តាមរយៈនៃអង្គសន្និសីទ ស្តីពីបច្ចុប្បន្នភាពរោគកុមារវិទ្យាលើកទី៥ បានបង្ហាញថា សមាគមគ្រូពេទ្យកុមារកម្ពុជា យកចិត្តទុកដាក់លើការងារបណ្តុះបណ្តាល ដើម្បីអភិវឌ្ឍចំណេះដឹងវេជ្ជសាស្រ្ត និងការប្រកាន់យកក្រមសីលធម៌វិជ្ជាជីវៈជាគ្រូពេទ្យ ធ្វើឲ្យប្រសើរឡើងថែមទៀត ការផ្តល់សេវាសុខភាពជូនប្រជាពលរដ្ឋ !
ករណីជម្ងឺគ្រុនឈិក ដែលបានកើតច្រើនលើកុមារនៅក្នុងឆ្នាំ២០២០នេះ និងការព្យាបាលជំងឺរលាកសួតខ្លាំងក្លានៅមន្ទីរកុមារពេទ្យជ័យវរ័្មនទី៧ ករណីយរលាកទងសួតរ៉ាំរ៉ៃ និងបទពិសោធន៍បណ្តុះមេរោគ ដើម្បីធ្វើរោគវិនិច្ឆ័យនៃជំងឺ ដែលបណ្តាលមកពីបាក់តេរីនៅមន្ទីរពេទ្យកុមារអង្គរ ករណីជម្ងឺស្លេកស្លាំងនៃកុមារដោយសារតែកង្វះជាតិដែក ដែលបណ្តាលមកពីកង្វះអាហារូបត្ថម្ភ ដែលរកឃើញនៅមន្ទីរពេទ្យកុមាជាតិ រួមទាំងបទពិសោធន៍នៃការលាងជាតិពុលលើកុមារ ក្នុងករណីដែលកុមារមានជម្ងឺខ្សាយតម្រងនោមស្រួចស្រាល ដែលបានរកឃើញនៅមន្ទីរពេទ្យគន្ធបុប្ផា ទាំងអស់នេះ គឺជារបៀបវារៈដ៏សំខាន់នៅក្នុងប្រធានបទ សម្រាប់សន្និសីទ ស្តីពីបច្ចុប្បន្នភាពរោគកុមារវិទ្យាលើកទី៥នៅកម្ពុជា ដែលបានដំណើរការ និងរៀបចំឡើងដោយសមាគមគ្រូពេទ្យកុមារកម្ពុជា នៅខេត្តសៀមរាប ថ្ងៃទី២៦ ខែកញ្ញា ឆ្នាំ២០២០នេះ។
ឯកឧត្តម សាស្រ្តាចារ្យ យិត ស៊ុនណារ៉ា ប្រធានសមាគមគ្រូពេទ្យកុមារកម្ពុជា មានប្រសាសន៍ថា៖ ការងារបណ្តុះបណ្តាលគឺជាគោលដៅដ៏ធំរបស់សមាគម ហើយសន្និសីទនេះត្រូវបានធ្វើឡើងជាប្រចាំឆ្នាំ ក្នុងគោលបំណងដើម្បីផ្តល់ជាវេទិកាដល់អ្នកឯកទេសផ្នែករោគកុមារទាំងក្នុងប្រទេសនិងក្រៅប្រទេស បានចែករំលែកផ្លាស់ប្តូរបទពិសោធន៍ឲ្យគ្នាទៅវិញទៅមក សម្រាប់ជាទុនអភិវឌ្ឍចំណេះដឹងវេជ្ជសាស្រ្តរោគកុមារ។
ព័ត៌មានជាតិ ថ្មីៗ
ឯកឧត្តមសាស្រ្តាចារ្យ ធា គ្រុយ រដ្ឋលេខាធិការក្រសួងសុខាភិបាល វាយតម្លៃថា៖ រាល់កិច្ចការទាំងឡាយដែលសមាគមគ្រូពេទ្យកុមារកម្ពុជាបានអនុវត្តកន្លងមកនៅតាមបណ្តាខេត្តនានា នឹងក្លាយជាសកម្មភាពគំរូដល់សមាគមគ្រូពេទ្យឯកទេសផ្សេងៗទៀត។ គ្រូពេទ្យពិតជាមានមោទនភាពខ្លាំងណាស់ចំពោះវិជ្ជាជីវៈរបស់ខ្លួន មានមុខរបរទាំងអាចមានជីវភាពសមរម្យ និងទាំងអាចផ្តល់ប្រយោជន៍ ដល់អ្នកដែលបានប្រើសេវាពេទ្យនោះផងដែរ។ ឱកាសដែលគ្រូពេទ្យអាចរកប្រយោជន៍ឲ្យខ្លួនឯងពិតជាមានច្រើនណាស់ នៅពេលដែលមានស្ថានភាពធ្ងន់ធ្ងរ ពាក់ព័ន្ធទៅនឹងអាយុជីវិតរបស់អ្នកជម្ងឺនៅចំពោះមុខ ក៏ប៉ុន្តែបើសិនជាគ្រូពេទ្យ អាចលះបង់ប្រយោជន៍ផ្ទាល់ខ្លួននោះ ដោយការជួយសង្គ្រោះជីវិតអ្នកជម្ងឺ ពេលនោះមហាសំណាងនឹងកើតមានឡើង ទាំងគ្រូពេទ្យនឹងអ្នកជម្ងឺ។
ឯកឧត្តមសាស្រ្តាចារ្យ ក៏បានរំលឹកផងដែរអំពីក្រមសីលធម៌គ្រូពេទ្យ លើការប្រើប្រាស់ពាក្យសំដីដែលមិនមានប្រយោជន៍ នៅពេលជួបប្រទះស្ថានភាពធ្ងន់ធ្ងរនៃអ្នកជម្ងឺ តែគ្រូពេទ្យត្រូវព្យាយាមគ្រប់មធ្យោបាយ ដើម្បីសង្គ្រោះអ្នកជម្ងឺ។
សន្និសីទនេះ ចូលរួមផ្ទាល់ដោយសាស្រ្តាចារ្យ វេជ្ជបណ្ឌិត គ្រូពេទ្យ ដែលជាសមាជិកសមាគមប្រមាណជា១០០នាក់ និងជាង៣០០នាក់ទៀតចូលរួមជាសិក្ខាកាមតាមអនឡាញ ព្រមទាំងមានវាគ្មិន ដែលជាសាស្រ្តាចារ្យ វេជ្ជបណ្ឌិតជំនាញនៃកម្ពុជា ហើយក៏មានវត្តមានវាគ្មិនសំខាន់ៗនៃបណ្តាប្រទេសនៅអ៊ឺរ៉ុប ចូលរួមធ្វើបទបង្ហាញតាមប្រព័ន្ធអនឡាញផងដែរ៕
អត្ថបទ និង រូបថត ៖ លោក ងិន គឹមឡេង
