អគារសម្រាកព្យាបាលជំងឺទូទៅចំនួន១ខ្នង ស្មើនឹង២ជាន់ ដែលស្ថិតក្នុងមន្ទីរពេទ្យបង្អែកខេត្តសៀមរាប អាចដាក់គ្រែអ្នកជំងឺបានជាង១០០គ្រែ ដែលត្រូវបានជួសជុល និងកសាងពង្រីកបន្ថែម ជាអំណោយរបស់លោកជំទាវឧកញ៉ា អគ្គមហាឧបាសិកាកិត្តិបណ្ឌិត សៀង ចាន់ហេង អគ្គនាយិកាក្រុមហ៊ុនហេងអភិវឌ្ឍ ត្រូវបានដាក់សម្ពោធឲ្យប្រើប្រាស់ជាផ្លូវការកាលពីព្រឹកថ្ងៃទី២៣ ខែកញ្ញា ឆ្នាំ២០២០ ក្រោមអធិបតីភាពលោក ពិន ប្រាកដ អភិបាលរងខេត្តសៀមរាប ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានឲ្យដឹងថា អគារសម្រាកព្យាបាលជំងឺដែលកំពុងបើកសម្ពោធដាក់ឲ្យប្រើប្រាស់ជាផ្លូវការនេះ ពីមុនមានតែជាន់ផ្ទាល់ដីទំហំ១៤ម៉ែត្រគុណនឹង១៩ម៉ែត្រប៉ុណ្ណោះ ហើយក្រោយពីការជួសជុល និងកសាងកែលម្អថ្មី អគារមួយនេះត្រូវបានកសាងបន្ថែមពីលើមួយជាន់ថ្មីទៀត និងពង្រីកបានដល់២២ម៉ែត្រគុណនឹង១៩ម៉ែត្រ ដោយចំណាយអស់ថវិកាជាង១៦ម៉ឺនដុល្លារអាមេរិក ដែលអាចដាក់គ្រែទទួលអ្នកជំងឺឲ្យសម្រាកព្យាបាលនៅទីនោះបានចំនួន១១០គ្រែ ខណៈកន្លងមក មន្ទីរពេទ្យបង្អែកខេត្តសៀមរាបនេះ មានគ្រែអ្នកជំងឺសរុបចំនួន៣៧០គ្រែ ប៉ុន្តែការប្រើប្រាស់ជាក់ស្តែងប្រចាំថ្ងៃក្នុងពេលបច្ចុប្បន្ននេះ គឺលើសដល់ចំនួន១០០ភាគរយ ក្នុងនោះចំនួនពី១០ ទៅ ១៥ភាគរយនៃអ្នកជំងឺ គឺមកពីបណ្តាខេត្តផ្សេងៗទៀត ។
លោកជំទាវឧកញ៉ាអគ្គមហាឧបាសិកាកិត្តិបណ្ឌិត សៀង ចាន់ហេង បានលើកឡើងថា អ្វីៗដែលមានទាំងអស់សម្រាប់ថ្ងៃនេះ គឺមិនអាចបំភ្លេចបានទេ នូវការដឹងគុណថ្ងៃ៧មករា១៩៧៩ ដែលជាថ្ងៃផ្តល់កំណើតទី២ដល់ប្រជាជាតិកម្ពុជា និងមិនអាចកាត់ផ្តាច់បាននោះឡើយ ចំពោះពាក្យថា អគុណសន្តិភាព ដែលមានសម្តេចតេជោ ហ៊ុន សែន ជាស្ថាបនិកដ៏ឈ្លាសវ៉ៃ ហើយការថែរក្សាសន្តិភាព គឺជាកត្តាចម្បងសម្រាប់ការធ្វើដំណើរឆ្ពោះទៅរកការអភិវឌ្ឍជាតិ ដែលទាំងនេះគឺជាកាតព្វកិច្ចចូលរួមនៃប្រជាជនកម្ពុជាទាំងមូល ក្នុងធ្លុងមហាសាមគ្គីជាតិ។
លោកជំទាវឧកញ៉ា មានប្រសាសន៍ទៀតថា ក្នុងន័យដឹងគុណ៧មករា សម្រាប់លោកជំទាវផ្ទាល់ មួយផ្នែកនៃការចូលរួមកសាងសង្គមជាតិនោះ វិស័យសុខាភិបាលគឺជាគោលដៅមួយដ៏ធំលោកជំទាវដែលបានសម្រេចចិត្តរួចហើយថា នឹងត្រូវកសាងឲ្យបាននូវអគារសម្រាកព្យាបាលនៃអ្នកជំងឺ សម្រាប់ដាក់ជូនមន្ទីរពេទ្យបង្អែកគ្រប់ខេត្តទូទាំងប្រទេស ក្នុងមួយខេត្ត ឲ្យបានមួយអគារ ដែលមានកម្ពស់ ៥ជាន់ ខណៈគម្រោងនេះ កំពុងត្រូវបានអនុវត្តបានប្រមាណជា៩៥ភាគរយហើយ នៅខេត្តកណ្តាលនិងខេត្តកំពង់ស្ពឺ និងត្រូវបន្តទៅបណ្តាខេត្តផ្សេងៗទៀត ដូច្នេះសម្រាប់មន្ទីរពេទ្យបង្អែកខេត្តសៀមរាប ក៏ត្រូវបានទទួលគម្រោងនេះដែរ លើអគារដែលត្រូវបានជួសជុលកែលម្អកន្លងមក ។
មានប្រសាសន៍ក្នុងឱកាសនោះដែរ លោក ពិន ប្រាកដ អភិបាលរងខេត្តសៀមរាប វាយតម្លៃតម្លៃថា អគារសម្រាកព្យាបាលដែលកំពុងបើកសម្ពោធដាក់ឲ្យប្រើប្រាស់ជាផ្លូវការនេះ ពិតជាត្រូវបាននាំមកនូវអត្ថប្រយោជន៍ដ៏សំខាន់ និងបានជួយបំពេញកង្វះខាតនៃមន្ទីរពេទ្យ ហើយអ្វីដែលសំខាន់ជាងនេះ គឺជាការបើកលទ្ធភាពរបស់មន្ទីរពេទ្យ ក្នុងការជួយសង្គ្រោះសុខភាព និងអាយុជីវិតនៃអ្នកជំងឺ ប្រកបដោយសេវាគុណភាព មិនប្រកាន់ពូជសាសន៍ និងនិន្នាការនយោបាយអ្វីនោះឡើយ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
