ខណៈប្រទេសកម្ពុជាកំពុងតែរងឥទ្ធិពលព្យុះ ដែលបង្កឲ្យមានភ្លៀងធ្លាក់បន្តបន្ទាប់ជាច្រើនថ្ងៃ ប៉ុន្តែកម្រិតទឹកនៅក្នុងទំនប់អាងទឹកសំខាន់ទាំង៤ របស់ខេត្តសៀមរាប នៅតែស្ថិតក្នុងកម្រិតគ្រប់គ្រងបាន នេះបើតាមរបាយការណ៍របស់ មន្ទីរធនធានទឹក និងឧតុនិយមខេត្តសៀមរាប នៅព្រឹកថ្ងៃទី១៣ខែតុលា ឆ្នាំ២០២០។
ជាក់ស្តែង របាយការណ៍ដដែលនេះ បញ្ជាក់ថា កម្ពស់ទឹកនៅតាមទំនប់អាងទឹកសំខាន់ៗទាំង៤ រួមមាន:
– ទំនប់អាងទឹកម្កាក់ មានកម្ពស់ទឹក ១៦.៩០ម៉ែត្រ នៅក្រោមកម្រិតប្រកាសអាសន្ន ០.៦០ម៉ែត្រ
-ទំនប់អាងទឹកក្សាក មានកម្ពស់ទឹក ២.១៥ម៉ែត្រ ក្រោមកម្រិតប្រកាសអាសន្ន ០.៤០ម៉ែត្រ
-ទំនប់អាងទឹកស្ទឹងស្រែង១ មានកម្ពស់ទឹក ២៦.៨០ម៉ែត្រ លើសកម្រិតប្រកាសអាសន្ន ០.១០ម៉ែត្រ
-ទំនប់អាងទឹកស្ពានស្រែង មានកម្ពស់ទឹក ១៣.៦០ម៉ែត្រ លើសកម្រិតប្រកាសអាសន្ន ០.១០ម៉ែត្រ។
ដោយឡែក កម្ពស់ទឹកស្ទឹងបន្ទាយស្រី ស្ទឹងជីក្រែង ស្ទឹងក្រឡាញ់ និងស្ទឹងសៀមរាប ក៏ស្ថិតក្នុងកម្រិតគ្រប់គ្រងបានផងដែរ។
លោក នួន គ្រឹស្នា ប្រធានមន្ទីរធនធានទឹក និងឧត្តុនិយមខេត្ត បង្ហាញថា ទោះបីក្រុងស្រុកមួយចំនួន មានជំនន់ទឹកភ្លៀង ហូរចូលភូមិ កាត់ផ្លូវ សាលារៀនខ្លះក្ដី តែបញ្ហានេះ នៅពុំទាន់មានផលប៉ះពាល់ខ្លាំងនៅឡើយទេ។
ទោះបីជាយ៉ាងណាក៏ដោយ អាជ្ញាធរខេត្ត បានណែនាំដល់អាជ្ញាធរក្រុងស្រុក និងសមត្ថកិច្ច ត្រូវតាមដាន ស្ថានភាពទឹកឲ្យបានជាប់ជាប្រចាំ និងយកចិត្តទុកដាក់ខ្ពស់ត្រៀមជួយសង្គ្រោះប្រជាពលរដ្ឋ ប្រសិនបើមាន គ្រោះធម្មជាតិជាយថាហេតុណាមួយកើតឡើង ព្រមទាំងក្រើនរម្លឹកដល់ប្រជាពលរដ្ឋ ត្រូវមានការប្រុងប្រយត្ន័ខ្ពស់ ចំពោះការរស់នៅ ដែលអាចប្រឈមនឹងគ្រោះថ្នាក់ ដោយសារជំនន់ទឹកភ្លៀង។
អត្ថបទ និងរូបភាព: លោក យូ វង្ស
កែសម្រូលដោយ: លោក សេង ផល្លី
