បើពុំមានឧបសគ្គ ឬបញ្ហាអ្វីនោះទេ គម្រោងសាងសង់ផ្លូវ៣៨ខ្សែ ក្នុងក្រុងសៀមរាប នឹងចាប់ផ្ដើមដំណើរការ នៅថ្ងៃទី១៦ ខែវិច្ឆិកា ឆ្នាំ២០២០ នេះបើតាមប្រសាសន៍ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង ដើម្បីសិក្សា និងអនុវត្តន៍គម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ ក្នុងក្រុងសៀមរាប ខេត្តសៀមរាប បន្ទាប់ពីបញ្ចប់កិច្ចប្រជុំលើកទី១ នៅថ្ងៃទី២៣ ខែកញ្ញា ឆ្នាំ២០២០ នាសាលាខេត្តសៀមរាប។
យោងតាមសេចក្ដីសម្រេច របស់កិច្ចប្រជុំលើកទី១នេះដែរ ចំណុចផ្លូវជាតិលេខ៦ និងដងស្ទឹងសៀមរាប គឺជាគោលសំខាន់ សម្រាប់ចាប់ផ្ដើមគម្រោង ដោយគិតគូរពីគុណតម្លៃ បរិស្ថាន ធម្មជាតិ សម្រាប់ជាប្រយោជន៍នៃវិស័យទេសចរណ៍។ អំឡុងពេល មុនបើកការដ្ឋាននេះដែរ សម្ដេចប្រធាន បានសម្រេចឲ្យ ក្រុមការងារជំនាញ ដែលពាក់ព័ន្ធ ត្រូវចុះទៅពិនិត្យគ្រប់ផ្លូវតូចធំទាំងអស់បន្ថែមទៀត ដើម្បីឈានដល់ការចុះហត្ថលេខាទទួលការអនុវត្តគម្រោងនេះ។
សម្ដេចប្រធាន ក៏បានបញ្ជាក់ផងដែរថា នៅពេលការចុះពិនិត្យផ្លូវទាំងនោះ រកឃើញថា ដីលំនៅដ្ឋានណា បានសាងសង់ ឬប្រើប្រាស់ដីរបស់រដ្ឋ សូមប្រជាពលរដ្ឋប្រគល់ទីតាំងទាំងនោះជូនរដ្ឋត្រឡប់មកវិញ ដើម្បីធ្វើការអភិវឌ្ឍ និងពុំមានការសងសំណងណាមួយឡើយ។
ព័ត៌មានជាតិ ថ្មីៗ
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
