នៅព្រឹកថ្ងៃទី១១ ខែកញ្ញា ឆ្នាំ២០២០នេះ ឯកឧត្ដម កុយ សង សមាជិកក្រុមប្រឹក្សាខេត្តនិងជាតំណាងដ៏ខ្ពង់ខ្ពស់ឯកឧត្តម អ៊ឹង ហឿន ប្រធានក្រុមប្រឹក្សាខេត្ត និង លោក ពៅ ពិសិដ្ឋ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយឯកឧត្ដម លោកជំទាវ លោក លោកស្រី ជាសមាជិក សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពនានាជុំវិញខេត្ត ព្រមទាំងពុទ្ធបរិស័ទ និងប្រជាពលរដ្ឋ បានមូលមតិគ្នាជាឯកច្ឆន្ទកាន់វេនទី៩ នៃពិធីបុណ្យភ្ជុំបិណ្ឌ នៅវត្តវិសុទ្ឋិមគ្គ ស្ថិតក្នុងភូមិបំពេញរាជ្យ ឃុំលាងដៃ ស្រុកអង្គរធំ ។
មានប្រសាសន៍សំណេះសំណាលក្នុងឱកាសនោះ លោក ពៅ ពិសិដ្ឋ អភិបាលរងខេត្ត បានរំលឹកឡើងវិញនូវអតីតកាលដ៏ជូរចត់របស់កម្ពុជាយើង ក្នុងចន្លោះពី១៩៧៥ ដល់ឆ្នាំ១៩៧៩ ដែលប្រវត្តិសាស្ត្រនៃប្រទេសកម្ពុជាយើងក្នុងរយៈពេលនោះ គឺបានធ្លាក់ចុះទៅក្នុងសម័យដ៏ខ្មៅងងឹតនៃរបបកម្ពុជាប្រជាធិបតេយ្យ ដោយពួកវាបានបំបិទសិទ្ធិសេរីភាពរបស់ប្រជាជនគ្រប់បែបយ៉ាង ទាំងខាងជំនឿសាសនា ការដើរហើរ និងការនិយាយស្ដី ចំណែកព្រះសង្ឃវិញក៍ត្រូវបានចាប់ផ្សឹកកជម្លៀសចេញពីវត្ត រីឯអារាមក៍ក្លាយជាទីឃុំឃាំង កាប់សម្លាប់ ឬជាកន្លែងចិញ្ចឹមសត្វ ប្រជាជនត្រូវបានបង្អត់ អាហារ ធ្វើការពលកម្មស្ទើរគ្មានសម្រាក ភ័យព្រួយនឹងការកាប់សម្លាប់គ្រប់ពេលវេលា ។
លោក ពៅ ពិសិដ្ឋ មានប្រសាសន៍ទៀតថា ដោយសារគុណថ្ងៃរំដោះ៧មករា១៩៧៩ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្ចើឲ្យហេដ្ឋារចនាសម្ព័ន្ធរូបវន្ត ទាំងផ្នែកអាណាចក្រនិងពុទ្ធចក្រ ដូចជា ផ្លូវថ្នល់ ស្ពាន ទំនប់ទឹក ប្រឡាយ សាលារៀន មន្ទីរពេទ្យ ស្រះទឹក អណ្តូងទឹកព្រះវិហារ ឧបដ្ឋានសាលា សេនាសនៈ និងពិធីសាសនា នានា ។ល។ ត្រូវបានស្តារ និងអភិវឌ្ឍន៍ឡើងវិញយ៉ាងឆាប់រហ័សនឹកស្មានពុំដល់ ពិសេសព្រះពុទ្ធសាសនាត្រូវបានកំណត់ក្នុងរដ្ឋធម្មនុញ្ញថាជា«សាសនារបស់រដ្ឋ» ប៉ុន្តែអ្វីដែលបានរីកចម្រើនមកដល់ពេលនេះ រួមទាំងអ្វីៗដែលបានរៀបចំនៅពេលនេះ គឺដោយប្រទេសជាតិមានសុខសន្តិភាពពេញលេញ ដូច្នេះក្នុងឱកាសនេះ សូមយើងទាំងអស់គ្នា រួមត្រូវរួមគ្នាជារាជរដ្ឋាភិបាល ក្នុងការថែរក្សា និង ការពារសុខសន្តិភាពនេះ ឲ្យស្ថិតស្ថេរជារៀងរហូត ។
