មានប្រសាសន៍ក្នុងពិធីប្រកាសចូលកាន់មុខតំណែងជាអនុប្រធានសាខា ប្រធាននិងអនុប្រធានការិយាល័យ នៃសាខាពន្ធដារខេត្តសៀមរាប នាព្រឹកថ្ងៃទី២៥ ខែកញ្ញា ឆ្នាំ២០២០នេះ លោក លី សំរិទ្ឋ អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានបញ្ជាក់ថា ការប្រកាសចូលកាន់មុខតំណែងនាពេលនេះ គឺជាការបំពេញចន្លោះក្នុងរចនាសម្ព័ន្ធរបស់អង្គភាព ដើម្បីធានាបាននូវ និរន្តរភាពការងារ និងការចាត់តាំងឱ្យមានការទទួលខុសត្រូវក្នុងតួនាទី និងភារកិច្ចដែលអង្គភាពបានប្រគល់ជូន ដូច្នេះត្រូវអនុវត្តតាមតួនាទី និង ភារកិច្ចរបស់ខ្លួន ប្រកបដោយតម្លាភាព គណនេយ្យភាព ប្រសិទ្ធភាព និងប្រសិទ្ធផល ។
លោក លី សំរិទ្ឋ មានប្រសាសន៍បន្ថែមថា បញ្ហាសំខាន់មួយទៀតនោះ គឺត្រូវពង្រឹងនូវសាមគ្គីភាពផ្ទៃក្នុង និងកិច្ចសហការល្អជាមួយមន្ទីរ អង្គភាព និងអាជ្ញាធរមានសមត្ថកិច្ច បង្កើនប្រសិទ្ធភាពគ្រប់គ្រង និង យកអស់ពីសមត្ថភាព និងមនសិកាការងារ ប្រកបដោយតម្លាភាព គណនេយ្យភាព និង អភិបាលកិច្ចល្អ ជាពិសេសត្រូវខិតខំប្រឹងប្រែងអនុវត្តការងារដោយអនុលោមទៅតាមអភិក្រម៤ប្រការរបស់ឯកឧត្តមអគ្គបណ្ឌិតសភាចារ្យ អូន ព័ន្ឋមុនីរ័ត្ន ឧបនាយករដ្ឋមន្ត្រីរដ្ឋមន្ត្រីក្រសួងសេដ្ឋកិច្ចហិរញ្ញវត្ថុ គឺទី១. អនុវត្តការងារដោយវិជ្ជាជីវៈ និងគោរពក្រមសិលធម៌វិជ្ជាជីវៈ , ទី២. អនុវត្តការងារជាក្រុមទៅតាមឋានានុក្រម , ទី៣. អនុវត្តការងារដោយប្រកាន់ខ្ជាប់នូវស្មារតីបុរីសកម្ម តាមរយៈផែនការយុទ្ឋសាស្ត្រប្រតិបត្តិ ផែនការសកម្មភាព ផែនការកៀរគរចំណូល ដើម្បីចៀសវាងភាពឆកល្វែង និងទី៤. មិនត្រូវមើលរំលងកំហុសខ្លួនឯង និង ត្រូវកែតម្រូវកំហុសរបស់ខ្លួនដោយអនុលោមតាមអភិក្រម៥ប្រការរបស់សម្តេចតេជោ ហ៊ុន សែន នាយករដ្ឋមន្ត្រី គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
