នៅព្រឹកថ្ងៃទី២៨ ខែកញ្ញា ឆ្នាំ២០២០នេះ វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន សហការជាមួយមន្ទីរប្រៃសណីយ៍និងទូរគមានគមន៍ខេត្តសៀមរាប បានរៀបចំបើកវគ្គបណ្តុះបណ្តាលជំនាញឌីជីថលចាំបាច់ (Digital Skill Essential) ជូនដល់មន្ត្រីរាជការចំនួន២៥នាក់នៅតាមមន្ទីរនានាក្នុងខេត្តសៀមរាប មានរយៈពេល៦ថ្ងៃដោយគិតចាប់ពីថ្ងៃទី២៨ ខែកញ្ញា ដល់ថ្ងៃទី០៣ខែតុលាឆ្នាំ២០២០ ។
លោក ជា វិចិត្រ ប្រធានមជ្ឈមណ្ឌលបណ្តុះបណ្តាល ជំនាញវិជ្ជាជីវៈ នៃវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន បានមានប្រសាសន៍ថា វិទ្យាស្ថានជាតិនេះ គឺជាគ្រឺះស្ថានឧត្តមសិក្សាឯកទេសទូរគមនាគមន៍ និងបច្ចេកវិទ្យាព័ត៌មាន តែមួយគត់នៅកម្ពុជា ដែលបង្កើតឡើងដោយក្រសួងប្រៃសណីយ៍ និងទូរគមនាគមន៍ កំពុងតែផ្ដល់ការបណ្ដុះបណ្ដាលថ្នាក់បរិញ្ញាបត្រ ពាណិជ្ជកម្មអេឡិចត្រូនិក ទូរគមនាគមន៍ និងបណ្ដាញ និង វិទ្យាសាស្ត្រកុំព្យូទ័រ ដែលជាជំនាញមានតម្រូវការខ្ពស់ក្នុងទីផ្សារការងារនាយុគសម័យសេដ្ឋកិច្ចឌីជីថល និងបដិវត្តន៍ឧស្សាហកម្មជំនាន់ទី ៤ ផងដែរ។
លោក សុខ សីហា ប្រធានមន្ទីរប្រៃសណីយ៍និងទូរគមានគមន៍ខេត្តសៀមរាប មានប្រសាសន៍ថា ការបើកវគ្គបណ្តុះបណ្តាលជំនាញឌីជីថលចាំបាច់ (Digital Skill Essential) នាពេលនេះ មានគោលបំណងសំខាន់ គឺផ្ដល់ការពង្រឹងសមត្ថភាពបន្ថែមដល់មន្ត្រីការកាត់បន្ថយកម្លាតឌីជីថលនិងចូលរួមចំណែក ជំរុញការប្រើប្រាស់បច្ចេកវិទ្យាគមនាគមន៍ និងព័ត៌មាននៅក្នុងការអភិវឌ្ឍធនធានមនុស្ស ស្របតាមគោលនយោបាយអភិវឌ្ឍន៍វិស័យទូរគមនាគមន៍បច្ចេកវិទ្យាគមនាគមន៍ និងព័ត៌មាន ឆ្នាំ២០២០ ។
លោក សុខ សីហា បានបន្តទៀតថា សិក្ខាមកាមដែលចូលរួមវគ្គបណ្ដុះបណ្ដាលនាពេលនេះ នឹងទទួលបានចំណេះដឹងដូចជា ៖ មូលដ្ឋានអំពីកុំព្យូរទ័រ (ផ្នែកទន់ ផ្នែងរឹង ការគ្រប់គ្រងឯកសារ បណ្ដាញ សុវត្ថិភាពកុំព្យូរទ័រ) . កម្មវិធីសម្រាប់កិច្ចការរដ្ឋបាល (កម្មវិធីអត្ថបទ បញ្ជីគណនេយ្យ និងការធ្វើបទបង្ហាញ), អក្ខរកម្មព័ត៌មាននិងទិន្នន័យ សុវត្ថិភាពប្រព័ន្ធព័ត៌មាន និងសន្តិសុខបច្ចេកវិទ្យាគមនាគមន៍និងព័ត៌មាន និង និន្នាការបច្ចេកវិទ្យាសម្រាប់សេដ្ឋកិច្ចឌីជីថល (ពាណិជ្ជកម្មអេឡិចត្រូនិច សេវាកម្មហិរញ្ញវត្ថុឌីជីថល ) ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
