នៅព្រឹកថ្ងៃទី២៥ ខែកញ្ញា ឆ្នាំ២០២០ នាទីស្ដីការក្រសួងព័ត៌មាន មានរៀបចំ កិច្ចប្រជុំស្តីពីដំណើរការ រៀបចំផែនការវិនិយោគលើហេដ្ឋារចនាសម្ព័ន្ធថ្នាល ទូរទស្សន៍ ឌីជីថល ជាតិ (National Digital TV Platform) ក្រោមអធិបតីភាពបើក ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន ។
ការរៀបចំ បង្កើតថ្នាលទូរទស្សន៍ឌីជីថល ជាតិ (National Digital TV Platform)នេះ គឺដើម្បីដោះស្រាយបន្ទារហ្រ្វេកង់ ៧០០MHz សម្រាប់វិស័យទូរគមនាគមន៍ និងផ្លាស់ប្តូរការផ្សាយទូរទស្សន៍ពីប្រព័ន្ធ អាណាឡូក ទៅជាប្រព័ន្ធ ឌីជីថល ឲ្យបានទាន់ពេលវេលា សម្រាប់ធ្វើសមាហរណកម្មទូរទស្សន៍ ឌីជីថល កម្ពុជា ទៅក្នុងតំបន់ និងនៅលើពិភពលោក។ ផែនការវិនិយោគលើហេដ្ឋារចនាសម្ព័ន្ធថ្នាលទូរទស្សន៍ ឌីជីថលនេះ សម្រាប់រយៈពេល បី ឆ្នាំ ដំបូងគឺចាប់ពីឆ្នាំ ២០២១ ដល់ ឆ្នាំ២០២៣ ។
ថ្លែងក្នុងឱកាសនោះ ឯកឧត្តម រដ្ឋមន្រ្តីក្រសួងព័ត៌មាន លើកឡើងថា៖ ការផ្លាស់ប្តូរប្រព័ន្ធផ្សាយ ទូរទស្សន៍ ពីអានណាឡូក ទៅជា ឌីជីថល គឺជាកិច្ចការងារចាំបាច់ដែលកម្ពុជាត្រូវធ្វើ ហើយគម្រោងនេះត្រូវបានលើកឡើងជាច្រើនឆ្នាំមកហើយ នឹងមានបណ្តាប្រទេសមួយចំនួនបាន មកសិក្សាពីកិច្ចការងារនេះផងដែរ។ ក្រោយមក ទើបតែរាជរដ្ឋាភិបាលសម្រេចឲ្យបង្កើត ដោយជំហានដំបូង ត្រូវបង្កើតជាក្រុមការងារអន្តរក្រសួង ។ សម្រាប់ដំណើរការងារ រៀបចំ ទូរទស្សន៍ ឌីជីថល ជាតិនេះ ជំហ៊ានទី១ គ្រោងចំណាយថវិកាអស់ប្រមាណ ៦០ លានដុល្លារអាមេរិច ហើយជំហានបន្តបន្ទាប់ទៀត សរុបជារួមត្រូវចំណាយអស់ប្រមាណ ១៨០ លានដុល្លា ដើម្បីអាចដំណើរការផ្សាយជាផ្លូវការ ទូរទស្សន៍ ឌីជីថល ដែលមានប្រមាណ ៥០ប៉ុស្តិ ផ្សាយចេញនៅទូទាំងប្រទេស។
ឯកឧត្តម រដ្ឋមន្រ្តី បញ្ជាក់ថា៖ នៅពេលទូរទស្សន៍ឌីជីថលនេះដំណើរការ គឺមិនធ្វើឲ្យមានការប៉ះពាល់ដល់វិស័យឯកជន ដែលបានវិនិយោគទុនក្នុងរយៈពេលកន្លងមកនោះទេ ហើយកិច្ចការងារនេះ ជាជម្រើសក្នុង ដំណោះស្រាយឈរលើគោល នយោបាយឈ្នះ ឈ្នះ ទាំងរាជរដ្ឋាភិបាល និងវិស័យឯកជន។ ដូច្នេះកិច្ចប្រជុំក្នុងឱកាសនេះ គឺសម្រេចរៀបចំបង្កើតអនុគណ:កម្មការ សាងសង់អគារ ស្ទូតឌីយ៉ូ អង់តែនទូរទស្សន៍ និង អនុគណ:កម្មការ នីតិកម្មទទួលការងារផ្នែកច្បាប់ ដើម្បីពន្លឿនការងារ បង្កើត ទូរទស្សន៍ឌីជីថល ឲ្យបានរួចរាល់នៅឆ្នាំ២០២៣ មុនដំណើរការ នៃការប្រកួតកីឡាស៊ីហ្គេម ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះ។
គួរជម្រាបថា ការផ្លាស់ប្តូរប្រព័ន្ធផ្សាយ ទូរទស្សន៍ អាណាឡូក ទៅជា ឌីជីថល មុនគេគឺ សហរដ្ឋអាមេរិក នៅឆ្នាំ២០១០ ហើយសម្រាប់ បណ្តាប្រទេសក្នុង អាស៊ាន បានសម្រេចឲ្យហើយនៅមុនឆ្នាំ២០២០ ។ ការផ្លាស់ប្តូរទៅជា ទូរទស្សន៍ ឌីជីថល គឺមាន សារៈសំខាន់សម្រាប់បណ្តាប្រទេសទាំងអស់ ក្នុងការផ្លាស់រូបភាព ឯកសារនានាបានល្អ និង ងាយស្រួល។
អត្ថបទ និង រូបភាព ៖ ក្រសួងព័ត៌មាន
