កាលពីព្រឹកថ្ងៃទី២៤ ខែកញ្ញា ឆ្នាំ២០២០ ព្រះចៅអធិការវត្តព្រះឥន្ទកោសា និងវត្តប្រាសាទគោកចក ក្នុងក្រុងសៀមរាប រួមនិងព្រះចៅអធិការវត្តព្រះអង្គសាងទុក ក្នុងស្រុកអង្គរធំ បាននិមន្តដឹកនាំព្រះសង្ឃ សហការជាមួយមន្ត្រីអាជ្ញាធរជាតិអប្សរា នាំកូនឈើចម្រុះ៥០០ដើម ដាំក្នុងតំបន់ក្រុងអង្គរធំ ដើម្បីបង្ហាញពីគុណតម្លៃព្រៃឈើ ព្រមទាំងចូលរួមរក្សាលំនឹងបរិស្ថាន និងគម្របព្រៃឈើ ក្នុងតំបន់រមណីយដ្ឋានអង្គរ ឲ្យកាន់តែស្រស់បំព្រងបន្ថែមទៀត។
ព្រះសទ្ធម្មប្បកាសនី បណ្ឌិត តាត មហាទី ចៅអធិការវត្តព្រះឥន្ទកោសា មានសង្ឃដីកាថា៖ ការដាំកូនឈើ គឺទទួលបាន អានិសង្ឃទាំងយប់ ទាំងថ្ងៃ ដោយវាបាន ផ្ដល់គុណប្រយោជន៍ធំធេងណាស់ ដល់បរិស្ថាន និង ជីវិត មនុស្សសត្វ លើផែនដី។ ហេតុនេះ គប្បី យើងត្រូវ ចេះស្រឡាញ់ព្រៃឈើ និងចូលរួមថែរក្សាការពារព្រៃឈើទាំងអស់គ្នា និង ឈប់នាំគ្នា កាប់បំផ្លាញ ព្រៃឈើ ដើម្បីតែប្រយោជន៍គ្រួសារ និងក្រុម បក្សពួករបស់ខ្លួន។
លោក ឡុង កុសល ប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរា លើកឡើងថា៖ តំបន់ទេសចរណ៍អង្គរ ជាតំបន់ទេសចរណ៍វប្បធម៌ និងធម្មជាតិ មានន័យថាតំបន់នេះ ត្រូវមានប្រាសាទ រួមនិងព្រៃឈើ ដែលប្រាសាទជាតំណាងវប្បធម៌ជាតិ និងព្រៃឈើតំណាងឱ្យបរិស្ថានធម្មជាតិ។ គោលនយោបាយបរិស្ថាន របស់អាជ្ញាធរជាតិអប្សរា បានកំណត់ច្បាស់ និងអនុវត្តន៍ ឱ្យស៊ីសង្វាក់រវាងធម្មជាតិ ប្រាសាទ និងប្រជាជន ដែលទាំងបីនេះជាកត្តាសំខាន់។
លោកបញ្ជាក់ថា នាពេលអនាគត ដើមឈើទាំងអស់នេះ នឹងដើរតួនាទីយ៉ាងសំខាន់ ក្នុងការទប់កម្លាំងខ្យល់ កុំឱ្យបោកបក់មកលើប្រាសាទ និងជួយរក្សាសំណើម សម្រាប់ចិញ្ចឹមថ្មប្រាសាទ រក្សាលំនឹង និងស្រូបទាញជាតិទឹកពីដើមឈើទៅវិញទៅមក ព្រមទាំងទប់នូវការហូរច្រោះដីផងដែរ។
គិតចាប់ពីដើមឆ្នាំ២០២០ មកដល់ពេលនេះ អាជ្ញាធរជាតិអប្សរា មន្ត្រីរាជការ និងស្ថាប័នអង្គការ ក្រុមហ៊ុនឯកជន បាន ដាំកូនឈើជាច្រើនប្រភេទ នៅតំបន់ព្រៃរិចរឹល នៃឧទ្យានអង្គរបានប្រមាណជិត១០ម៉ឺនដើម ខណៈ គម្រោងដាំកូនឈើចម្រុះជាង១០ម៉ឺនដើម នឹងសម្រេចបានតាមការគ្រោងទុក៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក សេង ផល្លី
