កាលពីយប់ថ្ងៃទី១៣ ខែតុលា ឆ្នាំ២០២០ម្សិលមិញនេះ អ្នកជាប់ឃុំនៅពន្ធនាគារខេត្ដបន្ទាយមានជ័យចំនួន៨១១នាក់ ក្នុងនោះមានស្រីចំនួន៨៥នាក់ ត្រូវបានដឹកទៅដល់ពន្ធនាគារខេត្ដសៀមរាបហើយ ខណៈខេត្ដបន្ទាយជ័យ កំពុងរងការគំរាមកំហែងដោយជំនន់ទឹកភ្លៀង។
បើតាមមន្រ្តីជំនាញ បានឲ្យដឹងថា ការដឹកផ្ទេរអ្នកជាប់ឃុំមកកាន់ខេត្ដសៀមរាបនេះ បានប្រើរថយន្ដក្រុងប្រភេទ៣៥កៅអី និង៤៥កៅអី ចំនួន១៧គ្រឿង និងបានមកដល់ពន្ធនាគារខេត្ដសៀមរាប ដោយសុវត្ថិភាព និងមានការការពារយ៉ាងហ្មត់ចត់ ពីកម្លាំងសមត្ថកិច្ចជំនាញ។ ជនជាប់ឃុំក្នុងពន្ធនាគារ នៃខេត្តបន្ទាយមានជ័យមានចំនួនសរុប១,៦០០នាក់ ក្នុងនោះស្រី១០០នាក់។ បន្ទាប់ពីមានទឹកជំនន់ បានហូរចូលមកក្នុងពន្ធនាគារខេត្តយ៉ាងគំហុក បានបង្កឲ្យមានការលិចអាគាររដ្ឋបាល និងបន្តហូរចូលទៅក្នុងអាគារស្នាក់នៅរបស់ជនជាប់ឃុំ ថ្នាក់ដឹកនាំពន្ធនាគារបានសម្រេចជម្លៀសជនជាប់ឃុំ ចេញជាបន្ទាន់ ដើម្បីបញ្ចៀសគ្រោះថ្នាក់ជាយថាហេតុ
គួរជម្រាបថា គិតត្រឹមយប់ដដែលនេះ ទឹកជំនន់ជន់លិច ខេត្តបន្ទាយមានជ័យយ៉ាងខ្លាំង បើតាមរបាយការណ៍បញ្ជាក់ថា ស្រុកចំនួន៨ ឃុំចំនួន៣៣ និង បង្កផលប៉ះពាល់ដល់ប្រជាលរដ្ឋជិត៣ពាន់គ្រួសារ ព្រមទាំងបានសម្លាប់មនុស្សចំនួន៥នាក់ និងប៉ះពាល់សន្ទូង ផលដំណាំផ្សេងៗជិត៦ពាន់ហិកតា៕
ព័ត៌មានជាតិ ថ្មីៗ
អត្ថបទ និង រូបភាព : ឈិត សាវី
