កាលពីល្ងាចថ្ងៃទី១២ ខែតុលា ឆ្នាំ២០២០ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា និងជាប្រធានកាយរិទ្ធកម្ពុជា រួមជាមួយ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានអញ្ជើញអធិបតីក្នុងពិធីសច្ចាប្រធានជូនដល់កាយរឹទ្ធកម្ពុជា ខេត្តសៀមរាប និងពិធីជប់លៀងដើម្បីអបអរសាទរទិវាសន្តិភាព ២០២០។
ឯកឧត្ដម ហង់ ជួនណារ៉ុន បានថ្លែងថា ពិធីនេះធ្វើឡើង ក្នុងគោលបំណងអបអរទិវាសន្ដិភាពពិភពលោក និងដើម្បីជាឱកាសតបស្នងសងគុណស្ថាបនិកបីតាសន្ដិភាពនៅកម្ពុជា។ ជាមួយគ្នានោះដែរ ក៍ជាការបំផុសទឹកចិត្ត និងស្មារតីពលរដ្ឋក្នុងសហគមន៍ឱ្យបានយល់ដឹងកាន់តែច្បាស់អំពីតម្លៃ និងសារសំខាន់ នៃសន្តិភាព ដែលថ្នាក់ដឹកនាំរាជរដ្ឋាភិបាល ជាពិសេស សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាគរុគណនៃកាយរឹទ្ធិជាតិកម្ពុជា ដែលបានយកជីវិតធ្វើជាដើមទុនទៅប្តូរយកសន្តិភាពមកជូនប្រជាជនកម្ពុជា។
ឯកឧត្ដមរដ្ឋមន្រ្តីក្រសួង មានប្រសសន៍បន្ដថា រយៈពេលជាង២០ឆ្នាំមកហើយ ដែលប្រទេសកម្ពុជាបានទទួលសន្ដិភាពពេញលេញ និងមានការអភិវឌ្ឍន៍រីកចំរើនមកដល់សព្វថ្ងៃនេះ។ជាងនោះទៅទៀតសម្ដេចតេជោ ហ៊ុន សែន ក៍ជាអ្នកបង្កើតអោយមានសន្ដិភាព មានធនធានមនុស្សនៅកម្ពុជាផងដែរ។ក្នុងពិធីនេះដែរឯកឧត្ដម ក៍បានបំពាក់កន្សែងដល់កាយរិទ្ធិប្រមាណ១៣៨នាក់ផងដែរ។ឯកឧត្ដម បានស្នើអោយក្រុមកាយរិទ្ធិកម្ពុជាយកចិត្ដទុកដាក់និងបន្ដថែរក្សាសន្ដិភាពដើម្បីកសាងប្រទេសអោយបានរឹងមាំនៅក្នុងសត្ដវត្សរិ៍ទី២១នេះ។
មានប្រសាសន៍ក្នុងឱកាសនោះផងដែរ ឯកឧត្ដម ទៀ សីហា បានបញ្ជាក់ថា ការផ្សព្វផ្សាយអ្នកនាំសារសន្ដិភាពនេះ មានសារសំខាន់ណាស់ ព្រោះថាអបអរទិវាសន្ដិភាពនេះ ជាការគោរពនូវសន្ដិភាព សាមគ្គីភាព ឯកភាពជាតិ ពួតដៃគ្នាជាធ្លុងមួយបន្ដថែរក្សាសន្ដិភាពអោយបានយូរអង្វែង សម្រាប់អភិវឌ្ឍន៍ជាតិអោយបានកាន់តែរឹងមាំថែមទៀត។ ជាក់ស្ដែង នាពេលបច្ចុប្បន្ននេះ រដ្ឋបាលខេត្ដសៀមរាប បានយកចិត្ដទុកដាក់អភិវឌ្ឍន៍ខេត្ដនេះអោយមានការរីកចំរើនអោយកាន់តែល្អប្រសើរជាបន្ដបន្ទាប់ បើទោះកម្ពុជាបានជួបបញ្ហាជំងឺកូវីដ១៩ក៍ដោយ។
ឯកឧត្ដមអភិបាលខេត្តបន្ដថា ជាមួយគ្នានោះដែរអាជ្ញាធរខេត្ដសៀមរាប បានរៀបចំស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែនៅក្នុងក្រុងទេសចរណ៍នេះ ក្រោយបានទទួលកញ្ចប់ថវិកាចំនួន១៥០លានរៀលពីសម្ដេចតេជោ ហ៊ុន សែន នាយករដ្ឋមន្ដ្រី។ឯកឧត្ដម បានបន្ថែមថា ការអភិវឌ្ឍផ្លូវនេះ ដើម្បីលើកកំពស់សោភណ្ឌភាពក្រុងសៀមរាប សម្រួលការធ្វើចរាចរណ៍ ក៍ដូចជាធ្វើយ៉ាងណាអោយមានការទាក់ទាញអ្នកទេសចរណ៍ផងដែរ៕
អត្ថបទ និង រូបភាព៖ ឈិត សាវី
