នៅព្រឹកថ្ងៃទី២២ ខែកញ្ញា ឆ្នាំ២០២០នេះ ឯកឧត្តម ទៀ សីហា អភិបាលខេត្តសៀមរាប ធ្វើការបង្ហាញពីស្ថានភាពផ្លូវសំខាន់ៗមួយចំនួន ដល់ ក្រុមការងារគណ:កម្មការអន្តរក្រសួង ដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ ដឹកនាំដោយ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដើម្បីធ្វើការវាយតម្លៃ និងពិភាក្សាបន្ថែម ទៅលើគុណប្រយោជន៍ និងផលប៉ះពាល់អំឡុងពេលអនុវត្តន៍គម្រោង។
ក្នុងដំណើរចុះពិនិត្យស្ថានភាពផ្លូវសំខាន់ៗក្នុងក្រុងសៀមរាបនេះ ក្រុមការងារគណ:កម្មការអន្តរក្រសួង រួមនិងរដ្ឋបាលសាលាខេត្ត បានធ្វើដំណើរដោយរថយន្តពិនិត្យផ្លូវ ផ្លូវហ្សាដឺហ្គោល ផ្លូវកូម៉ៃ កំណាត់ផ្លូវជាតិលេខ៦ ផ្លូវក្រវ៉ាត់ក្រុងសៀមរាប និងផ្លូវសំខាន់ៗមួយចំនួនទៀត។ បន្ទាប់ពីធ្វើដំណើរដោយរថយន្ត ក្រុមការងារ ក៏បានជិះកង់ពិនិត្យមើលស្ថានភាពផ្លូវអមមាត់ស្ទឹងសៀមរាប ដែលជាទីប្រជុំជនក្រុងសៀមរាបផងដែរ។
សូមជម្រាបថា នៅថ្ងៃទី២៣ ខែកញ្ញា ឆ្នាំ២០២០ស្អែកនេះ គណ:កម្មការអន្តរក្រសួង ដើម្បីសិក្សា និងអនុវត្តន៍គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នឹងបើកកិច្ចប្រជុំពិភាក្សា នៅសាលាខេត្តសៀមរាប ដែលដឹកនាំដោយ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណ:កម្មការអន្តរក្រសួងនេះ។
គួររំលឹកថា ផ្លូវ៣៨ខ្សែនេះគម្រោងនឹងចំណាយអស់ថវិកា១៥០លានដុល្លារអាមេរិច ដែលបានសម្រេចដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។ ថវិកានេះដែរ ជាថវិការដ្ឋ ដែលសន្សំបានប្រមាណជាង៦០០លានដុល្លារអាមេរិច សម្រាប់ប្រើប្រាស់ក្នុងការអភិវឌ្ឍប្រទេស។
អត្ថបទ និង រូបថត ៖ បូ សាវី
កែសម្រួលអត្ថបទ ៖ សេង ផល្លី
