កាលពីវេលាម៉ោងប្រមាណ ៤ទៀបភ្លឺថ្ងៃទី០៨ ខែតុលា ឆ្នាំ ២០២០ មានករណីគ្រោះថ្នាក់មួយកើតឡើង ខាងមុខមន្ទីរពហុព្យាបាលខេរ៉ាអង្គរ២ ស្ថិតនៅវត្តបូព៌ សង្កាត់សាលាកំរើក ក្រុងសៀមរាប បណ្ដាលឲ្យស្លាប់ ០២នាក់ និងរបួសធ្ងន់ម្នាក់។ តាមការសន្និដ្ឋាន របស់មន្ត្រីជំនាញ គ្រោះថ្នាក់នេះ បង្កដោយអ្នកបើកបរក្រោមឥទ្ធិពលនៃគ្រឿងស្រវឹង។
តាមការឲ្យដឹងបន្ថែម ពីមន្ត្រីនគរបាលចរាចណ៍ផ្លូវគោកនៃស្នងការខេត្តសៀមរាប អ្នកបើកបររថយន្តបង្កម៉ាកស៊ីណា ភេទប្រុស វ័យ ២៤ឆ្នាំ រស់នៅសង្កាត់ទឹកវិល ក្រុងសៀមរាប បានស្លាប់ បន្ទាប់ពីបញ្ជូនទៅដល់មន្ទីរពេទ្យ រីឯអ្នករួមដំណើរភេទស្រីម្នាក់ទៀត វ័យ១៨ឆ្នាំ រស់នៅឃុំកំពង់ហ្លួង ស្រុកពញាឮ ខេត្តកណ្ដាល បានស្លាប់ភ្លាមៗនៅនឹងកន្លែងកើតហេតុ និងស្ត្រីរួមដំណើរម្នាក់ទៀត វ័យ ២៧ឆ្នាំ រស់នៅសង្កាត់ស្លក្រាម ក្រុងសៀមរាប របួសធ្ងន់។
បច្ចុប្បន្ន រថយន្តបង្ក និង រថយន្តដែលចតចោលនោះ ត្រូវបាន អូសទៅរក្សាទុកនៅស្នងការដ្ឋាននគរ បាលខេត្តសៀមរាប រង់ចាំការដោះស្រាយតាមផ្លូវច្បាប់។
ចំណែកសាកសព ទាំង២នាក់ ត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ដោយឡែកស្ត្រីរងរបួសធ្ងន់ កំពុងសម្រាកព្យាបាល នៅមន្ទីរពេទ្យបង្អែកខេត្តសៀមរាប ៕
អ្តបទ និង រូបភាព៖ ម៉ី សុខារិទ្ធ
កែសម្រួល៖ សេង ផល្លី
