វគ្គបណ្តុះបណ្តាលតម្រង់ទិសការងាររបស់អនុសាខាកាកបាទក្រហកម្ពុជា ក្រុង-ស្រុកទាំង១២ ក្នុងខេត្តសៀមរាបដែលបានសិក្សាអស់រយៈពេលពីរថ្ងៃដោយមានសិក្ខាកាមអញ្ចើញចូលរួមមកពីបណ្តាអនុសាខាកាកបាទក្រហកម្ពុជា ក្រុង-ស្រុកទាំង១២ ក្នុងខេត្តសៀមរាប ចំនួន៤៨រូបត្រូវបានបិទវគ្គកាលពីរសៀលថ្ងៃទិ០៨ខែតុលាឆ្នាំ២០២០ក្រោមអធិបតីភាព ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ។
លោក ស៊ុ សំអន នាយកសាខាកាកបាទក្រហមកម្ពុជា ខេត្តសៀមរាប មានលើកឡើងថា ការបើកវគ្គតម្រង់ទិសការងារអនុសាខាកាកបាទក្រហកម្ពុជា ក្រុង-ស្រុកទាំង១២ ក្នុងខេត្តសៀមរាប នាពេលនេះគឺមានគោលបំណងផ្ដល់នូវការយល់ដឹងពីការងារកាកបាទក្រហមនៅថ្នាក់អនុសាខាដើម្បីឈានទៅអនុវត្តបានត្រឹមត្រូវ តាមគោលការណ៍របស់កាកបាទក្រហមកម្ពុជា ។
លោកនាយកសាខា បន្ថែមថា ទោះបីវគ្គតម្រង់ទិសការងារអនុសាខាក្រុងស្រុកនេះ ប្រព្រឹត្តិទៅក្នុងរយៈពេលខ្លីក៏ដោយ តែវគ្គនេះបានបង្ហាញពីប្រធានបទសំខាន់ៗ ដូចជាមូលដ្ឋានគ្រឹះកាកបាទក្រហម រចនាសម្ព័ន្ធ តួនាទីភារកិច្ចអនុសាខា ក្រុមអ្នកស្ម័គ្រចិត្ត យុវជនកាកបាទក្រហមកម្ពុជាសកម្មភាព វិស័យស្នូលទាំង៤ រួមទាំងការងារគ្រប់គ្រងប្រើប្រាស់ ថវិកាជូនអស់លោក លោកស្រី ដែលជាសិក្ខាកាមទាំងអស់ឲ្យបានយល់ដឹង និងជាជំនួយតម្រង់ទិស សំដៅអនុវត្តន៍សកម្មភាពនៅតាមបណ្តាអនុសាខាឲ្យបានត្រឹមត្រូវ តាមគោលការណ៍របស់កាកបាទក្រហមកម្ពុជា។
ថ្លែងក្នុងពិធីបិទវគ្គនោះ ឯកឧត្តម ទៀ សីហា បង្ហាញថា សាខាកាកបាទក្រហមកម្ពុជា ខេត្តសៀមរាប ក្នុងអាណត្តិទី៥នេះ បាននិងកំពុងតែបន្តអនុវត្តន៍ នូវយុទ្ធសាស្រ្តតាមរយៈវិស័យស្នូលទាំង៤ រួមមាន៖ ១/ ការគ្រប់គ្រងគ្រោះមហន្តរាយ ២/ សុខភាព និងការថែទាំសុខភាព សហគមន៍ ៣/ លើកកម្ពស់គោលការណ៍គ្រឹះ និងតម្លៃមនុស្សធម៌របស់ចលនាការអភិវឌ្ឍស្ថាប័ន និង៤/ អភិវឌ្ឍន៍ធនធាន។
ប្រធានគណៈកម្មាធិការសាខាកាកបាទក្រហមកម្ពុជាខេត្ត ក៏បានបញ្ជាក់ផងដែរថា សមិទ្ធផល និងសកម្មភាពសេវាកម្មមនុស្សធម៌ របស់អនុសាខាកាកបាទក្រហម និងអ្នកស្ម័គ្រចិត្ត ដែលសម្រេចបានកន្លងមក គឺពិតជាពោរពេញទៅដោយការស្ម័គ្រចិត្ត និងឧត្តមគតិមនុស្សធម៌ ដែលស្ថិតនៅក្រោមការដឹកនាំផ្ទាល់ របស់សម្តេចកិត្តិព្រឹទ្ធបណ្ឌិត ប៊ុន រានី ហ៊ុនសែន ប្រធានកាកបាទក្រហមកម្ពុជាពិតប្រាកដមែន ហើយចំពោះមុខ ដើម្បីទ្រទ្រង់សកម្មភាពសេវាកម្មមនុស្សធម៌បាននោះ គឺត្រូវទាមទារឲ្យ គណៈកម្មាធិការអនុសាខាទាំងអស់ ត្រូវខិតខំបន្តរកមូលនិធិពីគ្រប់មូលដ្ឋាន តាមរយៈការពង្រីកសមាជិកភាព ការដាក់ហិបសប្បុរសធម៌ ព្រឹត្តិការណ៍មនុស្សធម៌តាមលទ្ធភាព ហើយត្រូវពង្រឹងសកម្មភាពអ្នកស្ម័គ្រចិត្តយុវជនកាកបាទក្រហមក្នុងអនុសាខា ដែលជាឆ្អឹងខ្នងរបស់សមាគមជាតិយើង។
ឯកឧត្តម បានបញ្ជាក់បន្ថែមទៀតថា ទោះបីជាការយល់ដឹងរបស់សិក្ខាកាមទាំងអស់ នៅក្នុងវគ្គតម្រង់ទិសនេះ ពុំដូចគ្នាក្តី ឯកឧត្តមរំពឹងថា អស់លោក លោកស្រី នឹងធ្វើការចែករំលែកបន្ត ដល់សមាជិកដទៃទៀតៗ ក្នុងគណៈកម្មាធិការអនុសាខាទាំងអស់ ឲ្យបានយល់ដឹងនិងធ្វើការសហការគ្នា ដើម្បីបំពេញការងារមនុស្សធម៌ឲ្យបានល្អជាក់ជាមិនខាន៕
អត្ថបទ និង រូបភាព៖ ទ្រា ពន្លឺ
កែសម្រួល៖ សេង ផល្លី
