មានប្រសាសន៍ក្នុងកិច្ចប្រជុំបូកសរុបលទ្ធផលការងារ ០៩ខែ ឆ្នាំ២០២០ និងលើកទិសដៅបន្តរបស់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប នាថ្ងៃទី២៩ ខែកញ្ញា ឆ្នាំ២០២០នេះ លោក ង៉ាន់ ភិរុណ អភិបាលរងខេត្តសៀមរាប បានសម្ដែងនូវការកោតសសើរ និងវាយតំលៃខ្ពស់ចំពោះ កិច្ចខិតខំប្រឹងប្រែងរបស់ថ្នាក់ដឹកនាំ និងមន្រ្តីរាជការទាំងអស់ នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក្នុងការអនុវត្តបេសកកម្ម របស់ខ្លួនក្នុងរយៈពេល០៩ខែ កន្លងមក ដោយទទួលបានលទ្ធផលល្អប្រសើរ ជាពិសេសការកំណត់បាននូវបញ្ហាប្រឈម ដំណោះស្រាយ និង ការលើកទិសដៅសម្រាប់អនុវត្តការងារបន្ត រួមទាំងកំណត់បាននូវមុខសញ្ញាជនល្មើសពាក់ព័ន្ធក្នុងវិស័យរដ្ឋបាលព្រៃឈើ និងជលផល ការចុះអប់រំ និងផ្សព្វផ្សាយដល់ប្រជាពលរដ្ឋនៅតាមមូលដ្ឋាន ដែលមានកិច្ចសហការល្អជាមួយសមត្ថកិច្ចពាក់ព័ន្ធ រួមទាំងអាជ្ញាធរដែនដី ក្នុងការទប់ស្កាត់ និងបង្ក្រាបនូវបទល្មើសព្រៃឈើ និងជលផល ទាំងក្នុងតំបន់អភិរក្ស តំបន់ព្រៃលិចទឹក ក៏ដូចជាតំបន់ ដែលមានសក្តានុពលធនធានធម្មជាតិផ្សេងៗទៀត ។
លោក ង៉ាន់ ភិរុណ មានប្រសាសន៍បន្ថែមថា ទោះជាយ៉ាងនេះក្ដី ដើម្បីអនុវត្តឲ្យកាន់តែមានប្រសិទ្ធភាពនោះ សូមឲ្យមន្ត្រីទាំងអស់ ត្រូវយកចិត្តទុកដាក់ផ្តល់នូវបទពិសោធន៍ ចំណេះធ្វើ ចំណេះដឹងល្អៗ ជាច្រើន សម្រាប់ជាផលប្រយោជន៍នៃវិស័យកសិកម្ម និងរួមចំណែកចែករំលែកបទពិសោធន៍ គំនិត ទស្សនៈ និងកំណត់បញ្ហាប្រឈមនានា ជាអាទិភាព ដើម្បីរៀនសូត្រអំពីការអនុវត្ត ដោយគំនិតច្នៃប្រឌិត ដែលអាចជួយកែលម្អប្រព័ន្ធកសិកម្ម នាពេលអនាគតប្រកប ដោយប្រសិទ្ធផល ។
ក្នុងឱកាសនោះដែរ ឯកឧត្តម ណៅ ធួក រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ដើម្បីលើកកម្ពស់ប្រសិទ្ធភាពការងារ ឲ្យកាន់តែទទួលបានជោគជ័យ សូមឲ្យថ្នាក់ដឹកនាំនិងមន្ត្រីរាជការទាំងអស់ នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ត្រូវយកចិត្តទុកដាក់លើចំណុចមួយចំនួន រួមមាន ៖ ១. ត្រូវផ្សព្វផ្សាយ ណែនាំដល់កសិករក្នុងការរៀបចំដីស្រែឱ្យបានត្រឹមត្រូវតាមបច្ចេកទេស ដើម្បីបង្កលក្ខណៈងាយស្រួលដល់ការដាំដុះ ការគ្រប់គ្រងទឹក និងដីឲ្យបានល្អប្រសើរ ការគ្រប់គ្រងជី និងការកម្ចាត់សមាសភាពចង្រៃ ធ្វើឱ្យដំណាំស្រូវលូតលាស់ល្អ និងផ្តល់ទិន្នផលខ្ពស់ , ២. ជំរុញការផ្លាស់ប្តូរទម្លាប់របស់កសិករពីការប្រើប្រាស់ពូជប្រពៃណី មកជ្រើសរើសប្រភេទពូជស្រូវទំនើប ដែលផ្តល់ទិន្នផលខ្ពស់ មានរយៈពេលខ្លី ដែលសមស្របនឹងក្សេត្របរិស្ថាន ធន់នឹងការប្រែប្រួលអាកាសធាតុ ឆ្លើយតបនឹងតម្រូវការទីផ្សារ , ៣. ពន្លឿនចុះអន្តរាគមន៍ ទប់ស្កាត់ ដោយសហការជាមួយអ្នកពាក់ព័ន្ធក្នុងពេលកសិករជួបគ្រោះរាំងស្ងួត ទឹកជំនន់ សមាសភាពចង្រៃ និងជំងឺឆ្លងសត្វ ដែលត្រូវមានការប្រុងប្រយ័ត្នខ្ពស់បំផុត ក្នុងការប្រើប្រាស់ថ្នាំកសិកម្ម ពោលគឺត្រូវអនុវត្តតាមបទដ្ឋានបច្ចេកទេស និងគោលការណ៍សុវត្ថិភាពឱ្យបានម៉ឹងម៉ាត់ , ៤.ពង្រឹងការអនុវត្តច្បាប់ ទប់ស្កាត់ បង្រ្កាបបទល្មើស ចរាចរសត្វ ព្រៃឈើ និងជលផលគ្រប់ប្រភេទ និងជំរុញការគ្រប់គ្រង និងអភិវឌ្ឍន៍សហគមន៍ព្រៃឈើ និងសហគមន៍នេសាទ , ៥.ពង្រឹងសមត្ថភាពស្រាវជ្រាវ ជាមូលដ្ឋានគ្រឹះដ៏សំខាន់ ដើម្បីជាបទពិសោធន៍ និងស្វែងរករបកគំហើញថ្មីៗ ដើម្បីអនុវត្តការងារក្នុងវិស័យកសិកម្ម រុក្ខាប្រមាញ់ និងនេសាទ ឲ្យទទួលបានលទ្ឋផលល្អប្រសើរ , ៦. គាំទ្រគោលនយោបាយរបស់រាជរដ្ឋាភិបាលកម្ពុជាក្នុងការចូលរួមសហការទប់ស្កាត់ជំងឺកូវីដ-១៩ ដែលបានផ្តល់ថវិកាចំនួន២ពាន់លានរៀល ដល់វិស័យកសិកម្ម ដោយផ្តោតទៅលើវារីវប្បកម្ម ដល់ប្រជាកសិករដែលងាយរងគ្រោះ និង៧. ក្នុងបរិបទឆ្លើយតបទៅនឹងកូវីដ១៩ វិស័យកសិកម្ម រុក្ខាប្រមាញ់ និងនេសាទ បានបង្កើនផលិតភាពកសិកម្ម ការចិញ្ចឹមសត្វ ការគ្រប់គ្រងវិស័យ ព្រែឈើ និងជលផល ៕
ព័ត៌មានជាតិ ថ្មីៗ
អត្ថបទ ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
