នៅព្រឹកថ្ងៃទី២៣ ខែកញ្ញា ឆ្នាំ២០២០ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប សហការជាមួយរដ្ឋបាលស្រុកសូទ្រនិគម ធ្វើការបិទផ្សាយជាសាធារណៈ នូវឯកសារវិនិច្ឆ័យការចុះបញ្ជីដីធ្លី មានលក្ខណៈជាប្រព័ន្ធ លើក្បាលដីស្ថិតក្នុងភូមិក្រសារទុំ ភូមិដំដែកថ្មី ភូមិស្រែធ្នង់ និងភូមិបុស្ស ក្នុងបរិវេណ វត្តត្របែកឯករង្សី ភូមិត្របែក ឃុំដំដែក ស្រុកសូទ្រនិគម ខេត្តសៀមរាប។
លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប បង្ហាញថា៖ ការបិទផ្សាយនេះ គឺដើម្បីឲ្យប្រជាពលរដ្ឋ ព្រមទាំងស្ថាប័ន និងអង្គភាពពាក់ព័ន្ធទាំងអស់ ចូលរួមពិនិត្យមើលទិន្នន័យ និងផ្ទៀងផ្ទាត់ ឈ្មោះ សាវតា ទំហំដី ប្រភេទទ្រព្យ ព្រមទាំងការពិនិត្យនៅលើប្លង់សុរិយោដី រួមមានទីតាំងដី និង រូបរាងដី ព្រោះនេះគឺជាឱកាសចុងក្រោយ សម្រាប់ភាគីពាក់ព័ន្ធទាំងអស់ មានសិទ្ធ កែតម្រូវ ឬជំទាស់តវ៉ា។ ក្នុងករណីពិនិត្យឃើញថា មានកំហុសឆ្គង ភាគីពាក់ព័ន្ធត្រូវផ្ដល់ដំណឹងមក គណៈកម្មការរដ្ឋបាល ដើម្បីចៀសវាងវិវាទណាមួយកើតឡើង ក្រោយពីចេញវិញ្ញាបនបត្រ សម្គាល់ម្ចាស់អចលនវត្ថុ ប្លង់រឹងឬ(បណ្ណកម្មសិទ្ធិ)។
លោកអនុប្រធានមន្ទីរ បញ្ជាក់ថា៖ ការបិទផ្សាយនេះ មានរយៈពេល១៥ថ្ងៃ គឺចាប់ពីថ្ងៃទី២៣ ខែកញ្ញា រហូតដល់ថ្ងៃទី០៧ ខែតុលា ឆ្នាំ២០២០ ដោយគិតរួមទាំងថ្ងៃបុណ្យ និងថ្ងៃឈប់សម្រាក។ ក្រោយពីបញ្ចប់ការបិទផ្សាយ ជាសាធារណៈ នូវឯកសារនៃការវិនិច្ឆ័យនេះទៅ គណៈកម្មការរដ្ឋបាល នឹង លើកសំណើជូន ឯកឧត្តមអភិបាលខេត្ត ដើម្បីសម្រេចចេញវិញ្ញាបនបត្រ សម្គាល់ម្ចាស់អចលនវត្ថុ ជូនប្រជាពលរដ្ឋ ដែលជាម្ចាស់ដី និង អ្នកកាន់កាប់ដីរូបណា ដែលបានបំពេញលក្ខខណ្ឌ គ្រប់គ្រាន់ តាមនីតិវិធីច្បាប់ និង ជាក្បាលដីមិនមានទំនាស់។
សូមជម្រាបថា ក្បាលដីក្នុងឃុំដំដែក ដែលបានបិទផ្សាយ ជូនប្រជាពលរដ្ឋ ត្រួតពិនិត្យ និងផ្ទៀងផ្ទាត់នេះ មានចំនួនសរុប ២៥០៣ក្បាលដី ក្នុងនោះ ភូមិក្រសារទុំ ៩៦៩ក្បាលដី ភូមិស្រែធ្នង់ ៦០៨ក្បាលដី ភូមិ ដំដែកថ្មី ៣១៥ក្បាលដី និងភូមិ បុស្ស៦១១ក្បាលដី។
អត្ថបទ និង រូបថត ៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
