ថ្ងៃទី២៤ ខែកញ្ញា ឆ្នាំ២០២០ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប តំណាង ឯកឧត្តម ទៀ សីហា ប្រធានគណៈកម្មាធិការសាខាខេត្ត បានអញ្ជើញប្រគល់ផ្ទះ១ខ្នង ជូនលោកតា វឿន ឡុក អាយុ៨៣ឆ្នាំ ជាជនពិការ និងភរិយា រស់នៅភូមិក្រឡាញ់ ឃុំក្រឡាញ់ ស្រុកក្រឡាញ់ ខេត្តសៀមរាប។
មានប្រសាសន៍ក្នុងឱកាសនោះ លោកជំទាវអនុប្រធានគណៈកម្មាធិការសាខា បាននាំយកការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចតែងតែយកចិត្តទុកដាក់ខ្ពស់ ចំពោះសុខទុក្ខប្រជាពលរដ្ឋគ្រប់រូប ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចទិសស្លោកលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ។
ជាមួយនោះ លោកជំទាវ ក៏បាននាំយកអំណោយមនុស្សធម៌បន្ថែមប្រគល់ជូនគ្រួសារលោកតា វឿន ឡុក នូវ មុង២ ភួយ២ សារុង២ ក្រមា២ កន្ទេល២ អង្ករ៦០គ.ក មី២កេស ត្រីខ២យួរ ធុងទឹក២ អាវយឺត១០ សម្ភារៈផ្ទះបាយមួយចំនួន និងថវិកា៤សែនរៀល។ សម្រាប់គ្រួសារនេះដែរ ប្រតិភូអមដំណើរ ក៏បានឧបត្ថម្ភបន្ថែមនូវថវិកាផ្ទាល់ខ្លួនមួយចំនួនទៀតដែរ។
ក្នុងឱកាសនោះដែរ សាខាកាកបាទក្រហមកម្ពុជាខេត្ត ក៏បាននាំយកអំណោយមនុស្សធម៌ ចែកជូន លោកតា លោកយាយចំនួន២០នាក់ ដោយម្នាក់ៗទទួលបាន៖ អង្ករ១៥គ.ក មី១កេស ត្រីខ១យួរ ក្រមា១ អាវយឺត២ និងថវិកា៤ម៉ឺនរៀល រួមនិងថវិកាបន្ថែមមួយចំនួនទៀតរបស់ប្រតិភូផងដែរ។
សូមបញ្ជាក់ថា ផ្ទះមនុស្សធម៌នេះជា អំណោយមនុស្សធម៌ទី២ របស់សាខាកាកបាទក្រហមកម្ពុជា ខេត្តសៀមរាប ក្នុងអាណត្តិទី៥ និងជាផ្ទះមនុស្សធម៌ទី ៧៤ របស់សាខាកាកបាទក្រហមកម្ពុជា ខេត្តសៀមរាប ក្នុងរយៈពេលកន្លងមក៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
