មានប្រសាសន៍នៅក្នុងកិច្ចប្រជុំប្រចាំត្រីមាសទី៣ ឆ្នាំ២០២០ ដែលបានធ្វើឡើងនៅសាលាខេត្ត នាព្រឹកថ្ងៃទី២៨ ខែកញ្ញានេះ លោកស្រី យូ សុភា អភិបាលរងខេត្ត និងជាប្រធានលេខាធិការដ្ឋាន នៃគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានលើកឡើងថា ការឆ្លងដែនធ្វើចំណាកស្រុកដោយខុសច្បាប់ នៅតែស្ថិតក្នុងក្តីកង្វល់របស់អាជ្ញាធរ និងស្ថាប័នមានសមត្ថកិច្ច ព្រោះវាជាទម្ងន់បន្ថែមលើដំណោះស្រាយនៃវិបត្តិកូវីដ១៩ ព្រោះថាមកដល់ពេលនេះ ច្រកទ្វារព្រំដែនកម្ពុជា-ថៃ នៅតែបន្តបិទនៅឡើយនោះទេ តែការព្យាយាមឆ្លងដែនធ្វើចំណាកស្រុកខុសច្បាប់របស់ប្រជាពលរដ្ឋខ្មែរដែលទើបនឹងបានធ្វើចំណូលស្រុកនោះ នៅតែបង្កឲ្យមានក្តីកង្វល់ជាបន្តបន្ទាប់ ។
លោកស្រី យូ សុភា បានបញ្ជាក់ទៀតថា មូលហេតុមួយចំនួននៃការលួចឆ្លងដែនធ្វើចំណាកស្រុកជាថ្មីរបស់ពលរដ្ឋខ្មែរទាំងនោះ ក្រៅពីការអូសទាញរបស់ជនខិលខូច ក៏មានមួយចំនួនដែរ ជាពលករស្របច្បាប់ ហើយដែលចេញមកវិញដោយខុសច្បាប់ មិនបានបោះទិដ្ឋាការចេញលើលិខិតឆ្លងដែន ក៏បង្ខំចិត្តត្រឡប់ទៅវិញ ដោយបារម្ភខ្លាចខូចលិខិតឆ្លងដែន នឹងត្រូវសមត្ថកិច្ចចាប់កំហុសបាននោះ ដូច្នេះសូមឲ្យអាជ្ញាធរគ្រប់លំដាប់ថ្នាក់ និង អង្គភាពមានសមត្ថកិច្ច ត្រូវយកចិត្តទុកដាក់លើបញ្ហានេះ ពិសេសត្រូវរកមេខ្យល់ដែលនាំប្រជាពលរដ្ឋឆ្លងដែនដោយខុសច្បាប់ ដើម្បីចាប់យកមកផ្ដន្ទាទោសតាមនីតិវិធីនៃច្បាប់ ។
លោកស្រី យូ សុភា បានបញ្ជាក់បន្ថែមទៀតថា គណៈកម្មាធិការប្រយទ្ធប្រឆាំងអំពើជួញដូរមនុស្សខេត្ត បានសហការជាមួយរដ្ឋបាលខេត្ត រៀបចំកម្លាំងទទួលពលរដ្ឋខ្មែរដែលបានធ្វើចំណូលស្រុកវិញ ប្រចាំការនៅតាមបណ្តាច្រកទ្វារព្រំដែន ដូចជានៅ ប៉ោយប៉ែត ម៉ាឡៃ និងអូរបីជាន់ជាដើម ជាមួយនឹងការអនុវត្តតាមវិធានសុវត្ថិភាព ដែលដាក់ចេញដោយក្រសួងសុខាភិបាល ធ្វើចត្តាឡីស័ក ឧបត្ថម្ភអាហារ ដឹកជញ្ជូនទៅកាន់មូលដ្ឋាន តាមដានសុខភាព បង្ការទប់ស្កាត់រលកទី២ ចូលក្នុងសហគមន៍ ។
គួររំលឹកថា ប្រជាពលរដ្ឋខេត្តសៀមរាប ដែលបានធ្វើចំណាកស្រុកទៅរកការងារធ្វើនៅក្រៅប្រទេសមានចំនួនសរុបជិត ៥៣.០០០នាក់ ក្នុងនេះការធ្វើចំណាកស្រុកដោយស្របច្បាប់មានចំនួនជាង២២.០០០នាក់ ហើយបានធ្វើចំណូលស្រុកត្រឡប់មកវិញមានចំនួនជាង៣ម៉ឹននាក់ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
