កាលពីព្រឹកថ្ងៃទី២៧ ខែកញ្ញា ឆ្នាំ២០២០ កម្លាំងនគរបាលប្រឆាំបទល្មើសបច្ចេកវិទ្យា នៃស្នងការដ្ឋាននគរបាលខេត្តសៀមរាប បានឃាត់ខ្លួនយុវជនម្នាក់ ពាក់ព័ន្ធនឹងករណីផ្សព្វផ្សាយព័ត៌មានមិនពិត កាលពីថ្ងៃទី២៦ ខែសីហា ឆ្នាំ២០២០ ដោយបានសរសេរខ្លឹមសារថា “រដ្ឋបាលខេត្តសៀមរាប ចុះរុះរើរបងផ្ទះ ដោយមិនមានការព្រមព្រៀងពីម្ចាស់ផ្ទះជិត ១០០ផ្ទះ” ព្រមទាំងបានកាត់តបញ្ជូលបន្ថែមសម្លេង ស្រែកទ្រហ៊ោយំក្លែងក្លាយ របស់ប្រជាលរដ្ឋផងដែរ។
តាមចម្លើយសារភាព យុវជនខាងលើ បានទទួលស្គាល់ថា រូបគេពិតជាបានធ្វើរឿងនេះពិតប្រាកដមែន ប៉ុន្តែការផ្សព្វផ្សាយលើបណ្ដាយសង្គម Tik Tok នេះ រូបគេគ្រាន់តែចង់បានការចាប់អារម្មណ៍របស់អ្នកទស្សនា មកលើគណនី របស់ខ្លួន និងទទួលបានផលប្រយោជន៍អាជីវកម្មផ្ទាល់ខ្លួនតែប៉ុណ្ណោះ ពុំមានបំណងបំពុលសង្គមនោះទេ។
ក្រោយចម្លើយសារភាពយុវជនខាងលើ ក៏បានធ្វើការសុំទោសជាសាធារណៈ ចំពោះទង្វើដែលខ្លួនបានធ្វើ ចំពោះអាជ្ញាធរខេត្តគ្រប់លំដាប់ថ្នាក់ ជាពិសេសប្រជាពរដ្ឋទាំងអស់នៅក្នុងខេត្តសៀមរាប។ ទន្ទឹមនោះ សមត្ថកិច្ចជំនាញ ក៏បានអញ្ជើញអាណាព្យាបាល ធ្វើកិច្ចសន្យាធានាដល់យុវជនខាងលើ និងអនុញ្ញាតត្រឡប់ទៅគេហដ្ឋានវិញ។
គួរបញ្ជាក់ថា ចំពោះការបើកផ្លូវចាប់ពីចំណុចផ្លូវជាតិលេខ៦ ភ្ជាប់ទៅផ្លូវ ៧មករា រដ្ឋបាលខេត្តសៀមរាប និងប្រជាពលរដ្ឋ ដែលជាម្ចាស់លំនៅដ្ឋាន ដែលរស់នៅអាស្រ័យផលជាប់នឹងផ្លូវដែរត្រូវធ្វើការពង្រីកនោះ គឺសុទ្ធតែបានយល់ព្រម និង ចូលរួមរុះរើដោយស្ម័គ្រចិត្ត ចំពោះរូបភាព ដែលយុវជនខាងលើ យកមកកាត់តបញ្ចូលសំឡេងក្លែងក្លាយនោះ គ្រាន់តែជាសកម្មភាពរបស់អាជ្ញាធរ ជួយដល់ការរុះរើ ស្របតាមការឯកភាព របស់ប្រជាពលប៉ុណ្ណោះ។ ក្នុងនោះដែរ រដ្ឋបាលខេត្ត ក៏ទទូចស្នើសុំឲ្យប្រជាពលរដ្ឋ និងយុវជនទាំងអស់ សូមប្រើប្រាស់បណ្តាញសង្គមឲ្យបានត្រឹមត្រូវ កុំបំភ្លៃការពិត ហើយរដ្ឋបាលខេត្ត នៅតែបន្តយកចិត្តទុកដាក់ខ្ពស់ចំពោះសាធារណៈមតិ ដែលលើកឡើងនូវសំណូមពរ បញ្ហាប្រឈម ដោយមានមូលដ្ឋានច្បាស់ ដើម្បីរដ្ឋបាលខេត្ត មានលទ្ធភាពដោះស្រាយ និងឆ្លើយតបបានទាន់ពេលវេលា ៕
អត្ថបទ និង រូបថត ៖ លោក អ៊ុន ណារាជ្យ
កែសម្រួលអត្ថបទ ៖ លោក សេង ផល្លី
