ដោយមានការគាំទ្រពីអាជ្ញាធរជាតិអប្សរា កាលពីរសៀលថ្ងៃទី២២ ខែកញ្ញា ឆ្នាំ២០២០ម្សិលមិញនេះ ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ និងជាសមាជិកថេរសភាសង្ឃនៃព្រះរាជាណាចក្រកម្ពុជា និង ព្រះធម្មសិរី អភាករោ ជុំ គឹមឡេង ព្រះសុមង្គលសិលាចារ្យ មេគណខេត្តសៀមរាប បានដឹកនាំព្រះសង្ឃ ជាព្រះអនុគណ ព្រះចៅអធិការ តាមបណ្តាវត្តមួយចំនួនក្នុងក្រុងសៀមរាប និងស្រុកមួយចំនួន នាំយកកូនឈើប្រភេទដើមព្នៅ ចំនួន៨៤ដើម ទៅដាំនៅមុខប្រាសាទអង្គរវត្ត ដោយមានការចូលរួមដាំពីសំណាក់ថ្នាក់ដឹកនាំ និង មន្ត្រីនៃអាជ្ញាធរជាតិអប្សរា ជាច្រើនរូបទៀត ។
ព្រះមហាវិមលធម្ម ពិន សែម សិរីសុវណ្ណោ មានសង្ឃដីកាថា ដើមព្នៅ ជាអម្បូរប្រភេទឈើធំ ដូចប្រភេទឈើធំៗឯទៀតដែរ វាមានតួនាទីជួយការពារបរិស្ថាន ជួយថែរក្សាដំណើរការនៃប្រព័ន្ធអេកូឡូស៊ី ជួយកាត់បន្ថយឥទ្ធិពលជាអវិជ្ជមានពីការប្រែប្រួលអាកាសធាតុ និងទប់ស្កាត់ទឹកជំនន់ ខ្យល់ ព្យុះ ការហូរច្រោះដី គ្រោះរាំងស្ងួត និងជួយស្រួបយកជាតិពុលពីបរិយាកាសជាដើម និងផ្តល់នូវផលអនុផលព្រៃឈើ ជាច្រើនដល់ប្រជាពលរដ្ឋដោយផ្ទាល់ ហើយផ្ការបស់វាមានក្លិនក្រអូបប្រហើរ ប៉ុន្តែបច្ចុប្បន្ននេះ ស្ទើរតែផុតពូជទៅហើយ ព្រោះមិនសូវមានគេនិយមចូលចិត្តដាំ ហើយមាននៅសល់ខ្លះតាមភូមិ តាមគោកចាស់ៗប៉ុណ្ណោះ ហេតុនេះទើបព្រះអង្គនាំយកមកដាំនៅមុខអង្គរនេះ គឺចង់បំផុសដល់ព្រះសង្ឃ និងប្រជាពុទ្ឋបរិស័ទទូទៅឱ្យស្គាល់តម្លៃពីគុណភាពនៃដើមព្នៅ ដែលផ្តល់ប្រយោជន៍ច្រើនយ៉ាងសម្រាប់តម្រូវការរបស់មនុស្សនិងសត្វ ។
ព្រះមហាវិមលធម្ម ពិន សែម សិរីសុវណ្ណោ មានសង្ឃដីកាបន្ថែមថា ដើមព្នៅនេះ ក៏ជារុក្ខជាតិដែលបម្រើប្រយោជន៍ដ៏សំខាន់គ្រប់តម្រូវការ និងជួយសង្គ្រោះដល់មនុស្សសត្វផងទាំងឡាយ រាប់តាំងពីឫស មែក ស្លឹក ដើម ផ្កា ផ្លែ ។ល។ ជាម្ហូប ជាថ្នាំសង្កូវ ជាឱសថព្យាបាលរោគផ្សេងៗ ជាគ្រឿងសង្ហារឹម និងប្រដាប់ប្រើប្រាស់ ជាជំរក ជាអុសដុតចំអិនបាយនិងម្ហូបអាហារ ខណៈបច្ចុប្បន្ននេះ ព្រះអង្គបានបណ្តុះជាង១០០០ដើមសម្រាប់ចែកជូនដាំជាសាធារណៈ ព្រោះវាមានសារៈប្រយោជន៍ជួយទ្រទ្រង់ដល់សុខភាពជាច្រើនមុខ ហេតុនេះគប្បីយើងត្រូវចេះស្រឡាញ់ព្រៃឈើ និងចូលរួមថែរក្សាព្រៃឈើទាំងអស់គ្នា ។
ឯកឧត្ដម ហង់ ពៅ អគ្គនាយកនៃអាជ្ញាធរជាតិអប្សរា បានមានប្រសាសន៍ថា អាជ្ញាធរជាតិអប្សរា សូមស្វាគមន៍ចំពោះការដាំដើមឈើក្នុងតំបន់អង្គរ ហើយចំពោះដើមឈើប្រភេទដើមព្នៅនេះ អាជ្ញាធរជាតិអប្សរាគ្រោងនឹងបង្កើតចម្ការព្នៅនៅខាងជើងក្រុងអង្គរធំផងដែរ ដែលមានដើមព្នៅចម្រុះសម្រាប់ឲ្យពលរដ្ឋខ្មែរបានស្គាល់ពីតម្លៃនៃដើមព្នៅនេះ ដោយអាជ្ញាធរជាតិអប្សរាសហការជាមួយព្រះសង្ឃនឹងបណ្ដុះកូនព្នៅនេះអោយបានច្រើន ដើម្បីធ្វើជាចំការមួយនៅក្នុងតំបន់អង្គរនេះ ជាពិសេស អាជ្ញាធរជាតិអប្សរាគ្រោងនឹងដាំដើមគុយនៅក្នុងព្រៃអង្គរថែមទៀត ព្រោះវាបច្ចុប្បន្ននេះប្រឈមនឹងបាត់បង់ដើម្បីឲ្យកូនខ្មែរជំនាន់ក្រោយបានស្គាល់ពីរុក្ខជាតិព្រៃហូបផ្លែនៅក្នុងតំបន់អង្គរ ៕
អត្ថបទ និង រូបថត ៖ លោក យូ វង្ស និង លោក ឈិត សាវី
កែសម្រួលអត្ថបទ ៖ លោក លីវ សាន្ត
