក្រើនរម្លឹកដល់បងប្អូនប្រជាពុទ្ធបរិស័ទទាំងអស់ មិនត្រូវធ្វេសប្រហែសពីការការពារខ្លួនពីជជំងឺកូវីដ១៩ឡើយ ព្រោះជំងឺនេះនៅបន្តឆ្លងរីករាលដាលលើពិភពលោកនៅឡើយ ទោះបីចំនួនអ្នកឆ្លងនៅក្នុងប្រទេសយើងមានតិចក្តី តែយើងត្រូវបង្កើនការយកចិត្តទុកដាក់ខ្ពស់ និង ត្រៀមទប់ស្កាត់គ្រប់ពេលវេលា ដោយត្រូវធ្វើអនាម័យដៃឲ្យបានជាប្រចាំ ដើមី្បការពារអាយុជីវិតសម្រាប់ខ្លួនឯងផ្ទាល់ និង ក្រុមគ្រួសារ ក៏ដូចក្នុងសហគមផងដែរ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
