កាលពីយប់ថ្ងៃទី០៨ ខែតុលា ឆ្នាំ២០២០នេះ ព្រះគ្រូមុនីបញ្ញាញាណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង សហការជាមួយព្រះគ្រូធម្មសិរីញាណ ធម្មទិន្នោ ឡម លឿម នាយកប្រតិបត្តិ សមាគមជីវិត និង ក្តីសង្ឃឹម រួមជាមួយព្រះចៅអធិការវត្តមួយចំនួនក្នុងក្រុងសៀមរាប បានអំណោយសង្គ្រោះបន្ទាន់ជាថវិកា គ្រឿងឧបភោគបរិភោគ ភេសជ្ជៈ និងសម្ភារប្រើប្រាស់ចាំបាច់ក្នុងផ្ទះ សរុបចំនួន២៣មុខ ជូនដល់គ្រួសាររងគ្រោះដោយសារលំនៅដ្ឋានត្រូវអគ្គិភ័យឆេះអស់ស្ទើរតែទាំងស្រុង កាលពីរសៀលថ្ងៃទី០៨ ខែតុលា ឆ្នាំ២០២០ ម្សិលមិញនេះ ស្ថិតក្នុងភូមិអំពិលពាម ឃុំខ្នាត ស្រុកពួក ខេត្តសៀមរាប ប៉ុន្តែពុំបណ្តាលឱ្យគ្រោះថ្នាក់ដល់អាយុជីវិតមនុស្ស និងសត្វឡើយ ដោយសារបានអ្នកជិតខាងជួយពន្លត់និងទប់ស្កាត់ទាន់ពេលវេលា ហើយក៏មិនឱ្យឆ្លងរាលដាលទៅលំនៅដ្ឋានប្រជាពលរដ្ឋផ្សេងទៀតដែរ ។
សូមបញ្ជាក់ថា លំនៅដ្ឋានដែលរងគ្រោះអគ្គិភ័យនេះ មានទំហំ៥ម៉ែត្រគុណនឹង៦ម៉ែត្រ សង់ឡើងអំពីឈើ ប្រក់ស័ង្កសី ជញ្ជាំងស្លឹក ក្រាលក្តារ ជារបស់លោក ឆិល ព្រិល អាយុ៣២ឆ្នាំ និងភរិយា ឈ្មោះ ជា សារ៉ូ អាយុ៣៤ឆ្នាំ មានកូនប្រុសតូចៗ ចំនួនពីរនាក់ មានជីវភាពគ្រួសារខ្វះខាត បច្ចុប្បន្នទាំងពីរនាក់ប្តីប្រពន្ឋ មានមុខរបរជាកម្មករសំណង់ ហើយកាលពី៥ឆ្នាំមុន លំនៅដ្ឋាននេះ ជាអំណោយបានពីការចូលរួមបរិច្ចាករបស់បងស្រី និងញាតិជិតខាង ។ បានមូលមតិគ្នាជាឯកច្ឆ័ន្ទ ទៅតាមលទ្ឋភាពដែលព្រះសង្ឃមាន កៀរគរប្រមូល។
មានសង្ឃដីកាក្នុងឱកាសនោះ ព្រះគ្រូមុនីបញ្ញាញាណ ស៊ុម ពិសិទ្ធិ ព្រះសមុហ៍គណខេត្ត បានសម្តែងនូវព្រះទ័យសោកស្តាយចំពោះគ្រោះថ្នាក់ដោយសារអគ្គិភ័យ បណ្តាឱ្យខូចខាតបាត់បង់ទ្រព្យសម្បត្តិដែលខំរក និងសន្សំទុកជាយូរមកហើយ ដូច្នេះតាមរយៈនេះ សូមផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវប្រុងប្រយ័ត្ន ការពារ ជាប់ជាប្រចាំនូវបញ្ហាអគ្គិភ័យ និងគ្រោះថ្នាក់ជាយថាហេតុផ្សេងៗ ដោយត្រូវពិនិត្យខ្សែបណ្តាញអគ្គិសនីក្នុងផ្ទះក្រែងមានការដាច់រលាត់ដោយកណ្តុរកកេរ ឬគៀបជាប់នឹងអ្វីមួយ ដែលយូរៗវានឹងបង្កទៅជាការឆ្លងចរន្ត ហើយមុននឹងចាកចេញពីផ្ទះ ក៏ត្រូវពិនិត្យឱ្យច្បាស់នូវភ្លើងចង្ក្រាន្ត ភ្លើងធូប ជាដើម ពិសេសត្រូវពន្លត់ឱ្យអស់មុននឹងចាកចេញ ។
ព្រះគ្រូមុនីបញ្ញាញាណ ស៊ុម ពិសិទ្ធិ មានថេរដិកាបន្តថា ថវិកា និង សម្ភារមួយចំនួនតូចដែលយកមកផ្តល់ជូននាពេលនេះ គឺជាការចែករំលែកជួយគ្នាក្នុងគ្រាលំបាកទៅតាមលទ្ឋភាពដែលក្រុមព្រះសង្ឃមាន ព្រោះថា ជារឿយៗព្រះសង្ឃនៃខេត្តសៀមរាប តែងតែបានចូលរួមក្នុងសកម្មភាពសង្គមជាច្រើន ទោះបីជាព្រះសង្ឃអាស្រ័យភោជន និងទទួលបានពីការប្រគេនទេយ្យវត្ថុផ្សេងៗ ពីប្រជាពុទ្ឋបរិស័ទក្តី តែព្រះសង្ឃតែងតែសន្សំសំចៃបែងចែកទុកដាក់នូវទេយ្យទានទាំងនោះសម្រាប់ជួយទំនុកបម្រុង និង ឧបត្ថម្ភដល់គ្រួសារប្រជាពលរដ្ឋណាខ្វះខាតជួបការលំបាកក្នុងជីវភាព និងមួយផ្នែកសម្រាប់ជួយការងារសង្គម ដែលនេះជាសង្គហៈធម៌ និងជាតួនាទីដែលព្រះសង្ឃត្រូវបំពេញក្រៅពីការស្វាធ្យាយព្រះធម៌ និងការងារស្នូលក្នុងអារាម ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
