ឯកឧត្តម Antonio Guterres អគ្គលេខាធិការអង្គការសហប្រជាជាតិ បានបង្ហាញថា វិស័យទេសចរណ៍បានផ្តល់ជីវភាពឲ្យមនុស្សរាប់រយលាននាក់នៅលើពិភពលោក ប៉ុន្តែពិតជាក្រៀមក្រំខ្លាំងណាស់ នៅពេលដែលបានឃើញវិស័យទេសចរណ៍ត្រូវបំផ្លាញដោយកូវីដ១៩ ដូច្នេះពេលនេះ ពិតជាមានភាពចាំបាច់បំផុត ដែលត្រូវកសាងវិស័យទេសចរណ៍ឡើងវិញ ក៏ប៉ុន្តែត្រូវស្ថិតក្នុងបរិបទសុវត្ថិភាព សមភាព មិនប៉ះពាល់អាកាសធាតុ និងត្រូវមានការកសាងបទពិសោធន៍ធ្វើដំណើរប្រកបដោយសុវត្តិភាព និងការទទួលខុសត្រូវសម្រាប់សហគមន៍ ម្ចាស់ផ្ទះ អ្នកបំរើការងារ និងអ្នកធ្វើដំណើរ ។
ឯកឧត្តម Antonio Guterres មានប្រសាសន៍យ៉ាងដូច្នេះក្នុងឱកាសដែលបណ្តាប្រទេសជាមាជិកអង្គការទេសចរណ៍ពិភពលោក ត្រូវបានប្រារព្ធខួបអបអរសាទរទិវាទេសចរណ៍ពិភពលោកជាប្រចាំឆ្នាំ ហើយសម្រាប់ឆ្នាំ២០២០នេះ គឺស្ថិតនៅក្រោមប្រធានបទ ទេសចរណ៍ និងការអភិវឌ្ឍជនបទ នាព្រឹកថ្ងៃទី០៣ ខែតុលា ឆ្នាំ២០២០ នៅខេត្តសៀមរាប នៃប្រទេសកម្ពុជា ដែលអង្គការទេសចរណ៍បានជ្រើសរើសយកខេត្តសៀមរាប ដើម្បីប្រារព្ធពិធីអបអរសាទរនេះ។
ក្នុងឱកាសប្រារព្ធខួបអបអរសាទរទិវាទេសចរណ៍ពិភពលោកនេះ ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ បានមានប្រសាសន៍ថា ក្រសួងបានកំណត់ និងដាក់ចេញជាយុទ្ធសាស្រ្ត ជំរុញចលនាទេសចរណ៍ក្នុងស្រុក ដើម្បីចាប់ផ្តើមឡើងវិញវិស័យទេសចរណ៍ក្នុងតំណាក់កាលកូវីដ១៩ ជាមួយនឹងការពង្រឹងសុវត្ថិភាពទេសចរណ៍ជនបទឲ្យកាន់តែសកម្មនិងរឹងមាំ ដោយផ្អែកតាមគោលការណ៍ណែនាំរបស់អង្គការសុខភាពពិភពលោក ហើយក្រសួងទេសចរណ៍ ក៏បានសហការណ៍ជាមួយក្រសួងសុខាភិបាល រៀបចំនិងដាក់ចេញអនុវត្តលើវិធានការសុវត្ថិភាព និងអនាម័យទេសចរណ៍ចំនួន៧ ដូចជាសេវាកម្មភោជនីយដ្ឋាន ម្ហូបអាហារ សណ្ឋាគារ ផ្ទះសំណាក់ ការដឹកជញ្ជូនភ្ញៀវទេសចរ សហគមន៍ និងការិយាល័យទេសចរណ៍ក្នុងស្រុក ។
ឯកឧត្តមបណ្ឌិត ថោង ខុន មានប្រសាសន៍បន្ថែមថា វិធានការទាំងនេះ ត្រូវបានស្ថិតនៅក្រោមចំណាត់ការ និងការអនុវត្តយ៉ាងយកចិត្តទុកដាក់របស់ប្រតិបត្តិករទេសចរណ៍ អាជ្ញាធរមូលដ្ឋាន និងប្រជាពលរដ្ឋប្រកបដោយការទទួលខុសត្រូវខ្ពស់ ជាពិសេសនោះ គឺនៅក្នុងពេលនៃថ្ងៃឈប់សំរាកសងថ្ងៃចូលឆ្នាំខ្មែរ និងថ្ងៃឈប់សំរាកបុណ្យភ្ជុំបិណ្ឌ ដែលមកដល់ពេលនេះ ពុំមានលេចចេញករណីឆ្លងវីរ៉ុសកូវីស១៩នោះឡើយ ហើយជោគជ័យនេះ ក៏ត្រូវបានទទួលការកោតសរសើរពីសំណាក់អង្គការសុខភាពពិភពលោក អង្គការទេសចរណ៍ពិភពលោក និងសហគមន៍អន្តរជាតិនានាផងដែរ ហេតុនេះការបើកទេសចរណ៍ក្នុងស្រុកប្រកបដោយការទទួលខុសត្រូវ និងមានសុវត្ថិភាពយ៉ាងដូច្នេះ វាគឺជាសារដ៏សំខាន់ ក្នុងការកសាងទំនុកចិត្តនិងភាពជឿជាក់ ដែលជាស្នូលនៃការចាប់ផ្តើមឡើងវិញ នៃវិស័យទេសចរណ៍ទាំងមូល។
គួររំលឹកថា នៅក្នុងបរិបទនៃការស្តារឡើងវិញវិស័យទេសចរណ៍ ឆ្ពោះទៅរកភាពរឹងមាំ និងចីរភាពកាន់តែប្រសើរនោះ ឯកឧត្តមបណ្ឌិតរដ្ឋមន្រ្តីក្រសួងទេសចរណ៍ បានបង្ហាញនូវការអបអរសាទរ ដែលថ្មីៗនេះ រាជរដ្ឋាភិបាលបានគាំទ្រនិងអនុម័តលើគម្រោងស្ថាបនាផ្លូវចំនួន៣៨ខ្សែនៅខេត្តសៀមរាប ដែលជាហេដ្ឋារចនាសម្ព័ន្ធទ្រទ្រង់វិស័យទេសចរណ៍មិនអាចខ្វះបាន ហើយជាមួយគ្នានេះដែរ ដោយមានការប្រគល់ភារកិច្ចពីរាជរដ្ឋាភិបាល ក្រសួងទេសចរណ៍ បាននឹងកំពុងរៀបចំកញ្ចប់ផែនការមេអភិវឌ្ឍទេសចរណ៍ខេត្តសៀមរាប ដែលនឹងត្រូវដាក់ឲ្យប្រើប្រាស់ក្នុងពេលឆាប់ៗខាងមុខនេះ ដូចនៅខេត្តមណ្ឌលគិរី និងខេត្តកែប ដែលកំពុងដំណើរការអនុវត្តន៍ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
