នៅព្រឹកថ្ងៃទី១១ ខែកញ្ញា ឆ្នាំ២០២០នេះ ក្រុមការងារបច្ចេកទេស របស់គណៈកម្មការអន្តរក្រសួង ដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែនៅក្នុងក្រុងសៀមរាប បានចាប់ផ្ដើមបើកកិច្ចប្រជុំពិភាក្សាលើកទី១ របស់ខ្លួន ជាមួយរដ្ឋបាលខេត្តសៀមរាប បន្ទាប់ពីសេចក្ដីសម្រេចដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ផ្ដល់ថវិកា១៥០លានដុល្លារអាមេរិច សម្រាប់គម្រោងនេះ។
ក្នុងកិច្ចប្រជុំនេះ ឯកឧត្តម ទៀ សីហា អភិបាលខេត្តសៀមរាប បានលើកទឹកចិត្តដល់មន្ត្រីជំនាញខេត្ត លោកអភិបាលក្រុង និងតំណាងអាជ្ញាធរជាតិអប្សរា បង្ហាញនូវទីតាំងផ្លូវសំខាន់ៗក្នុងក្រុង ជូនក្រុមការងារបច្ចេកទេស ដើម្បីពិភាក្សា និងវាយតម្លៃ ធ្វើយ៉ាងណាកាត់បន្ថយផលប៉ះពាល់នានា និងផ្ដល់នូវគុណប្រយោជន៍ដល់ប្រជាពលរដ្ឋបន្ទាប់ពីបញ្ចប់គ្រោង។
ក្នុងកិច្ចប្រជុំពិភាក្សា ស្តីពីគម្រោងអភិវឌ្ឍន៍ ហេដ្ឋារចនាសម្ព័ន្ធផ្លុវថ្នល់ ក្នុងក្រុងសៀមរាប ចំនួន៣៨ខ្សែនេះ ឯកឧត្តម យិត ប៉ុណ្ណា រដ្ឋលេខាធិការក្រសួងសាធារណការនិងដឹកជញ្ជូន និងជាប្រធានក្រុមការងារ បញ្ជាក់ថា ៖ ជុំវិញការងារសិក្សាគម្រោងនេះ ប្រការដែលចាំបាច់បំផុតនោះគឺ ត្រូវពិនិត្យស្ថេរភាពផ្លូវថ្នល់ រក្សាបរិស្ថានធម្មជាតិនៃទីក្រុងជាមួយស្ទឹងសៀមរាប ដើម្បីសាកសមជាទីក្រុងវប្បធម៌ ប្រវត្តិសាស្រ្ត សម្រាប់ទាក់ទាញភ្ញៀវទេសចរជាតិ-អន្តរជាតិ ព្រមទាំងគិតគូរសុខុមាលភាពប្រជាពលរដ្ឋ ក្នុងតំបន់នៃគម្រោង។
នៅក្នុងកិច្ចប្រជុំនោះ ក៏បានបញ្ជាក់ផងដែរថា ស្របអនុសាសន៍របស់ថ្នាក់ដឹកនាំ ផ្លូវទាំង៣៨ខ្សែនេះ មិនត្រូវបានស្ថាបនា ដាច់ដោយឡែកជាកំណាត់ៗនោះទេ តែត្រូវជាបណ្តាញផ្លូវប្រទាក់ក្រឡា សមាហរណកម្មជាមួយនឹងបណ្តាញផ្លូវដែលមានស្រាប់ ដើម្បីសម្រួល និងរំដោះលំហូរចរាចរណ៍នៃយានយន្តក្នុងក្រុង ដែលត្រូវកើនឡើងនាពេលខាងមុខ។ គម្រោងអភិវឌ្ឃន៍នេះដែរ ជាចក្ខុវិស័យរបស់ប្រមុខរាជរដ្ឋាភិបាល ដោយរំពឹងទុកជាវិជ្ជមានថា តំបន់អង្គរ-សៀមរាប នឹងទទួលបានភ្ញៀវទេសចរអន្តរជាតិ បានកាន់តែច្រើននាពេលអនាគត ក្រោយវិបត្តិកូវីត១៩។
កិច្ចប្រជុំនេះ ក៏បានបង្ហាញឲ្យដឹងដែរថា គម្រោងនេះត្រូវតែបន្ស៊ីគ្នាជាមួយគម្រោងប្រព័ន្ធលូទឹកកខ្វក់ របស់គម្រោងដៃគូអភិវឌ្ឍ គឺគម្រោងរបស់ធនាគាពិភពលោកនិងកូរ៉េ ដើម្បីធានាបាននូវប្រព័ន្ធចែកដាច់ពីគ្នា រវាងទឹកភ្លៀងនិងទឹកកខ្វក់។
គួរំលឹកដែរថា សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី០៤ ខែកញ្ញា ឆ្នាំ២០២០ បានប្រកាសថានឹងអញ្ជើញ មកកាន់ខេត្តសៀមរាប ដើម្បីបើកការដ្ឋានគម្រោងសាងសង់ផ្លូវ៣៨ខ្សែនេះ ផងដែរ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
