ថ្ងៃទី១០ ខែកញ្ញា ឆ្នាំ២០២០ អង្គការមនុស្សចាស់កម្ពុជា បានសហការជាមួយមន្ទីរ សង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប រៀបចំកិច្ចប្រជុំស្តីពី ”យន្តការគាំទ្រមនុស្សចាស់នៅកម្ពុជា“ ជាមួយសមាជិកបណ្តាញមនុស្សវ័យចាស់នៅកម្ពុជា រួមមានតំណាងសមាគមមនុស្សចាស់ និងអង្គការសង្គមស៊ីវិលចំនួន១៨ ស្ថាប័ន មកពីរាជធានី-ខេត្តចំនួន ៦ រួមទាំងខេត្តសៀមរាប សរុបចំនួន៤៥នាក់។
គោលបំណង នៃកិច្ចប្រជុំនេះ គឺដើម្បីបញ្ជ្រាបការយល់ដឹងពីក្របខណ្ឌគោលនយោបាយ និងយន្តការគាំទ្រមនុស្សចាស់នៅកម្ពុជា។ មួយវិញទៀត កិច្ចប្រជុំនេះ ក៏នឹងស្វែងយល់ពីស្ថានភាព បញ្ហាប្រឈមរបស់មនុស្សចាស់ ក្នុងសហគមន៍របស់ពួកគាត់ ការប្រព្រឹត្តទៅរបស់បណ្តាញមនុស្សវ័យចាស់កម្ពុជា ព្រមទាំងស្វែងរកកិច្ចសហការ ដើម្បីដោះស្រាយបញ្ហារបស់មនុស្សចាស់។ កិច្ចប្រជុំរបស់បណ្តាញមនុស្សវ័យចាស់កម្ពុជានេះដែរ ធ្វើឡើងនៅរៀងរាល់៣ខែម្ដង ជាមួយសមាជិកទាំង៦ រាជធានីខេត្ត រួមមាន រាជធានីភ្នំពេញ ខេត្តបាត់ដំបង បន្ទាយមានជ័យ សៀមរាប ពោធិ៍សាត់ និងកំពង់ធំ។
ព័ត៌មានជាតិ ថ្មីៗ
លោក អោ ម៉ៅ ប្រធានមន្ទីរ សង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប លើកឡើងថា៖ មនុស្សចាស់បានដើរតួនាទីយ៉ាងសំខាន់ ក្នុងការផ្តល់ការអប់រំសីលធម៌, ចរិយាធម៌, គុណធម៌ ចាប់តាំងពីកុមារ រហូតដល់មនុស្សគ្រប់វ័យ។ យ៉ាងណាមិញ យើងពុំទាន់មានលទ្ធភាពគ្រប់គ្រាន់ ក្នុងការជួយគាំទ្រទៅដល់សមាគមមនុស្សចាស់ នៅទូទាំងប្រទេសបានច្រើននៅឡើយទេ។
លោក អោ ម៉ៅ បញ្ជាក់ថា៖ រាជរដ្ឋាភិបាលក៏បានបង្កើតនូវគោលនយោបាយថ្មីៗមួយចំនួនដែលគាំទ្រ និងលើកកម្ពស់មនុស្សចាស់ ដូចជា គោលនយោបាយជាតិប្រជាជនឆ្នាំ២០១៦-២០៣០, ក្របខ័ណ្ឌគោលនយោបាយជាតិគាំពារសង្គមឆ្នាំ ២០១៦-២០២៥ គោលនយោបាយថែទាំសុខភាព និងយុទ្ធសាស្រ្តសុខាភិបាលជាតិ សម្រាប់ថែទាំសុខភាពមនុស្សចាស់ ឆ្នាំ២០១៦ ។ ជាពិសេសជាងនេះទៅទៀត គឺ “គោលនយោបាយជាតិស្តីពី មនុស្សវ័យចាស់ ឆ្នាំ២០១៧-២០៣០” ដែលរាជរដ្ឋាភិបាលបានកែសម្រួលពីគោលនយោបាយចាស់ឆ្នាំ២០០៣ ដើម្បីឲ្យឆ្លើយតបទៅនឹងស្ថានភាព និងតម្រូវការរបស់មនុស្សចាស់នាពេលបច្ចុប្បន្ន។
លោកស្រី អ៊ូ វណ្ណដា ប្រធានបណ្តាញមនុស្សវ័យចាស់កម្ពុជា មានប្រសាសន៍ថា៖ បណ្ដាញមនុស្សវ័យចាស់កម្ពុជា បង្កើតឡើងនៅថ្ងៃទី១៣ ខែវិច្ឆិកា ឆ្នាំ២០១៨ ក្រោមជំនួយឧបត្ថម្ភពីរដ្ឋាភិបាលហូឡង់ តាមរយៈគម្រោងវ័យ និងបានចងក្រងឡើងដំបូងបង្អស់នៅកម្ពុជា ក្រោមការគាំទ្រពីអង្គការមនុស្សចាស់កម្ពុជា និងសហការដោយក្រសួងសង្គមកិច្ច អតីតយុទ្ធជន និងយុវនីតិសម្បទា។ បណ្ដាញមនុស្សវ័យចាស់កម្ពុជា គឺជាវេទិកាមួយសម្រាប់សមាគមមនុស្សចាស់ អង្គការមិនមែនរដ្ឋាភិបាល និងស្ថាបន័នានាបានពិភាក្សាគ្នា និងធ្វើកិច្ចការរួមគ្នា ដើម្បីពង្រីក និងបន្លឺសំឡេងរបស់មនុស្សចាស់ ដែលងាយរងគ្រោះ និងលើកកម្ពស់គុណភាពជីវិតមនុស្សចាស់ ជាពិសេសមនុស្សចាស់ ដែលគេបោះបង់ និងមនុស្សចាស់ដែលមានពិការភាព ព្រមទាំងជំរុញដល់ការរួមចំណែក អនុវត្តន៍គោលនយោបាយនានា ប្រកបដោយប្រសិទ្ធភាព ដែលជាប្រយោជន៍ សម្រាប់មនុស្សវ័យចាស់។
គួរជម្រាបថា តាមរយៈរបាយការណ៍ របស់នាយកប្រតិបត្តិ អង្គការមនុស្សចាស់កម្ពុជា បង្ហាញថា តួលេខនៅឆ្នាំ២០១៥ ប្រជាពលរដ្ឋមានវ័យ៦០ឆ្នាំឡើងទៅមានចំនួនប្រមាណ១.៣លាននាក់ ស្មើនឹង៨.៣ភាគរយ នៃចំនួនប្រជាពលរដ្ឋសរុប តាមការព្យាករណ៍ថានៅឆ្នាំ២០៥០ ចំនួនជនវ័យចាស់នៅកម្ពុជា នឹងឈានឡើងប្រហែល៥លាននាក់ស្មើនឹង២១ភាគរយនៃចំនួនប្រជាពលរដ្ឋសរុប។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
