នៅរសៀលថ្ងៃទី២២ ខែកញ្ញា ឆ្នាំ២០២០ សាខាកាកបាទក្រហមកម្ពុជាខេត្តសៀមរាប ដឹកនាំដោយលោកជំទាវ ទាង អេង ទៀ សីហា អនុប្រធានគណៈកម្មាធិការសាខា តំណាងឯកឧត្តម ទៀ សីហា ប្រធានគណៈកម្មាធិការសាខា បាននាំយកថវិកាចំនួន ២ម៉ឺនដុល្លារអាមេរិច ប្រគល់ជូនមន្ទីរពេទ្យកុមារអង្គរ ក្នុងក្រុងសៀមរាប ដែលជាមន្ទីរពេទ្យព្យាបាល និងថែទាំសុខភាពទារក និងកុមារកម្ពុជាដោយឥតគិតថ្លៃ ខណៈមន្ទីរពេទ្យមួយ បានបង្ហាញពីការព្រួយបារម្ភក្នុងការរកមូនិធិសម្រាប់ទ្រទ្រង់ដំណើររបស់ខ្លួននៅឆ្នាំ២០២១ខាងមុខ។
ថ្នាក់ដឹកនាំនៃមន្ទីរពេទ្យកុមារអង្គរ បានថ្លែងអំណរគុណយ៉ាងជ្រាលជ្រៅ ដល់សាខាកាកបាទក្រហមកម្ពុជាខេត្តសៀមរាប ក៏ដូចជារាជរដ្ឋាភិបាល សប្បុរសជននានា ដែលតែងតែគាំទ្រ ទាំងកម្លាំងកាយ កម្លាំងចិត្ត ព្រមទាំងថវិកា ដល់មន្ទីរកុមារមួយនេះ ដើម្បីជួយដល់កុមារកម្ពុជា ឲ្យទទួលបានសុខភាពល្អ និងក្លាយទៅជាធនធានរបស់ប្រទេសជាតិនាពេលអនាគត់។
នៅរសៀលដដែលនោះ លោកជំទាវ ទាង អេង ទៀ សីហា អនុប្រធានគណៈកម្មាធិការសាខា ក៏បាននាំយកថវិកាចំនួន ១ម៉ឺនដុល្លារអាមេរិច ប្រគល់ជូនមន្ទីរពេទ្យបង្អែកខេត្តសៀមរាប ក្នុងក្រុងសៀមរាប ដើម្បីចូលរួមលើកកម្ពស់គុណភាពវិស័យសុខាភិបាលក្នុងខេត្ត ខណៈមន្ទីរពេទ្យរដ្ឋមួយនេះ បានដើរតួនាទីយ៉ាងសំខាន់ក្នុងការព្យាបាល និងថែទាំសុខភាពប្រជាពលរដ្ឋនៅទូទាំងខេត្ត ជាពិសេសការខិតខំអស់ពីកម្លាំងកាយចិត្ត ក្នុងប្រយុទ្ធប្រឆាំងនឹងជំងឺកូវីដ១៩នាពេលកន្លងមក។
មានប្រសាសន៍ជារួម លោកជំទាវ ទាង អេង ទៀ សីហា បានបង្ហាញពីអារម្មណ៍រំភើប ដែលលោកជំទាវបានចូលរួមសកម្មភាពក្នុងសកម្មភាពសប្បុរសធម៌ជាច្រើន ក្នុងនាមសាខាកាកបាទក្រហមកម្ពុជាខេត្តសៀមរាប និងជាលក្ខណៈឯកជន ពិសេសការលើកកម្ពស់សុខុមាលទារក កុមារ និងប្រជាពលរដ្ឋក្នុងខេត្តសៀមរាប។ ជាក់ស្ដែង ថវិកាដែលបានប្រគល់ជូនមន្ទីរពេទ្យកុមារអង្គរ និងមន្ទីរពេទ្យបង្អែកខេត្តសៀមរាបនាពេលនេះ គឺទទួលបានពីការជិះកង់សប្បុរសធម៌ អំឡុងកម្មវិធីសម្រាកសៀមរាប កាលពីខែសីហាកន្លងទៅ។
លោកជំទាវ បញ្ជាក់ថា ទោះបីស្ថិតក្នុងវិបត្តិកូវីដ១៩ ថ្នាក់ដឹកនាំ សាខាកាកបាទក្រហមកម្ពុជា ខេត្តសៀមរាប នៅតែបន្តខិតខំស្វែងរកថវិកា ដើម្បីចូលរួមចំណែកគាំទ្រ ដល់សកម្មភាពមនុស្សធម៌ក្នុងខេត្ត ហើយនេះក៏ជាការបង្ហាញពីការយកចិត្តទុកដាក់ខ្ពស់ពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ហើយនេះក៏ជាសកម្មភាពគាំទ្រដល់សម្ដេច ក្នុងនាមជាឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាព ស្ដ្រី និងកុមារផងដែរ។
គួររំលឹកថា នេះជាលើកទី២ហើយ ដែលសាខាកាកបាទក្រហមកម្ពុជាខេត្តសៀមរាប បាននាំយកថវិកា ទទួលបានពីការជិះកង់សប្បុរសធម៌ ក្នុងកម្មវិធីសម្រាកសៀមរាប ដោយលើកទី១ បានប្រគល់ជូនមន្ទីរពេទ្យជ័យវរ្ម័នទី៧ ខេត្តសៀមរាប ចំនួន២៥,០០០ដុល្លារអាមេរិច។
