ចាប់ពីរំលងអាធ្រាត យប់ថ្ងៃទី១០ ឈានចូលថ្ងៃទី១១ ខែតុលា ឆ្នាំ២០២០ មិនជាទូទៅទេនៅក្នុងទីប្រជុំជនស្រុកពួក បានចាប់ផ្តើមរងឥទ្ធិពលនៃជំនន់ទឹកភ្លៀង ដែលបានបង្អោរធ្លាក់ខ្លាំងរយៈពេល៣ថ្ងៃជាប់ៗគ្នាកន្លងមកនោះ។ ជាមួយនឹងស្ថានភាពបែបនេះ អាជ្ញាធរជាតិអប្សរាក៏បានជូនដំណឹងឲ្យបានដឹងជាមុនដែរថា ដោយសារតែទីតាំងស្តុកទឹកទាំងឡាយ ត្រូវបានពេញចំណុះហើយនោះ ចាប់ពីថ្ងៃទី០៩ ខែតុលា អាជ្ញាធរជាតិអប្សរា ត្រូវបានបើកបង្ហើបទ្វាទឹកដែលហូរធ្លាក់ពីតំបន់ភ្នំគូលេន ដើម្បីរំដោះតាមដងស្ទឹងនានា ឆ្ពោះទៅកាន់បឹងទន្លេសាប ក្នុងនោះក៏មានដងស្ទឹងស្រុកពួកមួយផងដែរ។ នេះបើតាមប្រសាសន៍ លោក ស៊ីន ចាន់ថុល អភិបាលស្រុកពួក កាលពីព្រឹកថ្ងៃទី១១ ខែតុលាកន្លងទៅ ក្នុងឱកាសដែលលោក បានដឹកនាំក្រុមការងារសណ្តាប់ធ្នាប់ អនាម័យ និងបរិស្ថាន បារកំប្លោក ដែលជាប់នឹងសរសរស្ពានមួយកន្លែង នៅតាមដងស្ទឹងពួក ត្រង់ចំណុចវត្តតាទក ដើម្បីធ្វើឲ្យដងស្ទឹងមួយនេះ មានលទ្ធភាពរំដោះទឹកជំនន់បានលឿន។
លោកបានបញ្ជក់ថា នេះគឺជាការអនុវត្តវិធានការបង្ការ ឬក៏បញ្ជៀសហានីភ័យគ្រោះទឹកជំនន់។ ៣ថ្ងៃកន្លងមកហើយ ដែលប្រតិបត្កិការនេះ ចូលរួមដោយកម្លាំងសមត្ថកិច្ចរបស់គណៈបញ្ជាការឯកភាពស្រុក ព្រះសង្ឃ ប្រជាពលរដ្ឋ និងម្ចាស់គ្រឿងចក្រផងដែរ។ ក្នុងនោះបើគិតត្រឹមព្រឹកថ្ងៃទី១១ ខែតុលានេះ ភូមិចំនួន៥ នៅក្នុងភូមិសាស្រ្តឃុំពួក ត្រូវបានរងជំនន់ទឹកភ្លៀងចូលមកដល់ ក្នុងនោះមានសាលារៀន ៤កន្លែងត្រូវទឹកលិច ផ្លូវគ្រួសក្រហម៥ខែ្ស ផ្លូវបេតុ១ខ្សែ និងផ្លូវកៅស៊ូ១ខ្សែទៀត ក៏ត្រូវជន់ទឹកភ្លៀងហូរកាត់។ ក្រៅពីនេះ ដូចជាការចិញ្ចឹមសត្វ ដំណាំដាំដុះផ្សេងៗ រួមទាំងស្រូវស្រែផងដែរ ប៉ុន្តែពុំទាន់អាចនិយាយបានថា មានផលប៉ះពាល់ធ្ងន់ធ្ងរនៅឡើយនោះទេ៕
អត្ថបទ និងរូបភាព៖ លោកងិន គីមឡេង
កែសម្រួលដោយ៖ លីវ សុខុន
