អាជ្ញាធរខេត្ដសៀមរាប ជូនដំណឹងឱ្យប្រជាពលរដ្ឋ ដែលមានលំនៅដ្ឋានពាក់ព័ន្ធផ្លូវទាំង៣៨ខ្សែ ត្រូវរុះរើសំណង់ខុសច្បាប់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ដើម្បីបើកផ្លូវឱ្យអាជ្ញាធរ ធ្វើការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ ខ្សែ នៅក្នុងក្រុងសៀមរាប ខេត្តសៀមរាប ដោយកំណត់រយ:ពេល១០ថ្ងៃ ក្នុងការរុះរើរួចរាល់ដោយគិតចាប់ពីថ្ងៃទី២៣ ខែកញ្ញានេះតទៅ។
ការជូនដំណឹងនេះ ក្រោយពេលបញ្ចប់កិច្ចប្រជុំលើក១ នៃគណ:កម្មការអន្តរក្រសួង ដើម្បីសិក្សា និងអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្តសៀមរាប កាលពីថ្ងៃទី២៣ខែកញ្ញាឆ្នាំ២០២០នេះ ដែលដឹកនាំកិច្ចប្រជុំនេះ ដោយសម្ដេចពិជ័យសេនា ទៀ បាញ់ ប្រធានគណកម្មការ។ យោងតាមសេចក្ដីជូនដំណឹងនេះ ដែលចេញផ្សាយកាលពីថ្ងៃទី២៣ ខែកញ្ញានេះថា រដ្ឋបាលខេត្ដ សូមជូនដំណឹងដល់បងប្អូនប្រជាពលរដ្ឋ និងសាធារណជន ជ្រាប ថា៖ បន្ទាប់ពីទទួលបានការអនុញ្ញាតពី សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា សម្រាប់គម្រោងស្ថាបនាហេដ្ឋារចនាសម្ព័ន្ធផ្លូវចំនួន ៣៨ ខ្សែ ក្នុងក្រុងសៀមរាប ក្រុមការងារបច្ចេកទេសរបស់ក្រសួងរៀបចំដែនដី នគរូបនីយកម្ម និងសំណង់, ក្រសួងសាធារណការ និងដឹកជញ្ជូន និងរដ្ឋបាលខេត្តសៀមរាប បានសហការចុះសិក្សាខ្សែផ្លូវ ដែលត្រូវស្ថាបនា និងកែសម្រួល ហើយត្រូវបានគណ:កម្មការនេះ បើកកិច្ចប្រជុំសម្រេចលើគម្រោងស្ថាបនានេះ នាថ្ងៃទី២៣ ខែកញ្ញា ឆ្នាំ២០២០ ដែលគម្រោងហេដ្ឋារចនាសម្ព័ន្ធទាំងនោះត្រូវស្ថាបនានាពេលឆាប់ៗខាងមុខនេះ។ ពាក់ព័ន្ធនឹងខ្សែផ្លូវដែលត្រូវស្ថាបនា និងរៀបចំកែលម្អឡើងវិញឱ្យមានគុណភាព សុវត្ថិភាព សោភណភាព ផាសុខភាព ព្រមទាំងការពារបាននូវបរិស្ថានរស់នៅល្អ ដើម្បីបម្រើឱ្យការធ្វើចរាចរណ៍របស់ប្រជាពលរដ្ឋ ភ្ញៀវទេសចរជាតិ និងអន្តរជាតិ និងការដឹកជញ្ជូននានា រដ្ឋបាលខេត្ត ពិនិត្យឃើញថាមានសំណង់លំនៅដ្ឋាន តូបលក់ដូរ របង និងសំណង់ការផ្សេងៗទៀត របស់បងប្អូនប្រជាពលរដ្ឋមួយចំនួន បានសាងសង់រំលោភ លើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ដែលរដ្ឋបាលខេត្ត បានកំណត់ និងចុះបញ្ជីដីធ្លី មានលក្ខណ:ជាប្រព័ន្ធរួចហើយ ចាំបាច់ត្រូវធ្វើការរុះរើជាបន្ទាន់ ដើម្បីសម្រួលដល់ការងារស្ថាបនាផ្លូវស្របតាមផែនការ ដែលបានគ្រោងទុក។សេចក្ដីជូនដំណឹងដដែលបានបន្ដថា ការរុះរើនេះ ក្នុងគោលបំណងឱ្យការស្ថាបនាហេដ្ឋារចនាសម្ព័ន្ធផ្លូវទាំងនោះ អាចប្រព្រឹត្តទៅបានដោយរលូន និង សម្រេចតាមផែនការ ដូចមានក្នុងផែនទីជូនភ្ជាប់មកជាមួយ។
រដ្ឋបាលខេត្ត សូមជូនដំណឹងដល់បងប្អូនប្រជាពលរដ្ឋ និងសាធារណជន ដែលមានសំណង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ចូលរួម សហការរុះរើសំណង់របស់ខ្លួនដោយខ្លួនឯង ក្នុងរយៈពេល ១០ ថ្ងៃ គិតចាប់ពីថ្ងៃទី២៣ ខែកញ្ញា ឆ្នាំ២០២០ ដល់ថ្ងៃទី០២ ខែតុលា ឆ្នាំ២០២០ ជាកំហិត ហើយមន្ត្រីជំនាញនឹងចុះសហការវាស់វែងជូន ប្រជាពលរដ្ឋ។ ក្នុងករណីពុំបានរុះរើតាមការកំណត់ រដ្ឋបាលខេត្ត និងចាត់ការរុះរើដោយមិនទទួលខុសត្រូវរាល់ការខូចខាត និងបាត់បង់ទ្រព្យសម្បត្តិរបស់បងប្អូនឡើយ។ រដ្ឋបាលខេត្តសៀមរាប សង្ឃឹមយ៉ាងមុតមាំថាបងប្អូនប្រជាពលរដ្ឋ និងសាធារណជន ដែលជាម្ចាស់ សំណង់រំលោភលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប ចូលរួមអនុវត្តដោយធ្វើការរុះរើសំណង់របស់ខ្លួនតាមពេលវេលាកំណត់ខាងលើដោយស្មារតីទទួលខុសត្រូវខ្ពស់ និងសហការអនុវត្តសេចក្តីជូនដំណឹងនេះតាមភារកិច្ចរៀងៗខ្លួន ប្រកបដោយប្រសិទ្ធភាព៕
អត្ថបទ និងរូបភាព: លោក បូ សាវី កែសម្រួលដោយ លីវ សុខុន
