ការកែលម្អសោភណ្ឌភាពនៅមុខប្រាសាទអង្គរ ឲ្យមានភាពស្រស់បំព្រងគ្រប់រដូវកាល រួមមានដាំស្មៅ ដាំកូនឈើ និងដើមផ្កាជាច្រើនប្រភេទទៀត គឺក្នុងគោលដៅលើកតម្លៃនៃសម្បត្តិបេតិកភណ្ឌពិភពលោក និងថែរក្សា កេរតំណែលដួងព្រលឹងបុព្វបុរសខ្មែរ ។ បន្ថែមលើសពីនោះ អាជ្ញាធរជាតិអាប្សរា ក៏បានរៀបចំឲ្យមានទីតាំងលក់ដូរថ្មី សម្រាប់បងប្អូនដែលជាអាជីវករលក់ដូរនៅមុខប្រាសាទអង្គរវត្ត ដែលការរៀបចំនេះ ត្រូវបានបងប្អូនអាជីវករសម្តែងនូវការគាំទ្រជាខ្លាំងចំពោះទីតាំងថ្មីនោះ។
បើតាមប្រជាពលរដ្ឋដែលជាអាជីវករលក់ដូរ នៅក្នុងតំបន់នោះ បានបង្ហាញ់ថា ពួកគាត់ពិតជាពេញចិត្តយ៉ាងខ្លាំងចំពោះទីតាំងថ្មីដែលអាជ្ញាធរអប្សរាបានរៀបចំឲ្យពួកគាត់ ព្រោះនៅទីនោះ មានសោភ័ណភាព និងបរិស្ថានល្អស្អាត គ្រាន់តែកន្លែងលក់ដូរតូចជាងទីតាំងចាស់របស់គាត់បន្ដិចបន្ដួចប៉ុណ្ណោះ ។ ការលក់ដូរនៅទីតាំងថ្មីនេះរៀបចំដោយអាជ្ញាធរជាតិអប្សរា ដោយមិនគិតប្រាក់ឈ្នួលពីអាជីវករនោះទេ។ ពួកគាត់បញ្ជាក់ថា កន្លែងលក់ដូរចាស់មិនសូវមានបរិស្ថានស្អាតនោះទេ ហើយកន្លែងលក់ដូរជាតូបស្លឹកនិងខ្លះទៀតអាគារជួលពីគេ ប៉ុន្ដែក្រោយពេលដែលអាជ្ញាធរជាតិរៀបចំជាកន្លែងថ្មី គឺជាកម្មសិទ្ធិរបស់ពួកគាត់ ដោយមិនបាច់បោះប្រាក់ឡើយ។ ពួកគាត់ក៍សម្ដែងការដឹងគុណដល់អាជ្ញាធរជាតិអប្សរាផងដែរ ដែលផ្ដល់កន្លែងដ៍សមរម្យមួយដែលធ្វើពីថ្មសម្រាប់បន្ដអាជីវកម្មរបស់ពួកគាត់។
បើតាមប្រជាពលរដ្ឋដែលបានមកកំសាន្តនៅរមណីដ្ឋានអង្គរ បានបង្ហាញ់ចំណាប់អារម្មណ៍ថា ទីតាំងលក់ដូរថ្មីនេះល្អ មានសោភ័ណភាព ហើយកន្លែង លក់ដូរចាស់ ត្រូវបានរៀបចំដាំឡើងវិញនូវកូនឈើប្រណិតៗ នៅមុខប្រាសាទអង្គរ ដើម្បីទាក់ទាញអ្នកទេសចរឲ្យមកកម្សាន្តនៅខេត្តសៀមរាបក្រោយពីបញ្ចប់កូវីដ១៩។
សូមបញ្ជាក់ថា អាជ្ញាធរជាតិអប្សរា បានចាប់ផ្តើមធ្វើការរៀបចំហេដ្ឋារចនាសម្ពន្ធ និងរៀបចំសួនច្បារនៅខាងលិចប្រាសាទអង្គរវត្តនេះ ជាមួយនឹងការរុះរើសំណង់តូបលក់ដូរផង នៅដើមឆ្នាំ២០២០នេះ។ រហូតមកដល់ពេលនេះសំណង់ភោជនីយដ្ឋាន អាគាររដ្ឋ តូបលក់ដូរម្ហូបអាហារ លក់វត្ថុអនុស្សាវរីយ៍ សម្លៀកបំពាក់ប្រមាណជា១៥០ខ្នង ក៏បានរុះរើរួចរាល់អស់ទាំងស្រុង ដោយការស្ម័គ្រចិត្តពីម្ចាស់កម្មសិទ្ធិ និងព្រមទៅទីតាំងថ្មីនោះ ។ទីធ្លាខាងលិចប្រាសាទអង្គរវត្តនេះ ក៏ពេញទៅដោយការ អភិវឌ្ឍហេដ្ឋារចនាសម្ពន្ធនិងសួនច្បារបៃតងបង្អួតសម្រស់ធម្មជាតិដ៏ស្រស់បំព្រងផងដែរ ៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
