នាព្រឹកថ្ងៃទី១១ ខែកញ្ញា ឆ្នាំ២០២០នេះ លោក ស៊ំ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប បានដឹកនាំមន្ត្រីគម្រោងសុវត្ថិភាពចរាចរណ៍ និងយុវជនស្ម័គ្រចិត្តសាខាកាកបាទក្រហមកម្ពុជាខេត្តសៀមរាប សហការជាមួយនឹងរដ្ឋបាលស្រុកពួក បើកយុទ្ធនាការផ្សព្វផ្សាយ ស្តីពីសុវត្ថិភាពចរាចរណ៍ និងពិការភាព ជូនដល់បងប្អូនប្រជាពលរដ្ឋដែលកំពុងធ្វើចរាចរណ៍នៅតាមដងផ្លូវជាតិលេខ៦ ត្រង់ចំណុចភ្លើងស្តុប មុខផ្សារពួក ក្នុងឃុំពួក ស្រុកពួក ខេត្តសៀមរាប ក្នុងគោលបំណងកាត់បន្ថយអត្រាការស្លាប់ របួស នឹងពិការភាពដោយគ្រោះថ្នាក់ចរាចរណ៍ ។
ក្នុងសកម្មភាពនោះ មន្ត្រីគម្រោងសុវត្ថិភាពចរាចរណ៍ និងយុវជនស្ម័គ្រចិត្តសាខាកាកបាទក្រហមកម្ពុជាខេត្តសៀមរាប បានណែនាំនិងចែកខិតប័ណ្ណពាក់ព័ន្ធគ្រឿងស្រវឹងចំនួន៦០០សន្លឹក នឹងបង្ហាញពីរបៀបមួកពាក់មួកសុវត្ថិភាព ឲ្យបានត្រឹមត្រូវ ដើម្បីជៀសវាងនូវផលប៉ះពាល់ក្នុងការបើកបរក្រោមឥទ្ធិពលគ្រឿងស្រវឹង (ថ្ងៃនេះថ្ងៃស្អែកកុំឱ្យមានគ្រោះថ្នាក់ចរាចរណ៍) និងបិតស្ទិកខ័រចំណាំងផ្លាតជនពិការផងដែរ។
លោក ថាន់ ហឹក អភិបាលរងស្រុកពួក និងជាអនុប្រធានគណ:កម្មាធិការ អនុសាខាកាកបាទក្រហមកម្ពុជាស្រុកពួក មានប្រសាសន៍ថា ដើម្បីរួមគ្នាកាត់បន្ថយការស្លាប់ និងរបួសដោយសារគ្រោះថ្នាក់ចរាចរណ៍នោះ សូមឲ្យបងប្អូនប្រជាពលរដ្ឋដែលធ្វើដំណើរឆ្លងកាត់ទៅមកតាមបណ្តាផ្លូវនានា ធ្វើយ៉ាងណាធានាឲ្យបាននូវការគោរពច្បាប់ចរាចរណ៍ ដោយនៅពេលបើកបរត្រូវពាក់មួក និងពាក់ខ្សែក្រវ៉ាត់សុវត្ថិភាពឱ្យបានជាប់ជាប្រចាំ បើកបរទៅតាមល្បឿនកំណត់ គោរពស្លាកសញ្ញាតាមដងផ្លូវជាដើម ជាពិសេសសូមឲ្យអ្នកបើកបរយាយន្តគ្រប់ប្រភេទ ពេលមកដល់ជិតសាលារៀន មន្ទីរពេទ្យ និងទីប្រជុំជននានា ត្រូវបន្ថយល្បឿន ។
លោកវរសេនីយ៍ឯក ទេព ពុំសែន អធិការ នៃអធិការដ្ឋាននគរបាលស្រុកពួក បានបង្ហាញថា បច្ចុប្បន្ននេះ បញ្ហាគ្រោះថ្នាក់ចរាចរណ៍ គឺជាបញ្ហាប្រឈមដ៏ធំរបស់ប្រទេសកម្ពុជា វាបានសម្លាប់មនុស្សជារៀងរាល់ថ្ងៃ បានធ្វើឱ្យបាត់បង់ធនធានមនុស្ស បានធ្វើឲ្យមានប៉ះពាល់ដល់សេដ្ឋកិច្ចប្រទេសជាតិ និងខូចខាតសណ្តាប់ធ្នាប់សង្គម គឺបណ្តាលមកពីអ្នកប្រើប្រាស់ផ្លូវមិនគោរពច្បាប់ចរាចរណ៍ បើកបរក្រោមឥទ្ធិពលគ្រឿងស្រវឹង បើកបរហួសល្បឿនកំណត់ និងមិនពាក់មួកសុវត្ថិភាព នៅពេលធ្វើដំណើរផងដែរ ហើយសម្រាប់ស្រុកពួក គិតចាប់តាំងពីដើមឆ្នាំ២០២០រហូតមកដល់ពេលនេះ បញ្ហាគ្រោះថ្នាក់ចរាចរណ៍ បានកើនឡើងចំនួន១២ ករណី ក្នុងនោះបណ្តាលឲ្យមនុស្សស្លាប់ចំនួន ១៥នាក់ , រងរបួសធ្ងន់ចំនួន ៥នាក់ និង របួសស្រាលចំនួន ៤នាក់ ព្រមទាំងមានកេខូចខាតយានយន្ត និង ទ្រព្យសម្បត្តិផងដែរ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