ព័ត៌មានជាតិ ថ្មីៗ
លោក ពៅ ពិសិដ្ឋ មានប្រសាសន៍បន្ថែមថា រដូវបុណ្យភ្ជុំបិណ្ឌក្នុងឆ្នាំនេះ ប្រព្រឹត្តិទៅជាមួយនឹងស្ថានភាពនៃការឆ្លងរាលដាលជាសកលជំងឺកូវីដ១៩ ដែលនាំឱ្យប៉ះពាលយ៉ាងធ្ងន់ធ្ងរដល់វិស័យសេដ្ឋកិច្ច វិស័យទេសចរណ៍ ប៉ុន្តែកម្ពុជាអាចទប់ទល់បានជាមួយវិបត្តិកូវីដ១៩ ខណៈពេលដែលពិភពលោកកំពុងទទួលនូវការកៀបសង្កត់យ៉ាងធ្ងន់ធ្ងរដោយជំងឺកូវីត១៩ ដែលក្នុងកាលៈទេសៈនេះ រាជរដ្ឋាភិបាលបានអនុញ្ញាតឲ្យប្រជាពុទ្ធសបរិស័ទ ប្រើប្រាស់ឱកាសនេះបានប្រារព្ធបុណ្យភ្ជុំបិណ្ឌ ក៏ប៉ុន្តែយើងកុំភ្លេចការពារពីការឆ្លងរបស់ជំងឺដ៏កាចសាហាវនេះ ព្រោះយើងអាចភ្លេចកូវីដ១៩តែកូវីដ១៩មិនភ្លេចយើងទេ ដូច្នេះត្រូវនាំគ្នាអនុវត្តតាមវិធានសុវត្ថិភាពដែលណែនាំដោយក្រសួងសុខាភិបាល ដូចជាលាងដៃនឹងសាប៊ូ ឬអាល់កុល ឬជែល , ពាក់ម៉ាស៊់ និងរក្សាគម្លាតសុវត្ថិភាព ។
គួររំលឹកថា ពិធីកាន់បិណ្ឌ ឬដាក់បិណ្ឌ និងភ្ជុំបិណ្ឌ គឺដើម្បីទំនុកបម្រុងបច្ច័យ៤ ចំពោះព្រះសង្ឃ ដែលគង់ចាំវស្សាក្រោមគោលបំណងធំៗ ៣យ៉ាងគឺ ៖១- ដើម្បីតបសងគុណ ឧទ្ទិសកុសលទៅឱ្យបុព្វការីជន ដែលបានចែកឋានទៅកាន់លោកខាងមុខហើយ , ២-ដើម្បីយើងបានធ្វើបុណ្យកុសល សន្សំសេចក្តីសុខ សេចក្តីចម្រើន សម្រាប់ខ្លួនយើងម្នាក់ៗ ហើយយើងបានបុណ្យទៅដល់អ្នក មានគុណរបស់យើង និងបានចូលមកអប់រំខ្លួនយើង ក្នុងនាមអ្នកកាន់ព្រះពុទ្ធសាសនា , និង ៣-ដើម្បីបង្កើតសាមគ្គីធម៌ រវាងព្រះពុទ្ធសាសនា និងពុទ្ធបរិស័ទនៅជិតឆ្ងាយ ជាពិសេសរដ្ឋបាលខេត្តសៀមរាប បានទៅវត្តធ្វើបុណ្យរួមគ្នាជាមួយថ្នាក់ដឹកនាំខេត្ត មន្ទីរ-អង្គភាពជុំវិញខេត្ត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
