វគ្គបណ្តុះបណ្តាលស្តីពី ក្រមសីលធម៌និងវិជ្ជាជីវ:សារព័ត៌មាន បទ “ក្រមសីលធម៌ និង វិជ្ជាជីវៈសារព័ត៌មាន” រៀបចំឡើងដោយ ក្រសួង ព័ត៌មាន សហការជាមួយក្រុមហ៊ុន ឌីជីថល ស្កាយ ម៉ាល់ឌីមេឌា បានប្រារព្ធបើកនៅ ព្រឹកថ្ងៃទី០៤ ខែតុលា ឆ្នាំ២០២០ នាសាលសត្យា ទីស្តីការ ក្រសួងព័ត៌មាន ក្រោមវត្តមាន អញ្ជើញអធិបតីភាព ឯកឧត្តម ហ៊ីវ ជននាថ រដ្ឋលេខាធិការ និងជាប្រធានគណ:កម្មាធិការ បណ្តុះបណ្តាលវិជ្ជាជីវ:សារព័ត៌មាន និងវិក្រឹតការនៃក្រសួងព័ត៌មាន។
លោក អ៊ុក វរ៉ា នាយកប្រតិបត្តិក្រុមហ៊ុន ឌីជីថល ស្កាយម៉ាល់ឌីមេឌា បានលើកឡើងថា ការដែលក្រសួងព័ត៌មាន និងក្រុមហ៊ុនរៀបចំជាវគ្គបណ្តុះបណ្តាលនេះឡើង ដើម្បីបញ្ជ្រាបការយល់ដឹង បានកាន់តែទូលំទូលាយ និងធ្វើការអោយមានប្រសិទ្ធិភាពសម្រាប់ជាការឆ្លើយតបទៅ និងគុណភាពនៃការផ្សព្វផ្សាយសារព័ត៌មានកាន់តែប្រសើរឡើង និងជម្រុញការផ្សព្វផ្សាយប្រកបដោយវិជ្ជាជីវ: ។ វគ្គបណ្តុះបណ្តាលនេះប្រព្រឹត្តទៅរយះពេល ៥ថ្ងៃ ដោយមានអ្នកសារព័ត៌មាន មកពីតាមបណ្តាអគ្គនាយកដ្ឋានគ្រប់មន្ទីរព័ត៌មានខេត្តរាជធានី និងអ្នកព័ត៌មានមកពីក្រុមហ៊ុនឌីជីថល ស្កាយម៉ាល់ឌីមេឌា សរុបជារួមជិត ១០០នាក់។
ឯកឧត្តម អ៊ីវ ជននាថ មានប្រសាន៏លើកឡើងថា វិស័យព័ត៌មាន គឺជាវិស័យដែលមានទំងន់ធ្ងន់ និងដើរតួយ៉ាងសំខាន់មួយសម្រាប់ការការពារស្ថេរភាពសង្គមសេដ្ឋកិច្ច នយោបាយ និងសន្តិសុខសង្គម។ សារព័ត៌មាន គឺជាដៃគូដ៏សំខាន់នៅក្នុងសង្គមប្រជាធិបតេយ្យ ដើម្បីរួមចំណែកតាមឃ្លាំមើលការអនុវត្តច្បាប់របស់ស្ថាប័នសាធារណៈ និងធ្វើជាស្ពានចម្លងពីរាជរដ្ឋាភិបាលទៅកាន់ប្រជាពលរដ្ឋ និងនាំពីប្រជាពលរដ្ឋមកកាន់រាជរដ្ឋាភិបាល វិញ។ ការអភិវឌ្ឍនៃបច្ចេកវិទ្យា Digital នៅក្នុងយុគសម័យបដិវត្តឧស្សាហកម្មជំនាន់ទី៤ បានធ្វើឱ្យប្រព័ន្ធផ្សព្វផ្សាយព័ត៌មានសម័យថ្មី មានការរីកចំរើនយ៉ាងឆាប់រហ័ស និងមានសក្តានុពលខ្លាំងក្លាក្នុងការប្រកួតប្រជែងទីផ្សារជាមួយសារព័ត៌មានប្រពៃណី នាពេលបច្ចុប្បន្ន ជាមួយនឹងគុណភាពនៃការផ្ទុកទិន្នន័យការក្សាទុកទិន្នន័យការបញ្ជូនទិន្នន័យបានរហ័ស នឹងសមត្ថភាពនៃការផលិតព័ត៌មានដ៏សំបូរបែបបានធ្វើឱ្យបរិមាណនៃប្រព័ន្ធផ្សព្វផ្សាយ ជំនាន់ថ្មីមានការកើនឡើងយ៉ាងគំហុក និងទទួលបាននូវការគាំទ្រពេញនិយមពីសំណាក់ អ្នកប្រើប្រាស់នៅទូទាំងប្រទេសក៏ដូចជានៅក្នុងសកលលោក។
ឯកឧត្តម ហ៊ីវ ជននាថ បានបញ្ជាក់ដែរថា ដោយសារតែការផលិតព័ត៌មាន មានលក្ខណៈសំបូរបែបនេះហើយទើបបង្កើតអោយមានបញ្ហាប្រឈមជាសកលដែលកំពុងកើតមានទាំងនៅក្នុងប្រទេសកម្ពុជា និងនៅលើសកលលោកគួរឱ្យព្រួយបារម្ភ។ នោះគឺការផ្សព្វផ្សាយព័ត៌មានក្លែងក្លាយ និងការផ្សព្វផ្សាយព័ត៌មានញុះញង់។ ដើម្បីចូលរួមចំណែកទប់ស្កាត់ព័ត៌មានក្លែងក្លាយ និងញុះញង់ទាំងអស់នេះកន្លងមកក្រសួងព័ត៌មានបានបង្កើតគណៈកម្មការតាមដានព័ត៌មានក្លែងក្លាយ សម្រាប់ឃ្លាំមើល និងតាមដានដែលទទួលបានប្រសិទ្ធភាពខ្ពស់។
ឯឧត្តម រដ្ឋលេខាធិការ ក្រសួងព៏ត៌មាន បានរំលឹកឡើងវិញដែរថា ដើម្បីអនុវត្តអនុសាសន៍ដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី ហ៊ុន សែន ដែលថា “កុំបំពានសិទ្ធិ អ្នកដទៃ កុំបំភ្លៃការពិត” ។ ដូច្នេះអ្នកសារព័ត៌មានដែលនៅកំរិតនៃការយល់ដឹងត្រូវបង្កើនសម្ថភាពវិជ្ជាជីវៈរបស់ខ្លួន ដើម្បីអនុវត្តការងារអោយបានល្អ និងចូលរួមលើកកម្ពស់វិស័យព័ត៌មានកាន់តែរឹងមាំបន្ថែមទៀត។ នៅក្នុងឱកាសនោះដែរ ឯកឧត្តម ក៏បានឡើងធ្វើបទបង្ហាញស្តីពី ក្រមសីលធម៏ និងតំលៃរបស់អ្នកសារព័ត៌មាន សារ:សំខាន់នៃវិជ្ជាជីវះសារព័ត៌មាន និងផលប៉ះពាល់ ៕
