នាព្រឹកថ្ងៃទី១២ ខែតុលា ឆ្នាំ២០២០នេះ លេខាធិការដ្ឋានខេត្តសៀមរាប បានបើកកិច្ចប្រជុំសេចក្តីណែនាំ ស្តីពីនីតិវិធីនៃការលុបឈ្មោះអ្នកបោះឆ្នោតដែលនឹងត្រូវលុបចេញពី បញ្ជីបោះឆ្នោតចុងក្រោយ (ទ.១០២៥) ក្នុងដំណាក់កាលនៃការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំនោះ ដើម្បីឱ្យការលុបឈ្មោះអ្នកបោះឆ្នោតចេញពីបញ្ជីបោះឆ្នោតផ្លូវការ ក្នុងដំណាក់កាលពិនិត្យបញ្ជីឈ្មោះ និងចុះឈ្មោះបោះឆ្នោតប្រចាំឆ្នាំអនុវត្តឲ្យបានត្រឹមត្រូវ និងមានតម្លាភាព ស្របតាមច្បាប់ និងបទបញ្ជា និងនីតិវិធីសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ សំដៅធានាបាននូវបញ្ជីបោះឆ្នោតដែលមានគុណភាព និងបច្ចុប្បន្នភាព។ កិច្ចប្រជុំនេះដែរប្រព្រឹត្តិទៅក្រោមអធិបតីភាពឯកឧត្តម កុយ សង សមាជិកក្រុមប្រឹក្សាខេត្ត តំណាងដ៏ខ្ពង់ខ្ពស់ឯកឧត្តម អ៊ឹង ហឿន ប្រធានក្រុមប្រឹក្សាខេត្តសៀមរាប លោក នឹម វ៉ាន់សំ ប្រធានលេខាធិការដ្ឋានខេត្ត រួមជាមួយលោក លោកស្រី គ្រូបង្ហាត់ទាំង១២ ក្រុង/ស្រុក ប្រមាណជាង៥០នាក់បានចូលរួមផងដែរ។
មានប្រសាសន៍ក្នុងឱកាសនោះ លោក នឹម វ៉ាន់សំ បានអាននៅសេចក្តីណែនាំរបស់គណៈកម្មាធិការជាតិ រៀបចំការបោះឆ្នោត ដែលបានណែនាំដល់លោក លោកស្រីប្រធានលេខាធិការដ្ឋានរាជធានី ខេត្តរៀបចំការបោះឆ្នោត ក្រុមប្រឹក្សាឃុំ សង្កាត់ ក្រុមចុះឈ្មោះបោះឆ្នោតទាំងអស់ អំពីនីតិវិធីនៃការលុប ឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតចុងក្រោយក្នុងការពិនិត្យបញ្ជីឈ្មោះ និង ចុះឈ្មោះបោះឆ្នោត ប្រសិនបើពិនិត្យឃើញថា ឈ្មោះអ្នកបោះឆ្នោតដែលបានស្រង់ចូលទៅក្នុង ទ.១០២៥ ពុំមានឯកសារសំអាងត្រឹមត្រូវ និងច្បាស់លាស់តាមករណីនីមួយៗទេ លធ.ខប ត្រូវធ្វើទំនាក់ទំនង ទៅភាគីពាក់ព័ន្ធ ទៅតាមករណីដូចខាងក្រោម ៖ ករណីដែលអ្នកមានឈ្មោះក្នុងបញ្ជីបោះឆ្នោត បានទទួលមរណភាព លធ.ខប ត្រូវណែនាំទៅ កបឃ.ស ដើម្បីកសាងឯកសារសំអាងឱ្យបានត្រឹមត្រូវ ហើយករណីដែលអ្នកមានឈ្មោះក្នុងបញ្ជីបោះឆ្នោតត្រូវបានដកហូតសិទ្ធិបោះឆ្នោត លធ .ខប ត្រូវធ្វើទំនាក់ទំនងទៅសាលាដំបូងរាជធានី ខេត្ត ឬសាលាជំរះក្តីពាក់ព័ន្ធនានា ដើម្បីស្នើសុំថតចម្លងឯកសារសំអាងដូចជា សាលក្រម ឬសាលដីកា ចំពោះអ្នកបោះឆ្នោតណា ដែលត្រូវបានតុលាការចេញសេចក្តីសម្រេចផ្តន្ទាទោសស្ថាពរ ករណីដែលអ្នកមានឈ្មោះក្នុងបញ្ជីបោះឆ្នោតបានផ្លាស់លំនៅឋាន ឬទីសំណាក់ អចិន្ត្រៃយ៍ចេញពីឃុំ សង្កាត់ទៅឃុំ សង្កាត់ផ្សេង លធ .ខប ត្រូវណែនាំឱ្យ កបឃ.ស ថតចម្លងសារសំអាងឱ្យបានត្រឹមត្រូវ និងច្បាស់លាស់ ។ ធ្វើទំនាក់ទំនងទៅស្នងការរាជធានី ខេត្តពាក់ព័ន្ធដើម្បីស្នើសុំថតចម្លងបញ្ជីឈ្មោះ និង ឯកសារពាក់ព័ន្ធ ចំពោះអ្នកបោះឆ្នោតណាមានឈ្មោះក្នុងបញ្ជីអន្តោប្រវេសន៍ ។ ឆ្នោតដំបូង ។
លោក នឹម វ៉ាន់សំ មានប្រសាសន៏បន្តទៀតថា បន្ទាប់ពីទទួលបាន ទ.១០២៥ និងឯកសារសំអាងត្រឹមត្រូវ និងច្បាស់លាស់រួចមក ក.ច.ប ត្រូវធ្វើការពិនិត្យលើ ទ.១០២៥ ជាមួយនឹងឯកសារសំអាងត្រឹមត្រូវ និងច្បាស់លាស់ តាមករណ៍នីមួយៗ និង ទិន្នន័យមួយចំនួនក្នុងបញ្ជីបោះឆ្នោតចុងក្រោយ ។ បន្ទាប់មក ក.ច .ប ត្រូវអនុវត្តការលុបឈ្មោះអ្នកទាំងនោះតាមកម្មវិធីកុំព្យូទ័រ ស្របតាមបទបញ្ជា និងនីតិវិធី ព្រមទាំងគោលការណ៍ណែនាំដែលបានកំណត់ដោយ គ.ជ.ប អំឡុងពេលនៃការពិនិត្យបញ្ជីឈ្មោះ នឹងការចុះបោះឆ្នោតប្រចាំឆ្នាំ ។ យោងតាមប្រតិទិននៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ និងលិខិតជូនដំណឹងរបស់ គ.ជ.ប ដូចមានចុះក្នុងយោងខាងលើ ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២០ គឺចាប់ផ្តើមពីថ្ងៃទី០១ ដល់ថ្ងៃទី១៩ ខែតុលា ឆ្នាំ២០២០នេះ។ បច្ចុប្បន្ន នៅខេត្តសៀមរាបយើង ចំពោះអ្នកបានចុះឈ្មោះបោះឆ្នោតឆ្នាំ២០២០នេះ បានប្រមាណជាង ៥៦១,៦៥៨នាក់ហើយ គិតចាប់ពីថ្ងៃទី០១-១១ ខែតុលា ឆ្នាំ២០២០៕
អត្ថបទ និង រូបភាព៖ ស៊ាន សុផាត
