រយៈពេល២ថ្ងៃ ចាប់ពីថ្ងៃទី០១ដល់ថ្ងៃទី០២ខែតុលាឆ្នាំ២០២០នេះ ចំនួនអ្នកដែលបានមកចុះឈ្មោះបោះឆ្នោតថ្មី ក្នុងខេត្តសម្រាប់ឆ្នាំ២០២០នេះ មានប្រមាណជាង១ពាន់នាក់ ឬស្មើនឹង ៥ភាគរយ នេះបើតាមរបាយការណ៍របស់គណៈកម្មការរៀបចំបោះឆ្នោតនៅខេត្ដសៀមរាប ក្នុងកិច្ចប្រជុំស្ដីពីការងារសន្ដិសុខ ក្នុងការពិនិត្យបញ្ជីឈ្មោះបោះឆ្នោត និងការចុះឈ្មោះបោះឆ្នោតឆ្នាំ២០២០ នាព្រឹកថ្ងៃទី០៣ ខែកញ្ញា ឆ្នាំ២០២០ នៅលេខាធិការដ្ឋានរៀបចំការបោះឆ្នោត ក្រុងសៀមរាប។
លោក នឹម វ៉ាន់សំ ប្រធានលេខាធិការរៀបចំការបោះឆ្នោត ខេត្ដសៀមរាប បង្ហាញថា កិច្ចប្រជុំនេះ មានគណបក្សនយោបាយចូលរួមចំនួន៧ ដែលមានរបៀបវារៈ ដូចជាការផ្សព្វផ្សាយផែនការសន្ដិសុខ សុវត្ថិភាពសណ្ដាប់ធ្នាប់ របាយការណ៍លទ្ធផលពីការចែកលិខិតអញ្ជើញ ជូនអ្នកមានឈ្មោះ ដើម្បីមកពិនិត្យបញ្ជីចុះឈ្មោះបោះឆ្នោតផ្លូវការឆ្នាំ២០១៩ របាយការណ៍សរុបលទ្ធផលបោះឆ្នោត នៃការធ្វើបច្ចុប្បន្នភាពបញ្ជីឈ្មោះបោះឆ្នោត ការងារពាក់ព័ន្ធនឹងអត្ដសញ្ញាណបណ្ណអស់សុពលភាពរបស់ប្រជាពលរដ្ឋ ព្រមទាំង ការពិនិត្យឈ្មោះបោះឆ្នោត និងការចុះឈ្មោះបោះឆ្នោតសម្រាប់ឆ្នាំ២០២០នេះ។
ក្រៅពីរបៀបវារៈទាំងនេះ គណៈកម្មការរៀបចំបោះឆ្នោតនៅខេត្ដសៀមរាប នឹងប្រមូលយកមតិយោបល់ល្អ ដើម្បីជំរុញឲ្យប្រជាពលរដ្ឋគ្រប់អាយុចុះឈ្មោះបោះឆ្នោត មកចុះឈ្មោះឲ្យបានកាន់តែច្រើន និងសម្រួលដល់ការងារចុះឈ្មោះបោះឆ្នោតនេះ កាន់តែមានភាពល្អប្រសើរ នៅតាមមូលដ្ឋាន។
គួរជម្រាបថា ការចុះឈ្មោះ និងពិនិត្យឈ្មោះបោះឆ្នោត នៅឆ្នាំ២០២០ មានរយៈពេល ១៩ ថ្ងៃ គិតចាប់ពីថ្ងៃទី០១ ខែ ដល់ថ្ងៃទី១៩ ខែតុលា ឆ្នាំ២០២០ សម្រាប់ព័ត៌មានបន្ថែមសូមសាកសួរ អាជ្ញាធរនៅតាមបណ្ដាឃុំសង្កាត់នីមួយៗ។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
