នាព្រឹកថ្ងៃទី២៩ ខែកញ្ញា ឆ្នាំ២០២០ ក្នុងក្រុងសៀមរាប ឯកឧត្តម ហេង ណារ៉េត អនុរដ្ឋលេខាធិការ ក្រសួងបរិស្ថាន បានអញ្ជើញបើកសិក្ខាសាលាផ្សព្វផ្សាយ ស្តីពីការអនុវត្តពិធីសារ ម៉ុងរ៉េអាល់នៅកម្ពុជា ដើម្បីចូលរួម អបអរសាទរទិវាអូហ្សូនពិភពលោក ១៦ កញ្ញា ២០២០ ក្រោមប្រធានបទ “អូហ្សូនសម្រាប់ជីវិត ៣៥ឆ្នាំ នៃកិច្ចការពារស្រទាប់អូហ្សូន” ដោយមានការចូលរួមពី លោក ចឹក គឹមជុន នាយករងរដ្ឋបាលសាលាខេត្តសៀមរាប លោក ស៊ុន គង់ ប្រធានមន្ទីរបរិស្ថានខេត្តសៀមរាប ព្រមទាំងឯកឧត្តម លោក លោកស្រី មកពីតាមបណ្តាមន្ទីរអង្គភាពផ្សេងៗ ជាច្រើនរូប។
ថ្លែងក្នុងឱកាសនោះ ឯកឧត្តម អនុរដ្ឋលេខាធិការ លើកឡើងថា នៅឆ្នាំ១៩៨៥ សហគមន៍អន្តរជាតិបាន ពិភាក្សាអនុម័តអនុសញ្ញានៅទីក្រុងវីយ៉េន ស្តីពីកិច្ចការពារស្រទាប់អូហ្សូន បន្ទាប់មកពិធីសារម៉ុងរ៉េអាល់ ស្តីពីសារធាតុបំផ្លាញស្រទាប់អូហ្សូន បានបង្កើតនៅឆ្នាំ១៩៨៧ ដែលបានផ្តល់សច្ចាប័នជាសកល ពី១៩៧ប្រទេស ក្នុងនោះប្រទេសកម្ពុជាក៏បានផ្តល់សច្ចាប័ននៅថ្ងៃទី២៧ ខែមិថុនា ឆ្នាំ២០០១ផងដែរ។ ដើម្បីចូលរួមដោះស្រាយ ការធ្លុះធ្លាយស្រទាប់អូហ្សូនបណ្តាលមកពីការបញ្ចេញញសារធាតុគីមី ដែលមានផ្ទុកនៅសារធាតុក្លរ និងប្រូម ទៅបំផ្លាញស្រទាប់អូហ្សូន និងផលប៉ះពាល់ធ្ងន់ធ្ងរ ចំពោះសុខភាពមនុស្ស សត្វ និងបរិស្ថាន ជារៀងរាល់ឆ្នាំ លេខាធិការដ្ឋានអូហ្សូននៃអង្គការកម្មវិធីបរិស្ថានសហប្រជាជាតិបានកំណត់យកថ្ងៃទី ១៦ ខែកញ្ញា ជាថ្ងៃប្រារព្ធខួប «ទិវាអូហ្សូនពិភពលោក” ចាប់តាំងពីឆ្នាំ១៩៩៥ រហូតមក។
ក្នុងនោះដែរ បើតាមសារលិខិតអបអរសាទរ ទិវាអូហ្សូនពិភពលោក១៦ កញ្ញា របស់ក្រសួងបរិស្ថាន កាលពីថ្ងៃទី១៤ ខែកញ្ញា ឆ្នាំ២០២០ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បង្ហាញថា នាមរដ្ឋភាគី រាជរដ្ឋាភិបាលកម្ពុជាបានបញ្ឈប់ការប្រើប្រាស់សារធាតុ ក្លរ៉ូភ្លុយអរ៉ូកាបូនទាំងស្រុងក្នុងឆ្នាំ២០១០ ហើយកម្ពុជាក៏កំពុងបន្តអនុវត្តផែនការគ្រប់គ្រងសារធាតុ ហាយដ្រូក្លរ៉ូភ្លុយអរ៉ូកាបូន ស្របតាមកាតព្វកិច្ចរបស់ពិធីសារម៉ុងរ៉េអាល់ផងដែរ។ ទន្ទឹមនឹងនេះ កម្ពុជា នឹងបន្តគាំទ្រនិងអនុវត្ដន៍វិសោធនកម្ម ទីក្រុងគីហ្កាលី នៃពិធីសារម៉ុងរ៉េអាល់ ដែលបានចូលជាធរមាននៅថ្ងៃទី០១ ខែមករា ឆ្នាំ២០១៩ ក្នុងក្តីសង្ឃឹមថាអាចកាត់បន្ថយការកើនកម្ដៅភពផែនដីបានរហូតដល់០.៥អង្សាសេ នៅចុងសតវត្សរ៍នេះ តាមរយៈការត្រួតពិនិត្យ និងកាត់បន្ថយការប្រើប្រាស់ សារធាតុហាយដ្រូភ្លុយអរ៉ូកាបូន។ ក្នុងន័យនេះ កម្ពុជាប្តេជ្ញាបន្តចូលរួមជាមួយសហគមន៍អន្តរជាតិ ក្នុងការអនុវត្តឱ្យបានជោគជ័យនូវរាល់កាតព្វកិច្ចរបស់ខ្លួន សំដៅធានាឱ្យបាននូវប្រសិទ្ធភាពនៃការកាត់បន្ថយ និងការលុបបំបាត់ការប្រើប្រាស់សារធាតុបំផ្លាញស្រទាប់អូហ្សូន និងសារធាតុដែលមានសក្តានុពលនៃការកើនកម្ដៅខ្ពស់។
សារលិខិតនេះ ក៏បានបញ្ជាក់ផងដែរថា ចាប់ពីឆ្នាំ២០០០មក ស្រទាប់អូហ្សូនត្រូវបានភ្ជិតចន្លោះពី១-៣ភាគរយ ក្នុងមួយឆ្នាំ សម្រាប់ប៉ូលខាងជើង ការភ្ជិតទាំងស្រុងនឹងកើតឡើងនៅឆ្នាំ២០៣០ រីឯនៅប៉ូលខាងត្បូងអាចនឹងភ្ជិតទាំស្រុងនៅឆ្នាំ២០៥០ ។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
