សត្វប្រវឹកចំនួន ៣៨២ក្បាល ត្រូវបានកម្លាំងខណ្ឌរដ្ឋបាលព្រៃឈើសៀមរាប សហការជាមួយអាជ្ញាធរស្រុកបន្ទាយស្រី យកទៅព្រលែងចូលក្នុងព្រៃធម្មជាតិ នៅព្រៃសហគមន៍បឹងឈូក ឃុំខ្នារសណ្តាយ ស្រុកបន្ទាយស្រី កាលពីថ្ងៃទី២៧ ខែកញ្ញា ឆ្នាំ២០២០នេះ។
លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានឲ្យដឹងថា សត្វប្រ វឹកទាំងនេះ សមត្ថកិច្ចនគរបាលស្រុកប្រាសាទបាគង បង្ក្រាបបានកាលពីយប់ពីថ្ងៃទី២៦ ខែកញ្ញា ។ លោក បន្តថា បន្ទាប់ពីបង្ក្រាបបាន នគរបាលបានយកមកប្រគល់ឱ្យខណ្ឌរដ្ឋបាលព្រៃឈើសៀមរាប ចាត់ការបន្ត ។
លោកម៉ុង ប៊ុនលីម បន្តទៀតថា សត្វប្រវឹកទាំងនេះមានចំនួន ៣៨២ក្បាល មិនមែនជាង ៥០០ក្បាលនោះទេ ។ ចំពោះការដែលសម្រេចយកមកលែងនៅព្រៃសហគមន៍បឹងឈូកនេះ ដោយសារតែ នៅទីនេះមានអ្នកការពារសត្វព្រៃ បានតឹងតែង ហើយអាជ្ញាធរស្រុកបន្ទាយស្រី ក៏ធ្វើការយាមកាមបានម៉ត់ចត់ផងដែរ។ លោកម៉ុង ប៊ុនលីម ឱ្យដឹងដែរថា កន្លងមករាជរដ្ឋាភិបាល បានចេញច្បាប់ និងលិខិតបទដ្ឋានគតិយុត្តនានា ក្នុងការហាមឃាត់មិនឱ្យប្រមាញ់សត្វព្រៃធ្វើជាអាហារ និងមុខរបរជួញដូរជាដាច់ខាត ដោយបានដាក់ទោសទណ្ឌដល់ប្រព្រឹត្តយ៉ាងធ្ងន់ធ្ងរទៀតផង។
លោកឃឹម ហ្វីណង់ អភិបាលស្រុកបន្ទាយស្រី ក៏បានលើកឡើងផងដែរថា ការព្រលែងសត្វប្រវឹកទាំងជិត៤០០ក្បាលទៅក្នុងព្រៃសហគមន៍បឹងឈូកនេះ វាជាប្រការមួយល្អ ដោយសារនៅក្នុងតំបន់បឹងឈូកនេះ ជាតំបន់មួយធំដែលមានផ្ទៃដីជាង១០០ហិកតា ហើយនៅផ្នែកខាងលើនៃបឹងនេះមានព្រៃអភិរក្សដែលមានការការពារតឹងតែងមិនឲ្យមានការបរបាញ់ឬចាប់សត្វព្រៃឡើយ។ ប៉ុន្តែទោះជាយ៉ាងណា លោកអភិបាលស្រុកនៅមិនទាន់ហ៊ានសន្និដ្ឋានទេថា តើសត្វប្រវឹកទាំងនេះនឹងរើសយកតំបន់បឹងឈូកនេះជាជំរក ឬបន្តដំណើរទៅទីណាទៀតនោះទេ។
គួររំលឹកថា សត្វព្រៃជាច្រើនប្រភេទរួមទាំងសត្វប្រវឹកនេះផងដែរ កំពុងរងការប្រមាញ់យ៉ាងសកម្មពីជនល្មើស ដែលតែងតែចាប់យកមុខរបរប្រមាញ់សត្វព្រៃធ្វើជាអាហារ និងរបរលក់ដូរជាអាជីវកម្មនៅលើទីផ្សារ ដែលធ្វើឲ្យសត្វព្រៃជាច្រើនប្រភេទស្ទើរផុតពូជ ៕
អត្ថបទ និងរូបភាព: លោកខេង ឧត្តម
កែសម្រួលដោយ លីវ សុខុន
