គិតត្រឹម៩ខែដើមឆ្នាំ២០២០ គ្រោះថ្នាក់ចរាចរណ៍ក្នុងខេត្តសៀមរាប បណ្ដាលឲ្យមនុស្សស្លាប់ ៥៧នាក់ ហើយភាគច្រើនគឺជាអ្នកបើកបរម៉ូតូ។ ប៉ុន្តែករណីស្លាប់នេះ បានបង្ហាញពីការថយចុះ ប្រមាណជាង ៦ភាគរយ បើធៀបនឹងរយៈពេលដូចគ្នាកាលពីឆ្នាំ២០១៩ ដែលមានអ្នកស្លាប់សរុប ៦១ នាក់ នេះបើតាមការឲ្យដឹងពី លោក ហូ សម័យ ប្រធានស្ដីទីការិយាល័យសុវត្ថិភាពចរាចរណ៍ផ្លូវគោក នៃមន្ទីរសាធារណការ និងដឹកជញ្ជូនខេត្តសៀមរាប នៅថ្ងៃទី០៩ ខែតុលា ឆ្នាំ២០២០។
លោកបន្ថែមថា ករណីគ្រោះថ្នាក់ចរាចរណ៍សរុបនៅទូទាំងខេត្ត រយ:ពេលដដែលនេះ មាន ៥០ករណី និងរបួសធ្ងន់ស្រាល ១៥៦នាក់ប៉ុណ្ណោះ បើធៀបនឹងរយៈពេលដូចគ្នាឆ្នាំ ២០១៩ គ្រោះថ្នាក់មានដល់ ៦៧ករណី និងរបួសធ្ងន់ស្រាល ១៧៣នាក់។
លោកបានបញ្ជាក់ផងដែរថា គ្រោះថ្នាក់ចរាចរណ៍ភាគច្រើនបង្កឡើង ដោយអ្នកបើកបរខ្វះការប្រុងប្រយ័ត្ន និងលើសល្បឿនកំណត់។ ចំពោះ ភូមិសាស្ត្រដែលតែងតែកើតមានគ្រោះថ្នាក់ចរាចរណ៍ គឺស្ថិតនៅលើកំណាត់ផ្លូវជាតិលេខ៦ ឆ្លងកាត់ស្រុកចំនួន ៣ចំនួន រួមមាន ស្រុកជីក្រែង ស្រុកសូទ្រនិគម និងស្រុកពួក ហើយភាគច្រើនគឺជាអ្នកបើកម៉ូតូ។
គួររំលឹកថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ្ទ បាន ប្រកាសថា ២០២០ ជាឆ្នាំត្រូវរឹតបន្តឹងការអនុវត្តច្បាប់ចរាចរណ៍ផ្លូវគោក ដើម្បីកាត់បន្ថយគ្រោះថ្នាក់ ខណៈរបាយការណ៍គ្រោះថ្នាក់ចរាចរណ៍ឆ្នាំ២០១៩ មានអ្នកស្លាប់ជិត ២ពាន់នាក់។
អត្ថបទ និងរូបភាព: មន្ទីរព័ត៌មានខេត្តសៀមរាប
