កងកម្លាំងសមត្ថកិច្ចទាំងអស់ ក្នុងខេត្តសៀមរាប គឺជាកម្លាំងស្នូលរបស់គណៈកម្មការគ្រប់គ្រងគ្រោះមហន្តរាយខេត្ត ដើម្បីត្រៀមលក្ខណៈ មធ្យោបាយ និងសម្ភារ ជួយសង្គ្រោះប្រជាពលរដ្ឋឲ្យបានទាន់ពេលវេលា ក្នុងករណី មានគ្រោះទឹកជំនន់ អាចកើតមានឡើយនៅពេលខាងមុខ នេះបើតាមការលើកឡើង លោក លី សំរឹទ្ធ អភិបាលរងខេត្តសៀមរាប នៅក្នុងពិធីបិទវគ្គបំប៉នជំនាញ ទប់ទល់ប្រឆាំងបាតុកម្ម ភេរវកម្ម និងការចាប់ខ្លួនជនល្មើសបែប វី អាយ ភី នៅស្នងការដ្ឋាននគរបាលខេត្តសៀមរាប នាព្រឹកថ្ងៃទី១៥ ខែតុលា ឆ្នាំ២០២០។
លោកអភិបាលរងខេត្ត បានឲ្យនិយមន័យគ្រោះទឹកជំនន់នាពេលនេះ ថាជា ភេវរករធម្មជាតិដ៏កាចសាហាវ ស្របពេលភេរវករថ្មី បាននឹងកំពុង វាយលុកជាសកលនៅលើពិភពលោក គឺជំងឺកូវីដ១៩ ដែលទាំងនេះសុទ្ធតែចូលរួមបង្ក នូវផលប៉ះពាល់ធ្ងន់ធ្ងន់ ដល់ជីវភាពរស់នៅប្រចាំថ្ងៃរបស់ប្រជាពលរដ្ឋទូទៅ។ ក្នុងកាលៈទេសៈនេះ កងកម្លាំងសមត្ថកិច្ចទាំងអស់ ត្រូវត្រៀម ក្នុងការបង្ក្រាប និងជួយសង្គ្រោះដល់ប្រជាពលរដ្ឋ មិនថាជាភារវកម្មបង្កដោយមនុស្ស ឬធម្មជាតិឡើយ ដើម្បីធ្វើយ៉ាងណា បញ្ចៀសឲ្យបាននូវផលប៉ះពាល់ធ្ងន់ធ្ងរ និងបាត់បង់ជីវិតជាដើម។
បន្ថែមពីនោះ លោកអភិបាលរងខេត្ត គូសបញ្ជាក់ថា៖ វគ្គហ្វឹកហ្វឺនបំប៉នជំនាញនេះ វាមិនត្រឹមតែជាលំហាត់ពង្រឹងកាយសម្បទារបស់កងកម្លាំងសមត្ថកិច្ច ឲ្យរឹងមាំប៉ុណ្ណោះទេ ក៏ប៉ុន្តែវាជាការពង្រឹងបន្ថែមលើជំនាញ ដោយស្របតាមបរិបទដ៏សំខាន់ផងដែរ គឺការថែរក្សាសន្តិភាព ស្ថិរភាពនយោបាយ សន្តិសុខ សុវត្ថិភាព សណ្តាប់ធ្នាប់សាធារណៈ។ ពិតណាស់ថា សៀមរាបអង្គរ គឺជាតំបន់ទេសចរណ៍វប្បធម៌ ប្រវត្តិសាស្រ្ត និងធម្មជាតិដ៏ទាក់ទាញ នៃកម្ពុជា ព្រះរាជាណាចក្រអច្ឆរិយៈ ក៏ប៉ុន្តែសន្តិសុខគឺជាអាហារបំប៉នដ៏ចាំបាច់ សម្រាប់ការពង្រឹង និងពង្រីកវិសាលភាពនៃវិស័យទេសចរណ៍។ ទន្ទឹមនេះដែរ អសន្តិសុខ វាជាសត្រូវស្លាប់រស់នៃវិស័យទេសចរណ៍ ភ្ញៀវទេសចរ មិនអាចស្នាក់នៅ ក្នុងតំបន់ដែលមានអសន្តិសុខនោះឡើយ។
តាមរបាយការណ៍ របស់ឧត្តមសេនីយ៍ទោ ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប បង្ហាញថា៖ វគ្គបំប៉នជំនាញទប់ទល់ប្រឆាំងបាតុកម្ម ទប់ទល់ប្រឆាំងភេរវកម្ម និងការចាប់ខ្លួនជនល្មើសបែប វី អាយ ភី ត្រូវបានគាំទ្រដោយអគ្គស្នងការដ្ឋាននគរបាលជាតិ មានកម្លាំងជំនាញជាសិក្ខាកាម១៣៥នាក់ ប្រើប្រាស់រយៈពេលហ្វឹកហាត់១០ថ្ងៃ ដែលមានក្រុមគ្រូបង្គោល មកពីការិយាល័យអន្តរាគមន៍ និងតម្រួតបទបញ្ជា។ វិញ្ញាសារសំខាន់ៗនោះ គឺការទប់ទល់ រុញច្រាន ព័ទ្ធចាប់ហ្វូងបាតុករ សម្រុកចូលកម្ទេចចាប់ខ្លួនក្រុមភេរវករ រំដោះចំណាប់ខ្មាំង ចាប់ខ្លួនមុខសញ្ញាក្នុងអាគារ បញ្ជូនជនល្មើសទៅកាន់កន្លែងមានសុវត្ថិភាព ដើម្បីបញ្ជៀសការប្រឆាំងតវ៉ាផ្សេងៗ ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
